“Africa Youth Expect” ya kabiri igiye kuba harebwa uruhare rw’ikoranabuhanga mu iterambere rya Afurika

Yanditswe na Uwimana Abraham
Kuya 22 Mutarama 2021 saa 09:21
Yasuwe :
0 0

Umuryango uharanira Ubwigenge, Agaciro n’Iterambere bya Afurika (Pan African Movement, PAM) Ishami ry’u Rwanda, yateguye ku nshuro ya kabiri inama ihuriza hamwe urubyiruko rwo mu bihugu bitandukanye bya Afurika n’inararibonye zo kuri uyu mugabane, hagamijwe kuzamura ubushobozi bw’urubyiruko no kurukangurira kugira uruhare mu iterambere rya Afurika.

“Africa Youth Expect” igiye kuba ku nshuro ya kabiri, izaba hifashishijwe ikoranabuhanga (Webinar), ku wa 23 Mutarama 2021, ikazitabirwa n’urubyiruko rwo hirya no hino muri Afurika. Ifite insanganyamatsiko igira iti “Umumaro w’ikoranabuhanga na inovasiyo mu kubaka Afurika twifuza.”

Iyi nama izatangwamo ibiganiro n’abatumirwa batandukanye bo mu bihugu bigera kuri 13 byo muri Afurika y’Iburasirazuba, ikazanitabirwa kandi na Minisitiri w’Ikoranabuhanga na Inovasiyo w’u Rwanda, Ingabire Paula, na we uzatangamo ikiganiro, ndetse hazaba hari n’intumwa z’Umuryango wa Afurika Yunze Ubumwe.

Umuyobozi wa PAM Rwanda, Musoni Protais, yavuze ko ibi biganiro bizahuza urubyiruko n’abandi b’inararibonye, barugire inama hagamjwe ahanini kuzamura ubushobozi bw’urubyiruko rwo muri Afurika kugira ngo ruzashobore gufasha Afurika kugera ku cyerekezo yihaye cya 2063.

Yagize ati “Urubyiruko rufite inshingano zo kugira ngo rutegure koko iyo myaka tuzayigeramo ibyo twifuza kugeraho twarabigezeho, hashakishwa uburyo izo ndoto zakuzuzwa kugira ngo buri muntu wese azigenderemo no gukora “network” zituma abantu bigira ku bandi, bati iwacu tubigenza dutya, abandi bati kuki tutabyigiraho, bityo tukubaka Afurika twifuza.”

Yongeyeho ati “Urubyiruko ubundi rurangwa n’imbaraga, rukaba rushishikazwa iteka no gushaka ubundi buryo bwo gukora ibintu bidasanzwe, rutavuga ngo ibi nibyo twamenyereye; kandi birumvikana ko iyo abantu bakora ibyo ngibyo, nibo bazana impinduramatwara nyakuri.”

Yavuze ko mu kugira ngo ibyo byose bizagerweho, ari yo mpamvu bahuriza urubyiruko hamwe, bakarutumirira abantu batandukanye barushishikariza banarwumvisha icyerekezo Afurika ishaka kugeraho n’uruhare rwagira ngo kigerweho.

Ati “Ibyo rero birasaba gushishikariza urubyiruko kugira ubushake bwo kumva icyerekezo cyacu dushaka kugeraho, kuko burya ubushake niryo shingiro ry’ibindi byose, umuntu akumva ko bimureba, akumva ko agomba kubyigomwa, kuko utavuze uti byanze bikunze ngiye gushaka imbaraga zo kubigeraho, nzishakemo, nzishake no mu bandi, ntabwo icyo gihe bishobora kuba byagerwaho.”

Abatumiwe kuzatanga ibiganiro muri iyi nama, baturuka mu bihugu 13 byo mu Burasirazuba bwa Afurika birimo Mozambique, Tanzania, Kenya, Burundi, Zimbabwe, Malawi, Zambia, Ethiopia, Mauritius, Uganda ndetse n’u Rwanda, hakazaba harimo n’intumwa zizaturuka mu Muryango wa Afurika Yunze Ubumwe.

Komiseri w’Urubyiruko muri PAM Rwanda, Shyaka Michael Nyarwaya, yavuze ko batumiye abantu bafite ubumenyi mu ngeri zitandukanye kugira ngo bumvishe urubyiruko ko buri wese mu cyiciro abarizwamo no mu kazi akora akwiye kubikoresha mu cyerekezo cy’iterambere rya Afurika.

Yagize ati “Turashaka kubaka urubyiruko mu ngeri [domain] zitandukanye, urebye abantu twatumiye harimo abantu bafite ubumenyi butandukanye mu byiciro babarizwamo, banafite inyota yo gufasha urubyiruko, ibyo bazatuganiriza rero bizadufasha kubaka Afurika twifuza, buri wese mu cyiciro arimo.”

“Turifuza kugira ngo ibyo tubyubakireho, abakiri bato bazakure babizi, naba ashaka kuzatwara indege ayitware ariko afite iyo umwuka wa Pan Africanism, niba akora imodoka ayikore afite umwuka wa Pan Africanism, niba ashaka kuba umunyapolitiki, azabe umunyapolitiki wifitemo gukunda Afurika no kuyishakira ibyiza.”

“Africa Youth Expect” igiye kuba ku nshuro ya kabiri, yakurikiye iya mbere yabaye mu Ukuboza 2020 yibanze ahanini mu bihugu byo mu Burengerazuba bwa Afurika, mu gihe iyi izibanda ku bihugu byo mu Burasirazuba, hakazakurikiraho izabera mu Majyepfo muri Gashyantare, mu Majyaruguru muri Werurwe no muri Afurika yo Hagati muri Mata 2021.

Iyi nama izaba hifashishijwe ikoranabuhanga ku wa Gatandatu, izatangira saa Cyenda z’amanywa kugeza saa Kumi n’ebyiri z’umugoroba, ikaba yaratumiwemo urubyiruko rwose rwa Afurika ruri muri Pan African Movement mu bihugu byabo, abahagarariye Inama Nkuru z’Urubyiruko mu bihugu byabo, urw’Abanyafurika rwiteje imbere n’abandi.

Pan African Movement ivuga ko kuva aho yatangiriye gutegura iyi nama ya “Africa Youth Expect”, byagaragaye ko imyumvire y’urubyiruko igenda ihinduka, rukabaho rutekereza ruti “Ubundi Afurika integerejeho iki?” ibintu bituma rushishikarira gukora cyane rufite intumbero yo guteza imbere Afurika.

Ikindi kandi ngo ni uko bituma hubakwa isangano rihuriwemo n’abaturuka mu bihugu bitandukanye bya Afurika, bigatuma bahuriza ku cyerekezo kimwe n’intumbero imwe, ibyo bikazatuma ahazaza Afurika izagira abayobozi bareba icyerekezo kimwe bahuje.

Kuri ubu mu Rwanda, Pan African Movement irahari mu rubyiruko hirya no hino, muri za kaminuza, amashuri yisumbuye, ndetse hagiye hari amashami kugera no ku mirenge ahuriramo urubyiruko.

Umuyobozi wa PAM Rwanda, Musoni Protais, yavuze ko iyi nama igamije kumvisha urubyiruko uruhare rwarwo mu cyerekezo cya Afurika
Komiseri w'Urubyiruko muri PAM Rwanda, Shyaka Michael Nyarwaya, yavuze ko iyi nama izumvisha buri rubyiruko uruhare rwagira mu iterambere rya Afurika
Inama ya kabiri ya Africa Expect iziga ku ruhare urubyiruko rwagira mu iterambere rya Afurika rwifashishije ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .