Abo kwa Rwigara bitabye urukiko mu rubanza baregwamo kunyereza imisoro

Yanditswe na Akayezu Jean de Dieu
Kuya 16 Nzeri 2019 saa 02:29
Yasuwe :
0 0

Urukiko rukuru rw’ubucuruzi rwa Nyarugenge rwasubitse urubanza rw’ubujurire Ikigo gishinzwe imisoro n’amahoro (RRA) kiregamo abanyamigabane b’uruganda rukora itabi, Premier Tobacco Company (PTC), rw’umuryango wa Rwigara Assinapol.

Muri Mutarama 2019, nibwo Urukiko Rukuru rw’Ubucuruzi, rwategetse bamwe mu banyamigabane b’uruganda (PTC) barimo Uwamahoro Anne Rwigara kwishyura imisoro igera kuri miliyari enye rwari rubereyemo RRA

Muri miliyari zigera kuri esheshatu y’imisoro RRA yishyuzaga PTC, hamaze kubonekamo miliyari 1.7 yavuye mu mashini z’uruganda zatejwe cyamunara muri Kanama umwaka ushize ndetse n’itabi ryagurishijwe miliyoni 500 Frw muri Werurwe 2018.

RRA irega abanyamigabane b’uruganda PTC kugira uruhare mu micungire mibi yarwo, byatumye rutishyura imisoro igera muri miliyari hafi esheshatu z’amafaranga y’u Rwanda.

Icyo kigo cyavuze ko abanyamigabane barimo Anne Rwigara, Umuyobozi Mukuru w’urwo ruganda na Neza Yvonne wari umucungamutungo w’uruganda, mu 2017 bagiye batanga amakuru atari yo ku byerekeranye n’imisoro ku bushake.

Ni mu gihe ku rundi ruhande Anne Rwigara Uwamahoro we yari yajuririye Urukiko Rukuru rw’Ubucuruzi avuga ko ataryozwa imisoro cyane ko yatangiye kuyobora uru ruganda mu 2015 kandi imisoro bashinjwa ari iyo kuva mu 2012.

Kuri uyu wa Mbere tariki 16 Nzeri 2019, impande zombi zari zitabye Urukiko Rukuru rw’Ubucuruzi kugira ngo hatangire kuburanisha ubu bujurire.

Ahagana saa yine n’igice z’igitondo nibwo Anne Rwigara na Me Rwayitare Janvier umwunganira mu mategeko bitabye urukiko mu gihe RRA nayo yari ifite abanyamategeko bayihagarariye barimo Me Clement Gatera.

Umucamanza wari uyoboye inteko iburanisha yavuze ko hari ibyo impande zombi zari zasabwe gushyira mu ikoranabuhanga harimo kugaragaza imiterere y’uru ruganda rwa TPC.

Imiterere y’uru ruganda igaragaza ko mu 1989 rwitwaga RWIGAS, izina ryaje guhinduka mu 2002 rukitwa Premier Tobacco Company.

Yabasabye kuzuza ibyo basabwe gushyira mu ikoranabuhanga, mu gihe iburanisha ryo riteganyijwe ko rizakomeza ku wa 21 Ukwakira 2019.

Uwamahoro Anne Rwigara ni umwe mu banyamigabane ba PTC urukiko rwategetse kwishyura imisoro y'ibirarane
Uruganda rw'itabi rw'abo kwa Rwigara rwarezwe mu nkiko na RRA nyuma yo kunyereza imisoro kuva mu 2012

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza