Afurika izaba iruhira ubusa nidashora imari mu baturage bayo- Perezida Kagame

Yanditswe na Ferdinand Maniraguha
Kuya 13 Gashyantare 2019 saa 03:15
Yasuwe :
0 0

Perezida Paul Kagame yavuze ko ntacyo Afurika izabasha kugeraho nidashyira hamwe ngo ishore imari mu kubakira ubushobozi abaturage bayo ku buryo babasha guhangana ku rwego mpuzamahanga.

Yabitangaje kuri uyu wa Gatatu i Abu Dhabi muri Leta Zunze Ubumwe z’Abarabu, mu nama yiswe Milken East and North Africa yateguwe n’Umuryango wo muri Amerika, Milken Institute, ugamije gukora ubushakashatsi no gutanga ubujyanama ku guhanga udushya mu bukungu bugamije gukemura ibibazo byugarije abaturage.

Perezida Kagame wari kumwe na Michael Milken washinze uwo muryango, yavuze ko Afurika yagiriwe ubuntu mu buryo bwose kuko ifite umutungo kamere ariko bikaba ikibazo uburyo ari wo mugabane ukennye cyane.

Ati “Iyo urebye umusaruro mbumbe wa Afurika, birakuyobera kandi uzi neza ubushobozi bwayo.Ikibazo cyakomeje kwibazwa kuri Afurika, ni uburyo ushobora kuba umukire ukaba n’umukene icya rimwe.”

Icyakora yavuze ko ayo mateka mabi umugabane wa Afurika ufite yatangiye kuvugutirwa umuti binyuze mu muryango wa Afurika Yunze Ubumwe (AU).

Yatanze urugero rw’amavugurura uwo muryango watangije mu 2016 akanahabwa kuyayobora, hakemezwa ko kugira ngo Afurika igere ku ntego zayo hakwiriye gushyiraho isoko rusange ibicuruzwa bigatemberezwa, abantu bagahahirana.

Ati “Dushyize hamwe, tukagerageza uko dushoboye tugatesha agaciro iriya mipaka igabanya ibihugu 55, tugahera ku bucuruzi, urujya n’uruza rw’abantu n’ibicuruzwa ku mipaka yacu, twahindura ubukungu bwacu.”

Yavuze ko ntacyo Afurika yageraho itabanje kwikuramo ko kubaho kwayo gushingiye ku banyamahanga.

Yavuze ko ariho havuye umwanzuro washyizwe mu mavugurura ya AU, w’uko Afurika yishakamo inkunga yo gukora ibikorwa by’uwo muryango byaterwaga inkunga n’amahanga ku kigero cya 80 %.

Mu kwishakamo iyo nkunga, hemejwe ko buri gihugu gitanga 0.2 % by’imisoro iva ku bicuruzwa byo mu mahanga byakinjiyemo.

Nubwo Afurika iri mu nzira nziza, Perezida Kagame yavuze ko bitazagerwaho mu gihe ubuyobozi budashyize ingufu mu kubakira ubushobozi abaturage.

Ati “Tugomba gushora imari mu baturage bacu no mu bihugu byacu dukoresheje umutungo kamere. Bizaba ari ukuruhira ubusa nihadashorwa imari mu baturage.”

Yavuze ko urebye neza ubumenyi n’ikoranabuhanga ari nabyo iterambere ry’Isi rishingiyeho, bitangiye gusaranganywa neza mu bice byose by’isi.
Perezida Kagame asanga ayo ari amahirwe ku bihugu, yo gufasha abaturage kumenya ibiri gutuma Isi itera imbere kugira ngo nabo babyige batange umusaruro.

Ati “Mu gihe urubyiruko rwawe rwigishijwe, rukagira ubuzima bwiza nta kabuza bazabasha gukora ibyo abandi bakora. Nibwo uzababona mu bice bitandukanye by’Isi bakora ibyo Afurika ikeneye.”

Ishami ry’Umuryango w’Abibumbye ryita ku bumenyi n’umuco (UNESCO) mu 2015 ryagaragaje ko 38 % by’abafite imyaka y’ubukure muri Afurika batazi gusoma no kwandika mu gihe 22 % by’abana bagejeje igihe cyo kwiga batajyanwa ku ishuri.

Ibyo akenshi biterwa n’imibereho mibi, ubukene no kutagezwaho ibikorwa remezo.

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza