Afurika itagira umupaka, ururimi rumwe n’ingamba ku bisigisigi by’abakoloni: Ikiganiro na Musoni Protais

Yanditswe na Ferdinand Maniraguha
Kuya 23 Nzeri 2018 saa 10:35
Yasuwe :
0 0

Imyaka igiye kuba 60 hafi ibihugu byose bya Afurika bibonye ubwigenge.

Nubwo abanyaburayi bagiye mu biboneshwa amaso, ibitekerezo byabo byarasigaye ndetse hari aho biyoboye kugeza n’uyu munsi.

Kuva mu mwaka wa 2016 kugeza muri Nyakanga 2018, Umuryango mpuzamahanga wita ku bimukira (IOM) ugaragaza ko abanyafurika 16800 bamaze gupfa barohamye mu Nyanja ya Méditerranée, bagiye gushaka ubuzima bwiza i Burayi.

Afurika iracyafite imikorere iri mu nyungu z’abanyaburayi.

Ibihugu biyigize ariko bigerageza kwisuganya ngo haboneke impinduka, kimwe mu byakozwe ni amasezerano yasinyiwe i Kigali muri uyu mwaka, agamije koroshya ubuhahirane nubwo hataraboneka ibihugu 22 biyemeza burundu ngo atangire gushyirwa mu bikorwa.

IGIHE yagiranye ikiganiro na Musoni Protais, Umuyobozi w’Umuryango ugamije kubohora Afurika (Pan African Movement, PAM) Ishami ry’u Rwanda, asobanura byimbitse imbogamizi zigihari ngo Afurika ibohorwe bya nyabyo n’icyakorwa.

IGIHE: Kuki gushyira hamwe muri Afurika bikgorana nyuma y’imyaka 60 ibonye ubwigenge?

Musoni: Iyo ugize imyaka myinshi y’ubukoloni, abantu bakubwira ko utari nka bo iherezo na we bikujyamo ko utari nka bo. Bakubwira bati ‘ibyawe ni bibi’ ukabona koko ni bibi. Bakubwira ngo ‘ibyacu ni byiza’ ugahora utekereza koko ko ari byo.

Nubwo abanyafurika twagize ubwigenge, ibisigisigi by’ubukoloni byatugumyemo kandi ntibyavamo uwo munsi. Badukuye ku myemerere yacu baduha imyemerere yabo, badukura ku ndimi zacu tujya ku ndimi zabo.

IGIHE: Ni ukuvuga ko Afurika izashyira hamwe nigira ururimi rumwe?

Musoni: Burya rero iyo wiga mu rurimi runaka n’imitekerereze igendana nabyo ndetse n’ibyo urwo rurimi rusingiza ko ari byiza nawe utwara ko aribyo byiza.

Ururimi ni igicumbi cy’umuco. Mu rurimi niho usangamo indangaciro, niho usangamo kirazira. Iyo muhuje ururimi muba muhuje n’ubumwe, niyo mpamvu muri Afurika usanga dufite ibibazo ngo twe dukoresha Icyongereza, Igifaransa, […] abo bahuje urwo rurimi bumva bafitanye isano.

Rumwe mu ngamba tugomba kurwana ni ukugira ngo iherezo duhe agaciro indimi tuvukana ariko tuzagire n’igihe tugira indimi nyafurika zigenda ziduhuza, nibura indimi ebyiri. Ni intambara tuzarwana kugeza igihe tuzavuga ngo dore ururimi twakoresha.

IGIHE: Ariko bamwe mu bayobora Afurika nabo bashobora kuba batabyumva?

Musoni: Nibyo ubu turacyafite bamwe baba baragiye ku buyobozi bataraba Pan africanists [badafite Afurika ku mutima] nicyo kibazo. […] gusa ntawe udahinduka, nabo bashobora kuzagira igihe bagahura n’ababahindura kubw’inyungu zabo ariko iherezo zikaba inyungu za twese.

Abaturage bisuganyije, bati ‘twe turashaka ibi’, iherezo umuyobozi aravuga ati ‘nzakora ibyo abaturage bashaka nintabikora ejo sinzatorwa’.

IGIHE: Abo muvuga ko Afurika ikwiye kwigaranzura nabo bafite ingufu, mukeka ko bizoroha?

Musoni: Niba umuntu yabanyunyuzaga mukishyira hamwe, ntabwo azabemerera atyo.

Gushyira hamwe murabizi bizana ubukire ntawe utabizi ariko hari ubwo undi aba atabishaka. Aho kugira ngo aze aganira ubucuruzi na EAC ifite abaturage basaga miliyoni 200, ati ‘reka nihererane u Rwanda rufite miliyoni icumi cyangwa u Burundi, ahubwo ninkorana n’u Burundi mbuteranye n’u Rwanda, mbuteranye na Uganda kugira ngo ya micururuize twashakaga ngo twaguke [ntigerweho], dukomeze tureba iby’iwabo gusa.

Ibuye ryagaragaye ntiryica isuka. Nitubiganira tukabimenya, ahasigaye azaba ari twe. Nibitunanira ntabwo tuzabeshyera wa wundi ngo ni we wabiduteye, bizaba ari ububwa bwacu.

IGIHE: Hari urubyiruko rwumva ko politiki ari iy’abakuze, bizashoboka kwishyira hamwe rutabyumva?

Musoni: Urubyiruko rufite ibishuko byinshi. Aho internet yaziye gufata imico y’ahandi biroroshye ariko mbona arirwo ruzahaguruka kuko nirwo ruhura n’ibyo bibazo kurusha twe abakuru.

Bariya bashiriye muri Méditerranée bavuga ngo ibyiza biri i Burayi reka tubisangeyo, abandi bakwiriye kuvuga ngo ‘Kuki najya gupfa ngiye mu byo abandi bakoze neza, kuki tudahuza imbaraga ngo dukore ibyacu byiza?

Iteka iyo hari ibyo udashimye, aho kubihunga ushaka uko wabikemura.

IGIHE: Ese muri uko kwishakamo ibusubizo, Afurika yifitemo ubushobozi?

Musoni: Hari aho twanabarusha dukoresheje ubwenge abakurambere bacu bari bazi. Nk’imiti aba kera bakoreshaga uzasanga abazungu batayizi. Tuyigarutseho umuntu akayigira neza twagira imiti itandukanye.

Uruhererekane rw’ubumenyi mu banyarwanda rukwiriye kubaho, twe kujugunya ngo ni ibishenzi. Ugasanga aho gukoresha ibyo dufite, tugiye kugura ibyo tudafite.

IGIHE: Mu ntego za PAM harimo kugira Afurika imwe, nk’igihugu kimwe. Ibi byo bizashoboka?

Musoni: Nk’ariya masezerano yasinyiwe i Kigali, aho bavuga ngo ucuruze aho ushatse, umunsi umupaka uri hagati ya Uganda n’u Rwanda utazajya mu mutwe wawe, ukambuka igihe ushakiye ukagaruka igihe ushakiye, umupaka uzaba ugenda uvaho.

Umupaka nimuwukuraho mu mitwe, amategeko azakurikiraho abikureho. Niyo nzira yafashwe.

Pan African Movement ishami ry’u Rwanda ifite inteko rusange kuri iki cyumweru tariki 23 Nzeri 2018, ahaganirwa ku byo yagezeho mu myaka itatu ishize n’ibiteganyijwe mu myaka iri imbere.

Umuyobozi wa Pan African Movement Ishami ry'u Rwanda, Protais Musoni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza