Abize mu Bushinwa bagiye kungukira muri gahunda ibahuza n’ibigo byaho bikorera mu Rwanda (Amafoto)

Yanditswe na Twarabanye Venuste
Kuya 26 Ukwakira 2019 saa 10:58
Yasuwe :
0 0

Umuryango w’Abanyarwanda bize mu Bushinwa [Rwanda China Alumni Association] ufatanyije na Ambasade y’u Bushinwa mu Rwanda n’Ibiro byayo bishinzwe ibijyanye n’Ubukungu, watangije igikorwa kigamije guhuza Abanyarwanda bize mu Bushinwa n’ibigo by’Abashinwa bikorera mu Rwanda, ngo bamenye amahirwe y’akazi abirimo.

Ni igikorwa cyabaye ku nshuro ya mbere cyitabirwa n’abagize iryo huriro n’ibigo birenga 20. Hagaragajwe ko byari bifite imyanya y’akazi irenga 60 yiganjemo iyo ku rwego rwo hejuru; irimo iy’abayobozi bakuru, abashinzwe abakozi, ubusemuzi n’indi.

Ku ruhande rw’abize mu Bushinwa bitabiriye icyo gikorwa, babwiye IGIHE ko babibonyemo amahirwe ku batarabona akazi no kubakeneye akisumbuye ku ko bafite.

Uwamahoro Clementine wasoje amasomo ye mu Bushinwa mu bijyanye n’ubucukuzi bw’amabuye y’agaciro, yavuze bafite icyizere ko iki gikorwa kizabagirira akamaro. Ibigo bitatu byamusabye umwirindoro yizeye ko bazakomeza ibiganiro bishobora kuzavamo akazi.

Ati “Iki ni igikorwa cyiza cyane ku bakirangiza badafite akazi cyangwa abamaze igihe kinini barangije ariko batarakabona, kuko bituma umuntu amenya ahari amahirwe. Hari benshi batabona akazi kuko batanamenye, aho babariza ariko igikorwa nk’iki ni cyiza cyane kuko gituma abantu bamenya ahari akazi bakamenya aho babariza, ukamenyana n’abantu, ukamenya n’aho wajya.”

“Ntabwo ndamenya niba bizatanga umusaruro nk’uko tubyiteze, ariko kuba barabitekereje bigakorwa, ndibaza ko n’umusaruro uzaboneka.”

Abashakaga abakozi nabo bavuze ko iri huriro ryabaye amahirwe kuri bo, kuko hari abatari bazi ko hari umubare munini w’abakozi bize muri icyo gihugu, bashaka akazi.

Mugiraneza Gustave ukorera Ikigo cy’Abashinwa cyubaka Imihanda, CRBC (China Roads and Bridge Corporation) yabwiye IGIHE ko nk’abakeneye abakozi bizeye kubona abujuje ibyo basaba, binyuze mri iki gikorwa cyo guhuza abafite akazi n’abagashaka.

Ati “Twarimo tuganira kugira ngo twumve ibyo badufasha mu byo dukora. N’ubu aho tuvugira hano hari abo tumaze kubona ko tuzabahamagara, ku bijyanye n’akazi, ntabwo twari tuzi ko hari aba-enjeniyeri benshi bari kuza bangana gutya ariko Iyi myirondoro mubona ni izo badusigiye hafi 80% ni abize civil engineering.”

Umunyamabanga uhoraho muri Minisiteri y’abakozi ba leta n’umurimo, Gaspard Musonera yavuze ko ari uburyo bwo gushimangira umubano w’ibihugu byombi no gufasha u Rwanda mu guhanga imirimo mishya no kugabanya umubare w’abadafite akazi.

Ati “Ndagira ngo nshimire abaturage ba Repubulika y’u Bushinwa bafasha igihugu cyacu mu ngeri zitandukanye by’umwihariko mu burezi, no guha Abanyarwanda akazi.”

Yasabye abize mu Bushinwa kurushaho gukora ibihambaye nk’abantu bafite ubumenyi bwo ku rwego rwo hejuru.

Amasaderi w’u Bushinwa mu Rwanda, Rao Hongwei yavuze ko aricyo igikorwa cya mbere kireba abasoje amasomo yabo mu Bushinwa bakoze ariko kijyanye n’ibindi bikorwa bafatanyamo n’u Rwanda bitewe na gahunda leta iba ishyize imbere.

Gusa u Bushinwa busanzwe bwunganira leta y’u Rwanda mu burezi, harimo kubaka amashuri y’ubumenyi ngiro harimo irya Musanze Polythechique, ryakira abagera kuri 3000 muri gahunda ya diploma na 400 biga amasomo y’igihe gito, rikaba ari rimwe mu afite ubushobozi bwo kwakira abanyeshuri benshi.

Buri mwaka u Bushinwa, butanga amahugurwa agera kuri 406 hagendewe ku byo leta y’u Rwanda iba ishyize imbere, na buruse zigera ku 100 mu mashuri yisumbuye.

Kugeza ubu hari Abanyarwanda barenga 2000 bari kwiga muri kaminuza zitandukanye mu Bushinwa nkuko byatangajwe na ambasaderi Rao.

Ati “Buri mwaka hari amajana y’Abanyarwanda bagaruka mu Rwanda bavuye mu Bushinwa, bafite ubumenyi mu ikoranabuhanga bizeyo benshi muri bo bafite n’akarusho ko kumenya ururimi rw’Igishinwa, bazi Abashinwa n’umuco wabo.”

Icyo ngo ni kimwe mu byatumye, batekereza guhuza abizeyo, n’abakorera mu Rwanda, kuko biborohera gukorana.

U Rwanda rufite intego yo guhanga imirimo mishya igera kuri miliyoni 1.5 mu 2024. Abanyarwanda barenga 70% bari munsi y’imyaka 30, bitanga igisobanuro cyo guhanga iyo mirimo mu buryo bwo gufasha urubyiruko.

Kuva mu 2001 ubukungu bw’u Rwanda buzamukaho 7% ariko haracyakeneye kugira igikorwa ku isoko ry’umurimo kugira ngo abakeneye imirimo buri mwaka bayibone.

Imibare y’Ibiro bya Ambasade y’u Bushinwa bishinzwe ibijyanye n’Ubukungu, yerekana ko abakozi barenga 90% mu mishinga y’ibigo by’Abashinwa bikorera mu Rwanda ari Abanyarwanda. Mu myaka isaga itanu ishize, ibigo birenga 50 by’Abashinwa byatangiye gukorera mu Rwanda, aho byashoye miliyoni $250.

Umuyobozi w’Umuryango w’Abanyarwanda bize mu Bushinwa (RCAO), Higaniro Théoneste, yabwiye IGIHE ko igitekerezo cyo gutangiza uyu muryango gifite imizi mu 2010.

Inama ya mbere yayo yakozwe ku wa 1 Ugushyingo 2012 yitabiriwe n’abantu batanu; yabanjirije izindi nyinshi zabimburiye igikorwa cyo kwandikisha uyu muryango mu 2015.

Ufite intego yo kubaka ibiro byayo mu Mujyi wa Kigali n’ikigo kizatangirwamo amahugurwa y’ikoranabuhanga n’ajyanye no kwigisha umuco kizaba kiri mu Murenge wa Masaka mu Karere ka Kicukiro.

RCAO kuri ubu ibarizwamo abanyamuryango basaga 600 ariko abize mu Bushinwa bo barenga ibihumbi bitatu.

RCAO itera inkunga ibikorwa bitandukanye birimo gufasha abakene n’abatishoboye, gushyigikira impunzi no gutanga mituweli.

Iki gikorwa cyabaye ku nshuro ya mbere cyitabiriwe n'abantu batandukanye
Norbert Haguma ni we wari umusangiza w'amagambo. Aha yari kumwe n'Umujyanama mu by'Ubukungu muri Ambasade y'Abashinwa mu Rwanda, Hudson Wang Jiaxin
Abize mu Bushinwa bagiye kungukira muri gahunda ibahuza n’ibigo byaho bikorera mu Rwanda
Umuyobozi w’Umuryango w’Abanyarwanda bize mu Bushinwa (RCAO), Higaniro Théoneste, yasangije abitabiriye iki gikorwa ko kizagenda cyagurwa buri mwaka
Abayobozi mu bigo by'Abashinwa bikorera mu Rwanda berekanye amahirwe y'akazi ahari
Niyitegeka Agnes wize muri Kaminuza ya Ningbo yo mu Bushinwa yigaragarije abashaka abakozi avuga ko afite ubumenyi mu mirimo yakoze yo kwakira neza abakiliya (customer care) mu Kigo cyitwa Hodor cyo mu Bushinwa
Umunyamabanga uhoraho muri Minisiteri y'Abakozi ba Leta n'Umurimo, Gaspard Musonera yashimiye u Bushinwa bwafashije u Rwanda guha urubyiruko ubumenyi
Ambasaderi w'u Bushinwa mu Rwanda, Rao Hongwei, yavuze ko byitezwe ko ibigo by'Abashinwa bikorera mu Rwanda biziyongera mu myaka iri imbere
Abanyarwanda bize mu Bushinwa bahujwe n’ibigo by’Abashinwa bikorera mu gihugu mu gikorwa kigamije kureba ahari amahirwe y'akazi

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza