Abikorera bakiriye bate icyemezo cyo kugabanya inama z’ibigo bya leta zibera muri hoteli?

Yanditswe na Iradukunda Serge
Kuya 9 Ukuboza 2020 saa 02:26
Yasuwe :
0 0

Ku wa 4 Ukuboza 2020 nibwo Umuyobozi w’Ibiro bya Minisitiri w’Intebe, Evariste Rugigana, yamenyesheje ibigo bya Leta icyemezo cyo kugabanya inama zibera hanze y’ibiro, nyuma y’uko byagaragaye ko inama nto n’inini ndetse n’imyiherero bibera hanze y’aho ibigo bikorera, byiyongereye cyane.

Muri ibaruwa yagenewe Abanyamabanga bahoraho, Abanyamabanga bakuru, abanyamabanga Nshingwabikorwa n’abayobozi bashinzwe ingengo y’imari bose, ko mu rwego rwo gukoresha neza ibikorwa remezo bya leta bihari, inzego ziteganya gukorera inama hanze y’inyubako yazo haba muri Kigali no hanze yayo, zigomba kubisabira uburenganzira mu Biro bya Minisitiri w’Intebe, iminsi 14 mbere y’inama.

Ni icyemezo gisa n’aho buri kigo cyose kizabisaba kitazabyemererwa, aho inama izabera muri hoteli igomba kuba ikomeye kandi ihuza inzego nyinshi.

Umuyobozi w’Urugaga rw’Abikorera mu Rwanda, Stephen Ruzibiza, kuri uyu wa Gatatu yabwiye itangazamakuru ko bategereje kureba ingaruka iki cyemezo gishobora kuzagira ku mahoteli.

Ni urwego rurimo kuzahuka muri iyi minsi, nyuma yo kugirwaho ingaruka zikomeye n’icyorezo cya COVID-19 cyatumye hashira igihe kinini ingendo z’indege zarahagaritswe, n’ibikorwa bihuza abanti benshi bitemewe.

Ruzibiza ati "Itangazo uko naribonye ntabwo babujije ibigo bya leta gukorera inama mu mahoteli, ahubwo ni uko hari inzira bagombye gucamo bagasaba uburenganzira. Rero ubwo burenganzira baramutse bagaragaje impamvu, dufite icyizere ko Leta izajya yemerera abantu gukorera inama mu mahoteli, turacyari mu biganiro."

"Turacyari mu biganiro ngo turebe impamvu leta yatanze iryo tangazo, nyuma uko tugenda tuganira na Guverinoma, birashoboka ko tuzababwira byinshi kuri iki cyemezo."

Ni icyemezo cyakiriwe mu buryo butandukanye, abantu bagaragaje amarangamutima yabo bifashishije inkuru ya IGIHE y’itangazwa ry’uyu mwanzuro w’Ibiro bya Minisitiri w’Intebe.

Umwe yagize ati "Ahubwo iyaba banabihagarikaga burundu! Usanga buri kigo gifite icyumba cy’inama kandi rwose cyiza, ariko ugasanga bagiye mu mahoteli, bagakoresha amafaranga menshi. Keretse igihe iwabo habaye hatoya, naho ubundi byagabanya umutungo ukoreshwa dore ko turi mu bihe ubukungu bwahungabanye."

Gusa ntabibona kimwe na mugenzi we wagize ati "Iki cyemezo kizadindiza ibikorwa. Bari bakwiye gushyiraho imirongo ngenderwaho hakorwa inama hanze y’ikigo aho kuvuga ngo ibigo bijye bisaba uruhushya rwo gukora inama hanze y’ikigo. Ibi ni ibintu biri mu bushobozi bw’ubuyobozi bw’ikigo, ntibikwiriye gusabirwa uruhushya mu biro bya Minisitiri w’Intebe. Ni igitekerezo cyanjye."

Hari n’uwagize ati “Izo hoteli ziraza kubaho zite ko leta ariyo mukiliya wazo wa mbere zari zitangiye kuzanzamuka none bigiye kongera kuzikomerana.”

Mu byateganyijwe ko ibigo bya leta bizajya bigenderaho mu gusaha gukorera inama hanze y’ibiro, harimo kugaragaza ibizayigirwamo, umusaruro yitezweho n’urutonde rw’abazayitabira. Harimo kandi kugaragaza neza igisobanuro cy’iyo nama, kandi hakagaragazwa niba iri muri gahunda y’ibikorwa byateganyijwe by’ikigo.

Hejuru y’ibyo, ikigo kigomba kugaragaza ingengo y’imari bizatwara n’aho izaturuka, impamvu byari ngombwa ko ibera hanze y’ibiro by’ikigo, n’uburyo bwo kubahiriza amabwiriza yo kwirinda icyorezo cya COVID-19.

RRA ni kimwe mu bigo bya Leta bifite ibyumba by'inama bigezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .