Abohereza imboga n’imbuto mu mahanga beretswe amahirwe bashyiriweho basabwa kuyabyaza umusaruro

Yanditswe na Evariste Nsengimana
Kuya 29 Gashyantare 2020 saa 07:42
Yasuwe :
0 0

Banki y’u Rwanda itsura Amajyambere (BRD) yagaragaje ko abohereza imboga n’imbuto mu mahanga bazikuye mu Rwanda, bakiri mbarwa nyamara guverinoma yarabashyiriyeho ikigega cyo kubafasha ariko bakaba batakibyaza umusaruro uko bikwiye.

Mu mpera za 2015 nibwo guverinoma yatangije icyo kigega kizwi nka ‘Export Growth Fund, iha BRD inshingano zo kukigenzura, kugira ngo gifashe abohereza ibicuruzwa mu mahanga kubona inguzanyo, hagamijwe gutanga umusanzu mu kugabanya icyuho hagati y’ibyoherezwa mu mahanga n’ibitumizwayo.

Mu biganiro BRD yagiranye n’abohereza imboga n’imbuto mu mahanga kuri uyu wa 28 Gashyantare 2020, hagaragajwe ko abakora muri urwo rwego batitabira gukorana n’icyo kigega kugira ngo babashe kohereza byinshi.

Umuyobozi ushinzwe inganda n’ibyoherezwa mu mahanga muri BRD, Uwizeye Estelle, yagize ati “Ni ukugira ngo tubashishikarize kuba mwasaba amafaranga yo kwagura ubucuruzi bwanyu kuko muracyafite imbogamizi z’uko iyo mubonye abakeneye byinshi mutabasha kubyohereza kubera ko nta ngwate zihagije mushyira Banki ngo zibahe inguzanyo.”

Uwizeye yasobanuye ko BRD ku bufatanye n’Ikigo cy’Igihugu gishinzwe kohereza mu mahanga ibikomoka ku Buhinzi n’Ubworozi mu Rwanda (NAEB) basinyanye amasezerano na Banki z’ubucuruzi eshanu agamije kubafasha kubona inguzanyo yo kwagura ubucuruzi.

Muri izo Banki bashobora kwegera zikabafasha kubona amafaranga yo gukoresha, BRD ikabishingira kugera ku kigero cya 80% harimo Equity Bank, I&M Bank, Cogebanque, Banki ya Kigali na Banki y’Abaturage y’u Rwanda.

Ati “Amahirwe ni uko abohereza imboga n’imbuto bashobora kubona ingwate BRD ikabishingira mu gihe mu zindi nzego bitaratangira ariko turacyashakisha ku buryo duteganya ko mu minsi iri imbere zose zishobora kubona iyo nguzanyo.”

BRD igaragaza ko abantu n’ibigo 75 gusa ari bo bamaze kwishingirwa n’icyo kigega binyuze muri banki z’ubucuruzi no muri BRD. 14 mu bishingiwe binyuze muri Banki z’ubucuruzi mu gihe binyuze muri BRD ari 61 ariko muri rusange ibigo ibihumbi bine bikaba bimaze kubona inguzanyo irenga miliyari 5Frw.

Abashora imboga n’imbuto mu mahanga bishimiye aya mahirwe bagaragarijwe ariko banasaba ko habaho imikoranire inoze, Banki z’ubucuruzi zitangirwamo iyi nguzanyo ntizibarushye kandi zigakomeza kubafasha no mu bujyanama nyuma yo kubaha inguzanyo.

Umuyobozi w’ikigo Great Life Ltd, cyohereza mu mahanga imboga n’imbuto wari unahagarariye ihuriro ry’abazoherezayo, Uwamahoro Annie Justine, yavuze ko ibyo biganiro bitanga amahirwe ku buryo umubare w’abagana icyo kigega ushobora kwiyongera.

Ati “Ubu bucuruzi dukora buracyari bushya ariko burimo n’amahirwe menshi mu gihugu no hanze yacyo nkabona ko tugiye gukorera hamwe, mukareba imbogamizi duhura nazo mukatugira inama. Icyo twasaba ni ukureba n’uburyo bwo kutworohereza.”

Muri Gashyantare 2019, Banki Nkuru y’Igihugu, BNR, yatangaje ko mu mwaka wa 2018 u Rwanda rwohereje mu mahanga ibicuruzwa bifite agaciro ka miliyoni 995.7$ avuye kuri miliyoni 943.5$ mu 2017.

Iyi nama yahuje abohereza imboga n'imbuto mu mahanga
Umuyobozi ushinzwe inganda n'ibyoherezwa mu mahanga muri BRD, Uwizeye yavuze ko abohereza imboga n'imbuto mu mahanga bakwiye kubyaza umusaruro amahirwe igihugu cyabashyiriyeho
Uwamahoro yavuze ko ibi biganiro bitanga icyizere cy'uko abagana ikigega cyunganira abohereza ibicuruzwa mu mahanga wakiyongera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .