00:00:00 IGIHE NETWORK KN KINYARWANDA EN ENGLISH FR FRANCAIS

Afurika ntiyakwikorera umutwaro yonyine- Perezida Kagame ku gukwirakwiza ingufu z’amashanyarazi zidahumanya ikirere

Yanditswe na Akayezu Jean de Dieu
Kuya 17 May 2022 saa 03:17
Yasuwe :

Perezida Kagame yavuze ko kugira ngo abatuye Isi bose bagerweho n’ingufu zirimo iz’amashanyarazi kandi zidahumanya ikirere, hakenewe ubufatanye no kongera inkunga igenerwa ibikorwa byo gutunganya amashanyarazi menshi kandi atangiza ikirere cyangwa ngo agire ingaruka mu mihindagurikire y’ibihe.

Umukuru w’Igihugu yabibwiye Isi yose n’abitabiriye Inama Mpuzamahanga yiga ku kurebera hamwe Ishyirwa mu bikorwa rya gahunda zashyizweho mu kugeza ku baturage bose Ingufu zirambye kandi zitangiza Ibidukikije [Sustainable Energy for All Forum].

Iyi nama ya 10, ibereye muri Afurika ku nshuro ya mbere yahuje abarenga 2000 barimo abateraniye i Kigali, mu gihe abandi bayitabiriye hifashishijwe ikoranabuhanga.

Barimo abayobozi baturutse muri za Guverinoma zo hirya no hino ku Isi, abikorera mu rwego rw’ingufu, ibigo by’iterambere mu gukwirakwiza amashanyarazi, sosiyete sivile, abahagarariye urubyiruko n’abandi.

Perezida Kagame yavuze ko n’ubwo hari intambwe yatewe mu kugeza ingufu kuri bose, hakiri icyuho cy’uko abarenga miliyoni 500 muri Afurika, batagerwaho n’amashanyarazi.

Ati “Mu binyecumi by’imyaka byashize, hari intambwe ntagereranywa yatewe mu kugera ku nkingi ya karindwi mu Ntego z’Iterambere rirambye [SDGs] ku kugeza kuri bose Ingufu zihendutse kandi zidahumanya ikirere n’ubwo icyorezo cya Covid-19 cyakomye mu nkokora iyo ntambwe yari imaze guterwa.”

“Uyu munsi muri Afurika, abaturage kimwe cya kabiri cya miliyari ntibagerwaho n’amashanyarazi. Iki kibazo cyo kubura kw’ingufu kinajyana n’ibibazo by’imihindagurikire y’ibihe.”

Umukuru w’Igihugu yavuze ko kugira ngo Afurika ibashe kuziba icyo cyuho cy’abatagerwaho n’amashanyarazi, hagomba gushyirwaho uburyo bwo korohereza ishoramari ryo muri uru rwego rwo gukwirakwiza ingufu kugira ngo zigere kuri benshi nk’uko biteganywa n’intego z’iterambere rirambye.

Ati “Guhindura tugakoresha ingufu zisubira ni ingenzi, ni yo mpamvu gushyiraho uburyo bwo gukurura abashoramari mu ngufu zirambye ari ingirakamaro.”

Perezida Kagame yavuze ko kubera ko gukwirakwiza ingufu bigomba kujyana n’ingamba zo kurinda iyangirika ry’ikirere, ibihugu bikize bigomba gutanga inkunga muri urwo rugamba kuko ari byo byohereza imyuka myinshi ihumanya ikirere.

Ati “Muri uko kwinjiza iby’ingufu zirambye muri gahunda yo kuzahura ubukungu nyuma y’icyorezo cya Covid-19, dushobora kwihutisha ibijyanye no kwimukira ku gukoresha ingufu zisubira zitangiza ibidukikije ariko ibyo bigakorwa neza nta busumbane.”

Yakomeje ati “Ibyo bivuze ko hagomba kwitabwa ku cyerekezo cy’iterambere Afurika ishyize imbere kugira ngo hatagira n’umwe usigara inyuma. Ni na ko kandi ibihugu bikize bigomba kongera inkunga bigenera ibikorwa byo guhangana n’imihindagurikire y’ibihe mu murongo w’amasezerano mpuzamahanga.”

Ishami ry’Umuryango w’Abibumbye ryita ku Bidukikije, UNEP, ryerekana ko nibura 80% ry’imyuka yangiza ikirere yoherezwa n’ibihugu bikize. Ni ibintu bigira ingaruka ku bihugu biri mu nzira y’amajyambere.

Aha ni ho Perezida Kagame yahereye avuga ko Afurika idakwiye kwikorera umutwaro yonyine kuko n’imyuka ihumanya ikirere usanga ahanini byoherezwa n’ibihugu bikize.

Ati “Afurika ntiyakwikorera uwo mutwaro yonyine kubera ko imyuka yohereza mu kirere atari yo yatumye habaho imihindagurikire y’ibihe. Ariko nanone uko byamera kose Afurika iri mu bagomba gushaka igisubizo.”

Nibura abagera kuri miliyoni 800 ku Isi ntibagerwaho n’amashanyarazi, benshi ni abo muri Afurika.

Nibura abagera kuri miliyari 2,5 biganje muri Afurika na Aziya ntibagerwaho n’ingufu zifashishwa mu guteka ariko zitangiza ibidukikije.

Umunyamabanga Mukuru w’Umuryango w’Abibumbye, António Guterres, yavuze ko hakenewe ingamba zihariye kugira ngo Isi izabashe kugera ku ntego z’Icyerekezo 2030, ziteganya ko abaturage bose b’Isi [100%] bazaba bagerwaho n’amashanyarazi.

Ati “Kuziba icyuho cyo kugeza ingufu kuri bose ni ingenzi kugira ngo tubashe kugera ku ntego zose z’icyerekezo 2030. Ni ibintu bigomba no kujyana no gukumira ibihumanya ikirere.”

Iyi nama yiga ku kugeza ingufu kuri bose yabaye mu gihe u Rwanda rumaze kugera ku kigero cya 69,8% cy’abaturage bagerwaho n’umuriro waba ukomoka ku mashanyarazi n’izindi ngufu zirimo imirasire y’izuba.

Perezida Kagame yavuze ko Afurika idakwiye kwikorera yonyine umutwaro w'ingaruka z'imihindagurikire y'ibihe
Minisitiri w'Ibikorwaremezo, Dr Nsabimana Ernest, yavuze ko kugeza ubu abaturage benshi biganjemo abo muri Afurika batagerwaho n'amashanyarazi
Intumwa yihariye y’Umunyamabanga Mukuru wa Loni akaba n’Umuyobozi wa Sustainable Energy for All, Damilola Ogunbiyi, yasabye kwihutisha ikwirakwizwa ry'ingufu kuri bose
Abarenga 1500 ni bo bateraniye i Kigali muri iyi nama mu gihe hari n'abandi bayikurikiye bifashishije ikoranabuhanga
Minisitiri ufite Ingufu mu nshingano muri Ghana, Dr. Matthew Opoku Prempeh, ni umwe mu bitabiriye Inama ya SEforALL iri kubera i Kigali
Minisitiri w'Ibikorwaremezo, Dr Nsabimana Ernest, yagaragaje ko hari intambwe ikomeye u Rwanda rumaze gutera mu gukwirakwiza amashanyarazi
Abitabiriye iyi nama baganiriye no ku zindi ngingo zitandukanye
Abageze i Kigali mu nama iganira kuri gahunda zo gukwirakwiza Ingufu zikagera kuri bose na bo ubwabo babonye umwanya wo kuganira
Minisitiri w'Ikoranabuhanga na Inovasiyo, Ingabire Paula aganira na Minisitiri w'Ibikorwaremezo, Dr Nsabimana Ernest mbere y'uko inama itangira
Iyi nama yitabiriwe n'ab'ingeri zose baturutse hirya no hino ku Isi
Perezida Kagame yafashe ifoto n'abitabiriye iyi nama ya SEforAll. Ni iya mbere yo kuri uru rwego yabereye muri Afurika

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .