Abicirwa hanze n’abafatwa ntabwo byikora- Col Rutaremara aburira abifatanya n’abarwanya u Rwanda

Yanditswe na Evariste Nsengimana
Kuya 24 Mutarama 2020 saa 10:09
Yasuwe :
0 0

Umuyobozi w’Ikigo cy’Igihugu cy’Amahoro, Col Jill Rutaremara, yavuze ko abantu bagifite umutima ubashuka kujya kwifatanya n’imitwe irwanya u Rwanda ko bitazabagwa amahoro kuko hari abatanga amakuru yizewe bigatuma bafatwa abandi bakicirwa mu mashyamba baba bisuganyirizamo.

Hashize iminsi humvikana inkuru z’abantu bagize imitwe irwanya ubutegetsi bw’u Rwanda iri hirya no hino, cyane cyane muri Repubulika Iharanira Demokarasi ya Congo n’iyo bakorana bicwa bagerageza guhungabanya u Rwanda, abicirwa mu biterwa bagabwaho n’ingabo z’igihugu bacumbitsemo, abafatwa mpiri bakagarurwa mu Rwanda n’abandi.

Mu baheruka kwicwa harimo Gen Mudacumura Sylvestre wari Umuyobozi muri FDLR, Umutwe w’Inyeshyamba ugizwe na bamwe mu bagize uruhare muri Jenoside yakorewe Abatutsi; Gen Musabyimana Juv énal wari uzwi nka Jean Michel Africa; Brigadier General Shemeki Shaban uzwi nka Kagabo Patrick; Col Muhawenimana Théogène uzwi nka ‘Festus’ n’abandi.

Mu bafashwe mpiri harimo Umuyobozi Mukuru wungirije w’Umutwe udasanzwe w’Inyeshyamba za FDLR (FDLR-CRAP), Nshimiyimana Asifiwe Manud wafashwe n’Ingabo za RDC, Major Sabimana Iraguha uzwi ku mazina ya Mugisha Vainqueur n’abandi.

Uretse aba bari bakambitse muri RDC bafashwe hari na Nsabimana Callixte, wari wariyise Major Sankara, wari Umuvugizi w’Umutwe wa FLN, wamenyekanye cyane yigamba ibitero byagabwe mu nkengero z’ishyamba rya Nyungwe ndetse mu ntangiriro z’uku kwezi, Herman Nsengimana wari wamusimbuye na we yeretswe itangamakuru ari mu maboko y’Ubugenzacyaha bw’u Rwanda.

Ubwo yari mu kiganiro n’abanyamakuru gitegura umunsi w’Intwari ugiye kuba ku nshuro ya 26, Col Rutaremara yavuze ko hari ibikorwa bifatika bigaragaza ko mu Banyarwanda hakiri umuco w’ubutwari.

Ati “Umuco w’ubutwari uracyahari kandi ngira ngo ibyo bigaragarira mu bikorwa bifatika kandi bitandukanye. Nibwira ko mukurikirana mukanareba Abanyarwanda barimo bataha, abafatirwa mu Rwanda, abafatirwa hanze yarwo nabyo ngira ngo murabikurikirana.”

Uretse abo bicwa hakunze kuvugwa kandi ukutavuga rumwe kw’abayobora imitwe itandukanye irwanya u Rwanda iri hirya no hino mu gihugu, bapfuye impamvu zitandukanye.

Col Rutaremara ati “Hari abicirwa hanze y’u Rwanda, ibyo byose ntabwo byikora ndetse no gusubiranamo kw’iyi mitwe ishaka guteza umutekano muke mu Rwanda nabyo mu by’ukuri ntibyikora. Ibyo biva mu mikorere y’Abanyarwanda barimo n’izo nzego z’umutekano.”

Yakomeje agira ati “Kubamara impungenge nabyo birasaba kugaruka ku ndangagaciro remezo. Izo ndangagaciro ziracyahari, gukunda igihugu n’izindi Abanyarwanda baracyazifite, ingabo ziracyazifite. Igisubizo ni ugukomeza uwo muco w’ubutwari ariko hari n’ibindi. Ingabo zifite umwihariko, zigomba kugira ibyo zikora bitandukanye n’iz’abandi, zigomba guhora ziri mu myitozo, zigomba kugira ibikoresho.”

Col Rutaremara yavuze ko muri rusange ingabo z’u Rwanda zifite ibikoresho bihagije ariko nubwo akenshi abantu babara ubushobozi bw’ingabo runaka bagendeye ku mubare wazo n’ingano y’ibikoresho, ibyo atari byo byatumye u Rwanda rugera aho ruri uyu munsi.

Ati “Icyatugejeje aha nk’ingabo z’u Rwanda kandi kizakomeza kuduteza n’intambwe y’imbere ntabwo ari ibyo bikoresho gusa, nta nubwo ari amahugurwa gusa nubwo ari ngombwa. Icyangombwa ni za ndangagaciro, bya bintu bidafatika, ari nacyo gitandukanya ingabo z’u Rwanda n’abandi bantu.”

Indangagaciro zateje u Rwanda imbere harimo gukunda igihugu, ubwitange, ubumwe n’ibindi byakunze kuranga ingabo z’u Rwanda (RDF).

Kubaka igihugu si ibintu bikorwa n’ingabo gusa ahubwo biza mu bufatanye n’izindi nzego zirimo n’abaturage, ubukungu ariko by’umwihariko mu guhana amakuru.

Ati “N’aba bafatwa iyo usubiye inyuma ukajya kureba impamvu bafatwa, usanga amakuru aba yavuye mu Banyarwanda batari n’abasirikare. Impungenge twagira nk’abasirikare ni uko Abanyarwanda bata indangagaciro zabo zo gukunda igihugu, ubumwe bwabo bugahungabana. Imbaragaza zacu zishingiye ku Banyarwanda, mu gihe rero bagira ikibazo, n’ingabo zakigira.”

Col Rutaremara yavuze ko abantu bataye indangagaciro bakayobera mu murongo w’abashakira inabi u Rwanda bagaruka mu murongo nyawo nk’uko bamwe bakomeje kubikora kandi bakakirwa neza mu gihugu, bagafatanya n’abandi kucyubaka.

Komisiyo y’Igihugu Ishinzwe gusubiza mu Buzima Busanzwe ingabo zavuye ku rugerero igaragaza ko mu nkambi ya Nyarushishi harimo abantu 1904 barimo abarengeje imyaka 18 bagera kuri 823, abana 1081 bose batashye bavuye muri RDC kandi bakakirwa neza.

Col Rutaremara yavuze ko abantu bataye indangagaciro bakayobera mu murongo w’abashakira inabi u Rwanda bagaruka mu nzira nyayo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza