Abigisha mu mashuri yigenga basabye kugabanyirizwa inyungu mu Umwalimu Sacco

Yanditswe na IGIHE
Kuya 6 Ukuboza 2019 saa 01:50
Yasuwe :
0 0

Abayobozi n’abarimu bo mu mashuri yigenga basabye kugabanyirizwa inyungu ku nguzanyo baka muri Koperative Umwalimu Sacco, bagafatwa nka bagenzi babo bigisha mu mashuri ya Leta.

Umwalimu wigisha mu kigo cya Leta ufashe inguzanyo muri koperative Umwalimu Sacco yakwa inyungu ya 11 % bitewe n’ubwoko bw’inguzanyo yatse naho abo mu mashuri yigenga bakakwa inyungu ya 14 %.

Mu nama yahuje ubuyobozi bwa Minisiteri y’Uburezi n’abayobozi b’amashuri yigenga kuwa 2 Ukuboza 2019, hagaragajwe ko iyo nyungu yakwa abigisha mu mashuri yigenga ikiri hejuru.

Benshi mu babajije batanze igitekerezo ko hasuzumwa uko yagabanywa kugira ngo inguzanyo koperative Umwalimu Sacco itanga zikomeze kunogera abarimu bose.

Umuyobozi Mukuru w’Umwalimu Sacco, Laurence Uwambaje, yavuze ko inyungu ku nguzanyo ijya kugenwa hari isuzuma ryakozwe binemezwa n’inzego zibifitiye ububasha, bityo ko no kubihindura byasaba irindi suzuma.

Yagize ati “Hakongera gukorwa irindi suzuma kugira ngo turebe ngo uyu munsi bihagaze gute? Ese tubagabanyirije umwalimu Sacco yakomeza gukora neza cyangwa se nabo bafatwa nk’abarimu ba Leta? Ese ni ibiki bahuriraho byatuma tubafata nk’abarimu ba Leta? Ibyo byasaba ko hakorwa izindi nyigo.”

Uwambaje yavuze ko abarimu bigisha mu mashuri ya Leta bagabanyirijwe kuko byagaragaye ko bahembwa umushahara muto, kugira ngo babashe kubona ahandi bakura ubushobozi bwo kwiteza imbere.

Yavuze ko uko koroherezwa kwagizwemo uruhare na Leta yiyemeje gutanga inkunga ya miliyari 30 Frw mu gihe cy’imyaka icumi igamije gushyigikira iyo gahunda.

Ku kibazo cy’inguzanyo z’igihe gito zihabwa abarimu bo mu mashuri yigenga, Uwambaje yavuze ko biterwa n’amasezerano abarimu bo mu mashuri yigenga baba bafite.

Yagaragaje ko bakunze guhabwa amasezerano y’igihe gito bigatuma na Koperative ibaha inguzanyo y’igihe gito.

Ati “Amashuri yigenga usanga tugira imbogamizi kuko abarimu babo bakorera ku masezera mato, ugasanga ari umwaka umwe cyangwa ibiri. Ntabwo dushobora gutanga inguzanyo iri hejuru y’igihe cy’amasezerano yawe kuko tutaba tuzi niba amasezerano arangiye bazayavugurura cyangwa se bazamukuramo.”

Minisitiri w’Uburezi, Dr Eugene Mutimura, yavuze ko bagiye gukora ubuvugizi kugira ngo abakora mu mashuri yigenga babe bakoroherezwa kubona inguzanyo ku nyungu nto, gusa asaba ayo mashuri kujya atanga amasezerano y’igihe kirekire ku bakozi bayo.

Ati “Kigomba kwigwaho n’inzego zabifatiye umwanzuro, turabimusaba (Umuyobozi w’Umwalimu Sacco) azatangire abikurikirane muri izo nzego. Tuzamufasha kugira ngo twumve icyakorwa hashingiwe ku ireme ry’ikibazo.”

Koperative Umwalimu Sacco yashinzwe mu 2008 ku gitekerezo cya Perezida wa Repubulika Paul Kagame, hagamijwe gufasha abarimu kwivana mu bukene.

Muri Werurwe uyu mwaka, abanyamuryango ba Koperative Umwarimu Sacco, babwiwe ko mu 2018 yungutse miliyari eshatu na miliyoni 800 Frw.

Umutungo rusange w’iyi koperative umaze kugera kuri miliyari 72 Frw, zivuye kuri miliyari 68 Frw bari bafite mu 2017.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza