Akarere ka Huye kiyemeje gushyira iherezo ku kibazo cy’abana bo ku muhanda

Yanditswe na Prudence Kwizera
Kuya 27 Ukuboza 2020 saa 08:20
Yasuwe :
0 0

Mu rwego rwo guca ikibazo cy’abana b’inzererezi gikomeje kugaragara mu Karere ka Huye, ubuyobozi bwafashe ingamba nshya aho mu gihe bubonye umwana w’inzererezi mu muhanda, buzajya bufatanya n’inzego z’ibanze mu kurebera hamwe impamvu imutera kuba atari mu muryango.

Mu mujyi wa Huye hakunze kugaragara abana basabiriza, barimo n’abamaze igihe kirenga imyaka ibiri bakora icyo gikorwa ku buryo usanga bazwi, n’aho bakunze guhagarara hazwi.

Bake bemeye kutuganiriza bavuga ko bajya ku muhanda kubera ibibazo birimo amakimbirane arangwa iwabo, ndetse n’ubukene bituma basonza bakaza gusaba ibyo kurya.

Umwe ufite imyaka 13 yatubwiye ko umugore wa kabiri se yashatse nyina amaze gupfa yamuhohoteraga, bituma amuhunga ajya ku muhanda.

Undi ufite imyaka 14 yavuze ko yavuye mu rugo kubera ko hari inzara, akajya gusabiriza ibyo kurya mu mujyi.

Yagize ati “Ubu ndasaba nabona ibyo kurya ubundi nkiryamira mu iteme.”

Umuyobozi w’Akarere ka Huye, Sebutege Ange, yavuze ko ikibazo cy’abana bazereza mu mujyi gihangayikishije, ari nayo mpamvu bafashe umwanzuro wo kugikemura bagihereye mu mizi, kuko basanze kubafata gusa nta musaruro bitanga.

Ati “Ni ikibazo kiduhangayikishije, duhora dushaka n’umuti urambye w’uburyo cyakemuka. Ni kenshi hakorwa imikwabu yo kugira ngo abo bana basubizwe mu miryango yabo. Umwana ufite ikibazo ntabwo cyakemurirwa mu muhanda ahubwo gikemurirwa mu muryango.”

Sebutege avuga ko mu busesenguzi bakoze basanze igituma abana bajya kuba mu muhanda ahanini biterwa n’ibibazo byugarije umuryango we birimo amakimbirane n’inzara bityo bakaba biyemeje kuba ari byo baheraho bakemura.

Ati “Ubu niyo gahunda turimo, niba umwana yafatiwe mu muhanda hagakorwa uburyo bw’isesengura hakarebwa igituma ajya mu muhanda akaba ari cyo dukemura.”

Hari ababyeyi bohereza abana gusabiriza

Ubuyobozi bw’Akarere ka Huye buvuga ko bwamaze gutahura ko hari bamwe mu babyeyi bohereza abana babo gusabiriza mu muhanda, kandi batangiye kujya babahana kuko ibyo bakora ari ugutoza abana imico mibi.

Sebutege ati “Ubu twangiye n’inzira yo guhana ababyeyi bagiye bagaragara bohereza abo bana ari nko kubatuma mu muhanda. Umubyeyi akaba ari we uhanwa kuko afite inshingano zo kwita ku mwana we, mu gihe atubahirije izo nshingano kandi nta kindi kibimubuza agomba kubibazwa.”

Yakomeje avuga ko gahunda zo gufasha abatishoboye zihari kandi zisobanutse, bityo ufite ikibazo wese akwiye kwegera ubuyobozi bukamufasha kugikemura aho kugira ngo abana be bajye kuzerera.

Yatanze urugero rw’aho hari ababyeyi babura itungo bagahangayika ku buryo barara barishakisha, ariko umwana yagenda ntibabyiteho, asaba ko uwo muco mubi wo kutita ku nshingano zo kurera ucika.

Guha umwana usabiriza ni ukumushuka

Sebutege yavuze ko abantu baha amafaranga cyangwa ikindi kintu umwana basanze mu muhanda baba bakoze amakosa kuko ari ukumushyigikira ngo ahagume.

Yasabye abatuye mu Karere ka Huye ubufatanye mu gukura abana mu muhanda aho kubaha ibituma bagumamo.

Ati “Twagiye tubisobanura kenshi, dukwiye gufatanya twese tukumva ko iyo hari ikintu uhaye umwana mu muhanda icyo gihe yumva ko iyo yaje mu muhanda hari icyo ahabonera, bigatuma na we yumva ko ari ahantu ho kuzajya abonera ibiceri n’ifunguro agahora ahaza.”

Yasobanuye ko iyo umwana agiye mu muhanda igihugu kiba gihombye kabiri kuko uwo mwana abaho nabi, agakura nta burere bwo mu muryango no mu ishuri afite ndetse akagira n’imico mibi.

Abana bazerera mu Mujyi wa Huye bigaragara ko badaheruka kwikoza amazi kubera imyenda isa nabi baba bambaye. Bavuga ko iyo bwije bajya kuryama munsi y’iteme cyangwa inyuma y’inzu zitabamo abantu.

Aho bajya kurara bicamo amatsinda aho rimwe riba rigizwe n’abantu babiri cyangwa batatu, batinya ko Polisi ishobora kuza ikabafatira rimwe.

Sebutege Ange uyobora akarere ka Huye avuga ko akarere ayoboye kagiye gucyemura ikibazo cy'abana b'inzererezi bugihereye mu mizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .