Akarere ka Gatsibo katangiye guterera urutoki abaturage bo mu Cyiciro cya mbere cy’Ubudehe

Yanditswe na IGIHE
Kuya 21 Ugushyingo 2019 saa 09:58
Yasuwe :
0 0

Abaturage batishoboye bo mu mirenge itandukanye yo mu Karere ka Gatsibo babarizwa mu Cyiciro cya Mbere n’icya Kabiri cy’Ubudehe bafite urutoki rudatanga umusaruro uhagije, bari gufashwa n’ubuyobozi kuruvugurura, abatarufite bagahabwa insina n’ifumbire bakanafashwa kurutera mu buryo bugezweho.

Ubuyobozi bwa Gatsibo buvuga ko iki cyemezo bwagifashe nyuma yo kubona ko ubuhinzi bw’urutoki buri mu bikura abantu mu bukene kandi vuba.

Abaturage bashima ubuyobozi bwatekereje kubafasha kuvugurura intoki zabo kuko ubusanzwe nabo bajyaga babyifuza ariko bakabura ubushobozi bwo kugura imbuto y’insina n’ifumbire y’imborera.

Nyirahabimana Vanessa utuye mu Kagari ka Nyagitabire mu Murenge wa Nyagihanga yavuze ko ubuyobozi bw’akarere bwamuhaye ifumbire y’imborera bukanamuterera imibyare 158.

Yashimangiye ko umusaruro azakura ku nsina yaterewe uzamufasha kwiteza imbere.

Yakomeje agira ati “Uru rutoki ruzamfasha cyane kuko nirwera najya ntema igitoki nkigurishe mbonemo amafaranga yo kugura umunyu, isabuni n’ibindi. Urumva ko nzajya mbona ifunguro mu buryo butangoye, ikindi kandi nzajya nanizigama kugira ngo nzasaze neza.”

Musabyimana Hamada utuye mu Murenge wa Kiziguro mu Kagari ka Rubona wahawe insina 78 n’ifumbire akanafashwa no kuzitera, yavuze ko ubusanzwe yari afite urutoki rutamuha umusaruro ariko kuba yafashijwe kuruvugurura aziteza imbere.

Mu ntego yihaye harimo kwitangira ubwisungane mu kwivuza, kwishyurira amashuri no kubona ibyo kurya bihagije.

Umuyobozi w’Akarere ka Gatsibo wungirije ushinzwe Iterambere ry’Ubukungu, Manzi Théogène, yavuze ko iki gikorwa kizatuma abantu bari mu Cyiciro cya Mbere biteza imbere byihuse.

Yagize ati “Mu karere twafashe umwanzuro wo gufata abantu bacu bari mu cyiciro cya mbere bafite ubutaka, tugafatanya nabo tukavugurura urutoki rwabo kuko twabonye ko biri mu byazamura ubushobozi bwabo kandi vuba. Iyo tubafasha kuvugurura dufatanya n’abafashamyumvire bafite intoki za kijyambere tugaha abatishoboye insina zo kutera, tukabaha ifumbire ndetse tukanaberekera uko batera imibyare mu buryo bwa kijyambere.”

Ubuyobozi bw’Akarere ka Gatsibo buvuga ko ubusanzwe abaturage bari mu Cyiciro cya mbere bajyaga bahabwa na Leta ubufasha butandukanye ndetse kubafasha kuvugurura urutoki ni imwe mu nzira izabafasha gutera imbere mu byihuse.

Abayobozi mu nzego zitandukanye bafatanyije n'ingabo z'u Rwanda mu gucukura imyobo yashyizwemo insina
Akarere ka Gatsibo katangiye guterera urutoki abaturage bo mu Cyiciro cya mbere cy’Ubudehe
Abaturage bafite intoki zishaje bafashijwe kuzisazura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza