Afurika y’Epfo yemeye gufata umwe mu bantu umunani bashinjwa uruhare rukomeye muri Jenoside

Yanditswe na IGIHE
Kuya 13 Ukuboza 2019 saa 09:11
Yasuwe :
0 0

Umushinjacyaha Mukuru w’Urwego rwasigariyeho Urukiko Mpuzamahanga rwashyiriweho u Rwanda (ICTR), MICT, Dr Serge Brammertz, yatangaje ko Afurika y’Epfo yasohoye impapuro zita muri yombi umwe mu bantu umunani bashinjwa uruhare rukomeye mu mugambi wa Jenoside yakorewe Abatutsi mu 1994.

Ku wa Gatatu tariki 11 Ukuboza nibwo Dr Brammertz yari imbere y’akanama k’Umuryango w’Abibumbye gashinzwe umutekano, akagezaho ibikorwa by’uru rwego.

Mu kiganiro bagiranye, yanagejeje kuri aka kanama intambwe imaze guterwa mu gukurikirana abantu umunani bashakishwa n’uru rwego, bakorewe Inyandiko z’ibirego n’Urukiko Mpanabyaha Mpuzamahanga Rwashyiriweho u Rwanda.

Abo ni Kabuga Félicien, Mpiranya Protais, Bizimana Augustin, Kayishema Fulgence, Munyarugarama Pheneas, Ndimbati Aloys, Sikubwabo Charles na Ryandikayo Charles, bagishakishwa bikekwa ko bihishe mu bihugu bitandukanye.

Ni abantu Leta Zunze Ubumwe za Ameriza zemeye gutanga miliyoni eshanu z’amadolari ku muntu uzatanga amakuru yatuma bafatwa.

Dr Brammertz yagize ati “N’ubwo bibabaje bwose, ni ngombwa kubabwira ko hari ibihugu bigize Umuryango w’Abibumbye bitadufasha uko tubyifuza”.

Yahise avuga ko nyuma yo kumenyeshwa muri Kanama 2018 ko umwe mu bashakishwa ari ku butaka bwayo, Afurika y’Epfo itigeze imufata. Gusa yavuze ko hari amakuru ko noneho mu cyumweru gishize icyo gihugu cyatanze urwandiko rwo gufata uwo muntu kugira ngo rushyirwe mu bikorwa, nubwo atavuze amazina ye.

Yakomeje ati "Kuri iyi ntera tugezeho, icyanezeza abantu bakorewe ibyaha ndetse n’iyi Nama ni uko ushakishwa yahita atabwa muri yombi”.

Dr Brammertz yavuze ko ku bandi, mu gihe urwego rw’Ubushinjacyacyaha rugikusanya amakuru y’iperereza, hari amakuru y’ingenzi aba akenewe ariko adatangwa n’ibihugu bigize Umuryango w’Abibumbye, ku buryo Ubushinjacyaha butoroherezwa kugera ku bantu n’amakuru bukeneye.

Yakomeje ati "Iyi Nama yasabye kenshi ibihugu bigize Umuryango w’Abibumbye ubufatanye bwose bukenewe mu bikorwa byo gushakisha abakekwaho ibyaha batarafatwa. Ikibabaje ariko ni uko ubwo butumwa butitabwaho n’ibihugu bimwe na bimwe”.

U Rwanda rusaba ibihugu kudaha icyuho abicanyi

Mu butumwa aheruka gutanga mu gihe hizihizwa ku nshuro ya 71 amasezerano mpuzamahanga yo gukumira no guhana icyaha cya jenoside, Umunyamabanga Nshingwabikorwa wa Komisiyo y’igihugu yo kurwanya Jenoside, Dr Bizimana Jean Damascene, yavuze ko hari ibihugu bikomeje gukingira ikibaba abakoze Jenoside.

Gusa yashimangiye ko u Rwanda ruzakomeza gushyigikira ibikorwa n’ingamba bigamije kurwanya Jenoside n’ingengabitekerezo yayo aho ariho hose ku isi no guteza imbere indangagaciro zubaha ubuzima n’ikiremwamuntu muri rusange nk’uko rwabigaragaje rwakira impunzi z’Abanyafurika bavanywe muri Libya.

Ati “Komisiyo y’Igihugu yo Kurwanya Jenoside iributsa ibihugu bicumbikiye abicanyi bagize uruhare muri Jenoside yakorewe Abatutsi ko bikwiye kubahiriza amategeko mpuzamahanga bikabacira imanza cyangwa bikabohereza mu Rwanda. Kugeza ubu u Rwanda rumaze kohereza impapuro 1144 zishakisha abakoze Jenoside bari mu mahanga.”

“Komisiyo y’Igihugu yo Kurwanya Jenoside irasaba kandi ibihugu byose biha urubuga abapfobya n’abahakana Jenoside yakorewe Abatutsi, cyane cyane bimwe mu bihugu by’i Burayi, ko bikwiye kubahiriza Icyemezo n°2150 bigahana abo bantu.”

Biteganywa ko nibafatwa, batatu bazaburanishwa na MICT aribo Félicien Kabuga, Protais Mpiranya, Augustin Bizimana naho abandi batanu bakazaburanishwa n’u Rwanda ari bo Fulgence Kayishema, Charles Sikubwabo, Aloys Ndimbati, Ryandikayo na Phénéas Munyarugarama.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .