Abo umwami yahaye amata! Agahinda k’umusore wiga kuri buruse ya leta wasanze se ari mu bagabye ibitero i Rusizi

Yanditswe na IGIHE
Kuya 29 Ukwakira 2019 saa 04:09
Yasuwe :
0 0

Mu Cyumweru gishize nibwo hasakaye amakuru y’uko mu Mujyi wa Kamembe hatewe grenade igakomeretsa abantu bane nubwo batatinze mu bitaro. Nyuma y’iminsi mike polisi yahise yerekana abantu bane barimo ushinjwa gutera iyo grenade witwa Matakamba Jean Berchimas w’imyaka 57.

Bafatanywe ibikoresho birimo imbunda enye, amakoti maremare ya gisirikare, grenade enye n’amasasu menshi. Bemeye ko bari bafite imikoranire n’abari hanze y’u Rwanda bashaka guhungabanya umutekano w’igihugu, bo mu mutwe wa FLN.

Matakamba yatatiriye igihango atera igihugu cyamurereye kugeza na magingo aya, ku buryo yateye agahinda gakomeye uwo yibarutse. Uwo ni umuhungu we Mukeshimana Idi w’imyaka 27, urimo kwiga Masters mu Bushinwa kuri buruse ya leta.

Matakamba yatengushye umuryango we

Mukeshimana yabwiye IGIHE ko atagize amahirwe yo kumenya nyina kuko yitabye Imana ataramenya ubwenge, na se ntibabana ku buryo leta y’u Rwanda yamubereye umubyeyi udasanzwe. Uyu musore yavukiye i Mururu mu Karere ka Rusizi mu 1992.

Yakomeje ati “Kuva mu 1994 kugeza mu 2009, ntabwo njye nari nzi ababyeyi. Mama ntawe mfite, papa nawe namumenye mu 2009 kuko yatashye avuye mu ishyamba ahungutse, bahise bamufunga, afunguwe aguma i Rusizi nanjye nguma i Kigali mu miryango y’abasilamu bamfashaga kugira ngo nshobore kwiga.”

“Urumva yatashye nta mugore asanga, nta mwana asanga, nta nzu asanga, yaje atangira bushya . Noneho ahitira hariya i Mururu, aratangira ariyubaka, arakora, yagiraga ikirombe gicukura amabuye, njye nkibaza nti ni iki cyamuteye gukora biriya bintu?”

Matakamba yafunzwe aregwa ibyaha bya Jenoside, aza gufungurwa agizwe umwere n’inkiko Gacaca.

Mu gihe cyose yari afunzwe, Mukeshimana yarihiwe amashuri n’imiryango, aza kubona buruse ya leta arangiriza muri Kaminuza y’u Rwanda ahahoze ari SFB, mu Ugushyingo 2018, aho yize ibijyanye n’imicungire y’abakozi.

Mbere gato y’uko arangiza amasomo yabonye akazi muri Kigali Marriott Hotel mu buyobozi bushinzwe abakozi, nyuma y’amezi make leta imuha buruse yo gukomeza Master’s mu Bushinwa, agerayo muri Nzeri uyu mwaka. Ubu arimo kwigayo ibijyanye n’ubucuruzi bwambukiranya imipaka binyuze kuri murandasi, cross-border e-commerce.

Yavuze ko ibyo se yakoze ari “agahomamunwa”, kuko yahubutse agakorana n’abagamije kurwanya leta y’u Rwanda atabanje gutekereza aho yakuye umwana we n’aho rumugejeje, ntanarebe na we ibyo yagiriwe.

Yakomeje ati “Urumva njye mfite igikomere, niyo mpamvu ibyo byose byabaye byarantunguye, birambabaza, bintera agahinda, kugeza ubwo n’ubu tuvugana, kurya byarananiye, kuryama byarananiye, mfite ishavu n’agahinda natewe n’uriya mugabo.”

Intego ni ugukorera u Rwanda

Mukeshimana avuga ko hari abantu benshi batabonye amahirwe nk’ayo leta y’u Rwanda yamuhaye, nubwo se yabirenzeho agashaka kugaba igitero ku wamurereye

Ati “Njye mfite indangagaciro zitandukanye n’ibyo akora, kandi si ko nifuza kuzareba abana banjye, ndifuza kuzafasha u Rwanda n’Abanyarwanda kurwanya abahungabanya umutekano w’igihugu ndetse n’abavuga nabi u Rwanda nzabanyomoza.”

Mukeshimana avuga ko se afungurwa mu 2009 we yigaga mu mashuri yisumbuye arihirwa n’umuryango w’Abayisilamu wamwakiriye, kandi icyo gihe umubyeyi we nta bushobozi yari kubona ngo amufashe kwiga.

Mu minsi ishize ngo ntibavuganaga cyane, gusa ngo yaba yaje nk’i Kigali bakaganira akumva amubwira kenshi ngo “ubuzima bwaranze”, agasubira i Rusizi.

Yakomeje ati “Gusa yaransebeje, Imana imubabarire gusa nicyo namusabira. Gusa icyo nagira ngo mbwire Abanyarwanda ni uko ibyo yakoze ntaho mpuriye nabyo, ntabwo yigeze abimbwira nta n’inama yigeze abingishamo.”

“Kuko njye ntabwo nshobora guhemukira u Rwanda, narezwe gipfubyi, nta babyeyi nta ki, u Rwanda rurandera, Abanyarwanda barandera, dore aho ngeze, ndifuza gukorere u Rwanda n’Abanyarwanda muri rusange. Imana imubabarire kuko yarampemukiye.”

Yavuze ko uretse ko Leta y’u Rwanda ari umubyeyi kandi akaba atewe ipfunwe n’ibikorwa bya se, naho ubundi ibikorwa bya se byashoboraga no gushyira mu kaga buruse ye.

Yakomeje ati ”Bidutera ipfunwe kwitwa abo turibo, bigatuma udashobora kwisanzura mu bandi, niba utambutse ‘ngo uriya mwana ni uwa runaka, se yagambaniye igihugu, se yamaze abantu’, ibintu nk’ibyo. Icyo gihe rero urumva tuba dusigaye twenyine, ariko Imana niyo imenya ibyo tutazi.”

“Gusa ndayishimira, nshimira n’Abanyarwanda bose muri rusange, nshimira igihugu muri rusange kuko cyanyizeye kikangeza aho ngomba kugera, nanjye nzabakorera nkoreshe amaboko, nkoreshe umutwe.”

Mu minsi ishize hakomeje kumvikana abantu benshi batatira ubufasha bahawe na leta y’u Rwanda bagahinduka abayirwanya, nubwo bitakunze kubagwa amahoro. Ni aka wa mugani ngo ’abo umwami yahaye amata, ni bo bamwimye amatwi!’

Barimo Nsabimana Callixte wiyise ‘Sankara’ wiciwe ababyeyi bombi muri jenoside yakorewe Abatutsi mu 1994, ndetse mu bana icyenda bavukanaga hasigaye mushiki we umwe.

Jenoside irangiye Nsabimana Callixte yatangiriye amashuri yisumbuye muri Groupe Officiel de Butare arihirwa na FARG. Gusa nyuma ya byose yagiye mu mitwe yitwaje intwaro, yaje kwigamba ibitero byishe abaturage mu Karere ka Nyarugugu, hafi y’ishyamba rya Nyungwe.

Ni kimwe n’abagizi ba nabi baheruka kugaba ibitero bakica abasivili 14 mu Kinigi mu Karere ka Musanze, abandi bagakomereka. Barimo Theoneste Habumukiza uvuka mu Karere ka Burera mu Murenge wa Rugengabare, wavuze ko we yagiye muri RUD Urunana arangije muri Kaminuza y’u Rwanda mu 2016, mu micungire y’ubucuruzi by’umwihariko bujyanye n’ubwishingizi. Na we yize mu yahoze ari SFB, kuri buruse ya leta.

Ngo yagiye kwiga Master’s muri Kaminuza ya Makerere muri Uganda, ahurirayo n’umugabo w’umukire amubwira ko amufitiye akazi kazajya kamuhemba amadolari menshi, ko gucuruza amabuye y’agaciro i Walikale. Ni uko yinjiye mu mitwe yitwaje intwaro, afatwa nyuma yo kwica abasivili i Musanze.

Matakamba Jean Berchimas w’imyaka 57 uri mu ruziga, yanenzwe n'umuhungu we urihirwa na leta amashuri mu Bushinwa
Nsabimana Callixte wiyise 'Sankara' yahemukiye igihugu cyamwitayeho nyuma yo kugirwa imfubyi na Jenoside yakorewe Abatutsi
Theoneste Habumukiza uvuka mu Karere ka Burera mu Murenge wa Rugengabare, wavuze ko we yagiye muri RUD Urunana arangije muri Kaminuza y’u Rwanda mu 2016
Mukeshimana Idi ntiyumva uburyo Leta y'u Rwanda yamwitayeho se adahari, agahindukira akayirwanya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza