Agahinda k’umuryango umaze amezi arindwi usaba umurambo w’umunyarwanda wishwe n’iyicarubozo muri Uganda

Yanditswe na IGIHE
Kuya 3 Nzeri 2020 saa 12:01
Yasuwe :
0 0

Hashize amezi arindwi bivuzwe ko umunyarwanda witwa Emmanuel Mageza yaguye muri Uganda mu bitaro bya Butabika nyuma y’iyicarubozo rikomeye yakorewe n’inzego z’umutekano mu gisirikare cy’iki gihugu, kugeza ubu umuryango we ukomeje gutakamba usaba ko wahabwa umurambo w’umuntu wawo kugira ngo ashyingurwe mu gihugu ariko byabaye iby’ubusa.

Mageza ni umwe mu banyarwanda bakorewe iyicarubozo n’inzego z’umutekano muri Uganda, zikamusiga ari intere. Kubera ibyo bikorwa bya kinyamaswa, ubuzima bwe bwagiye mu kaga, arwarira mu mabohero ya CMI, yaje gukurwa mu nzu y’ibohero yarimo, ajugunwa ku marembo y’ibitaro by’abarwayi bo mu mutwe muri Uganda bya Butabika, aho yaje gusangwa yapfuye. Ubu umuryango we ukomeje gusaba ko nibura wabona umurambo we agashyingurwa mu cyubahiro.

Françoise Kagoyire na Safari, ni abavandimwe ba Mageza. Babayeho mu buribwe bukomeye bwo kutabona umurambo w’umuvandimwe wabo, bizera ko umunsi umwe Uganda izawubagezaho.

Kagoyire ati “Twizera ko umunsi umwe tuzasezera bwa nyuma ku muvandimwe wacu, ubuyobozi bw’igihugu cyacu ntibwahwemye kuduha ubufasha bwose dukeneye binyuze mu busabe buha igihugu cy’igituranyi.”

U Rwanda rwasabye Uganda ko umurambo wa Mageza woherezwa mu gihugu agashyingurwa mu cyubahiro n’umuryango we, ndetse rusaba ko iki gihugu gitanga ibisobanuro mpamvu z’urupfu rwe. Gusa Uganda ntacyo yigeze ivuga ku busabe bwatanzwe n’u Rwanda.

Mageza ubwo yafatwaga n’Urwego rushinzwe Iperereza mu Gisirikare cya Uganda, CMI, yari akuwe mu modoka mu Mujyi wa Mbarara. Icyo gihe hari muri Mutarama umwaka ushize.

Yahise ajya gufungirwa muri gereza ya Gisirikare ya Makenke mu Mujyi wa Mbarara hirengagijwe ibiteganywa n’amategeko ku muntu utawe muri yombi.

Yoherejwe muri Gereza ya Mbuya, bikorwa hirengagijwe uburenganzira bwe bwo kugezwa imbere y’amategeko no kunganirwa. Ubwo yari aho i Mbuya, ni umwe mu banyarwanda bahafungiwe bakorwa ibikorwa by’iyicarubozo na CMI.

Bivugwa ko Mageza yangiritse bikomeye kubera iyicarubozo yakorewe, binyuzwe mu gukubitishwa amashanyarazi, kudubikwa mu mazi ku buryo ananirwa guhumeka, gukubitwa n’ibindi byinshi byari bigamije kumwemeza ko ari intasi iri ku butaka bwa Uganda.

Ubuhamya bwagiye butangwa n’abandi bakorewe bene ubu bwoko bw’iyicarubozo, bavuze ko bafungiwe hamwe kugeza ubwo byageze aho Mageza we abura ubwenge.

Umunyamategeko Eron Kiiza wunganira benshi mu banyarwanda bakorewe iyicarubozo muri Uganda, amaze amezi arenga icumi asaba inkiko za gisirikare muri iki gihugu ibisobanuro ku mpamvu abakiliya be bafungwa mu buryo bunyuranyije n’amategeko hakirengagizwa n’uburenganzira bemererwa.

Ku wa 31 Mutarama 2020, iminsi mike mbere y’urupfu rwa Mageza, Eron Kiiza, yasabye Urukiko Rukuru rwa Kampala, ko umukiliya we yagezwa imbere y’urukiko. Gusa nta rukiko na rumwe rwigeze rubitegeka cyangwa ngo rusubize ubusabe bw’uyu munyamategeko.

Ibinyamakuru byo muri Uganda byavuze ko Mageza yapfuye kuwa 08 Gashyantare, gusa Guverinoma y’u Rwanda ntiyigeze ibimenyeshwa.

Agahinda ni kose ku muryango wa Mageza ukomeje gutakamba ngo ubone umurambo w'umuvandimwe wawo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .