00:00:00 IGIHE NETWORK KN KINYARWANDA EN ENGLISH FR FRANCAIS

Abunganira Nkubiri basabye urukiko rwa Gasabo kwiyambura ububasha bwo kumuburanisha

Yanditswe na Rabbi Malo Umucunguzi
Kuya 11 Ukuboza 2020 saa 01:07
Yasuwe :
0 0

Abunganira umunyemari Nkubiri Alfred basabye Urukiko Rwisumbuye rwa Gasabo kwiyambura ububasha bwo kumuburanisha, bavuga ko ibyaha aregwa bidakwiriye kujyanwa mu nkiko ziburanisha imanza z’inshinjabyaha, ahubwo byari kuregerwa urukiko rw’ubucuruzi.

Ni urubanza rwabaye hifashishijwe ikoranabuhanga nk’uko bimaze iminsi mu nkiko mu Rwanda, mu rwego rwo gukumira ikwirakwira ry’icyorezo cya Coronavirus.

Ni nyuma y’uko ku wa 2 Ugushyingo Urukiko Rwisumbuye rwa Gasabo rwategetse ko akomeza gufungwa, mu gihe we yasabaga kurekurwa agakurikiranwa ari hanze kubera uburwayi butamworoheye, ndetse iki cyemezo cyatangajwe ari mu Bitaro bya Kaminuza bya Kigali, CHUK.

Akekwaho ibyaha byo guhimba, guhindura inyandiko cyangwa gukoresha inyandiko mpimbano, guhisha ibintu byakoreshejwe cyangwa byagenewe gukoreshwa icyaha n’ubuhemu.

Bifitanye isano na miliyari 2 Frw ashinjwa ko yanyereje mu bucuruzi bw’ifumbire mvaruganda binyuze mu kigo ENAS, agahimba imikono byitwa ko ari iy’abantu bafashe ifumbire mvaruganda ntibishyure, ashyiraho n’abatarayihawe kugira ngo ahabwe amafaranga na Minisiteri y’Ubuhinzi n’Ubworozi.

Mu iburanisha rya none, habaye ikibazo cy’ikoranabuhanga ryatambutsaga amajwi ariko amashusho ntakunde, umucamanza abaza Nkubiri wari muri Gereza ya Kigali niba yemera kuburana atareba abamwunganira, avuga ko ntacyo byari bitwaye, ariko yibaza uko ari busabe ijambo. Umucamanza yavuze ko aza gukoresha ijwi akarisaba.

Umwe mu bunganira Nkubiri yahise asaba ijambo agaragaza inzitizi, ko ibyaha umukiliya we aregwa bishingiye ku masezerano ikigo ENAS cyagiranye na Minisiteri y’ubuhinzi n’ubworozi, bityo ari igikorwa kijyanye n’ubucuruzi, ku buryo urubanza rwari kuregerwa urukiko rw’ubucuruzi aho kuba urukiko ruburanisha imanza z’inshinjabyaha.

Ibyo bigahuzwa n’uko icyaregewe kijyanye no kutubahiriza amasezerano ajyanye n’ubucuruzi, bityo ngo hari kwitabazwa urukiko rw’ubucuruzi.

Ikindi ni uko ikirego cyagombaga kuba kireba ENAS nk’ikigo cy’ubucuruzi gifite ubuzima gatozi, aho kuba Nkubiri nk’umuntu ku giti cye, nubwo ari we ugihagararariye ariko nk’umunyamigabane.

Nkubiri yagarutse ku buryo amasezerano yaje kubyara ibirego yasinywe hagati ya MINAGRI ngo ENAS igeze ifumbire ku baturage, hakabamo n’uruhande rw’inzego z’Uturere n’abandi, akibaza impamvu bo batarezwe.

Yasabye ko ubutabera gusuzuma uko amafaranga yose yasohotse, uko yishyuwe n’ibindi bivugwa muri kiriya kibazo, kuko asanga nta cyaha yakoze.

Ubushinjacyaha bwavuze ko kuba uru rubanza rwajyanwa mu rukiko rw’ubucuruzi nta shingiro bifite, kuko mu iperereza hagaragaye amalisiti ya baringa agaragaza abantu bahawe ifumbire kandi ntayo bahawe, bitandukanye no kuba icyaha gishingiye ku masezerano, ku buryo urukiko rwaregewe rufite ububasha bwo kuburanisha uru rubanza.

Ku kijyanye no kuba hararezwe Nkubiri aho kuba ENAS, ubushinjacyaha bwavuze ko ari we bwajyanye mu nkiko kuko ari we nyiri ikigo.

Nyuma yo kumva impande zose n’inzitizi zagaragajwe n’abunganira Nkubiri, umucamanza yanzuye ko umwanzuro w’urukiko ku nzitizi zagaragajwe uzatangazwa ku wa Mbere tariki 14 Ukuboza 2020, saa munani.

Umunyemari Nkubiri afunzwe guhera muri Nyakanga 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .