00:00:00 IGIHE NETWORK KN KINYARWANDA EN ENGLISH FR FRANCAIS

Abatwiciye twabahaye imbabazi banga kuzakira-Ubuhamya bwa Mukakabera warokotse Jenoside

Yanditswe na Nsanzimana Erneste
Kuya 9 April 2022 saa 08:53
Yasuwe :

Mu gihe Abanyarwanda bibuka ku nshuro ya 28 Jenoside yakorewe Abatutsi, hari imibiri y’abishwe muri Jenoside itaraboneka ngo ishyingurwe mu cyubahiro nyamara ababishe bazi aho babashyize.

Uku kutaragaza imibiri y’abishwe muri Jenoside yakorewe Abatutsi ngo ishyingurwe mu cyubahiro, Mukakabera Domina, abibona nko kudaha agaciro imbabazi abarokotse Jenoside bahaye abayikoze.

Mukakabera avuga Jenoside yakorewe Abatutsi itangira bahungiye kuri komini Mabanza (ubu ni mu karere ka Karongi mu murenge wa Rubengera), bahamara iminsi ine ntacyo barya.

Muri iyo minsi ine, abana bari kumwe na bo ni bo batekewe umuceri nawo utekwa mu ngunguru zavuyemo peteroli abana urabananira.

Kuri komini Mabanza bahageze tariki 8 bahava tariki 13 bajya kuri stade Gatwaro. Ku mugoroba wa tariki 12 Mata 1994, Burugumesitiri wa Komine Mabanza, Bagirishema yabonanye na Perefe wa Kibuye, Kayishema, wari uvuye i Mushubati baraganira.

Bukeye bwaho tariki 13 Mata saa kumi n’ebyiri za mu gitondo, Bagirishema ahagarara imbere y’abari bahungiye kuri komini, ababwira ko perefe yamubwiye ngo bage kuri stade Gatwaro, ngo kuri komini ni hato, burugumesitiri anababwira ko ntabyo kurya yababobera.

Mukakabera wari usanzwe acururiza mu isantere ya Rubengera, yagiye atabishaka, mugenzi we bari kumwe amubwira ko nibaguma i Rubengera, Abakiga bahabasanga bakabica.

Kubera uburyo bari benshi bashoreye amatungo yabo, ari nako baterwa amabuye umugenda, aba mbere bageze muri stade Gatwaro abanyuma bageze mu Kayenzi. Aha babiri bari bamaze kwamburwa ubuzima.

Mukakabera yageze mu Kayenzi ari kumwe n’umusore witwaga Frederick wigaga muri Kaminuza y’u Rwanda i Butare, bahura n’imodoka yarimo umusirikare wiganye na Frederick amubonye arahagarara. Aramubwira ngo kuri stade Gatwaro wijyayo kuko muri Rond-Point bahatsinze OPJ Tuyisabe Bonavanture na Veterineri Kayiranga.

Mukakabera na Frederick bahise burira iyo modoka basubira inyuma. Bageze i Rubengera, Mukakabera avuga ko yavuye muri iyo modoka yanga gukomeza ajya i Gitarama kuko nta muntu yari aziyo.

Mukakabera ngo yafashe icyemezo cyo kuva mu modoka avuga ngo "Wenda ninapfa bazanshyingura. Njye numvaga mbabajwe ni uko imbwa zizandya gusa. Navuyemo nsanga i Rubengera byakomeye ntangira kwihisha ubwo".

Abakomeje bakagera kuri stade Gatwaro, bishwe kuri 18 Mata saa cyenda. Mu kwezi kwa cyenda 1994, Mukakabera yagiye kuri stade asanga imirambo ikinyanyagiye hirya no hino.

Ashimira ubuyobozi bwa Leta y’ubumwe bwafashe mu mugongo abarokotse Jenoside.

Ati "Twebwe abarokotse twatanze imbabazi, tuziha n’abatazidusabye, kugira ngo tugire amahoro yo mu mutima. Ntabwo watera imbere, ntacyo wakora uri mu gahinda uheranywe n’agahinda".

Mukakabera avuga ko gutanga imbabazi bitavuze ko batibuka, kuko bishimye baribuka bababara bakibuka.

Ati "Nkaba nshimira abarokotse Jenoside intambwe bamaze gutera yo gutanga imbabazi bakagera naho baziha abatazibasabye....Ariko kandi haracyarimo ikibazo nubwo twatanze imbabazi hari abatarazakiriye. Barazanze, tubibonera ahantu henshi, iyo baza kwemera imbabazi, ntabwo tuba tukibona imibiri iboneka ari uko habaye igikorwa runaka, imyaka 28 ishize bakaba baterekana ahantu abacu bajugunywe. Icyo ni ikibazo kigaragaza ko hakiri urugendo kandi urugendo rukomeye".

Muri uyu mwaka mu karere ka Karongi habonetse imibiri 150 y’abishwe muri Jenoside yakorewe Abatutsi. Imyinshi muri yo yabonetse bari gutunganya imirima yo guteramo icyayi.

Mukakabera avuga ko ikindi kibazo abona ari amateka agorekwa, umwana ufite umubyeyi we ufungiye Jenoside agakura umubyeyi we amubeshya ko afunze kubera akarengane. Ngo ibi byazatera ikibazo gikomeye mu myaka izaza.

Asaba ubuyobozi gushyira imbaraga mu kwigisha abakiri bato amateka ya nyayo ya Jenoside yakorewe Abatutsi, n’abayikoze bagakomeza kwigishwa.

Mukakabera Domina asanga bamwe mu bakoze Jenoside baranze kwakira imbabazi bahawe n'abayirokotse
Urwibutso rwa Jenoside yakorewe Abatutsi rwa Gatwaro rushyinguyemo imibiri ibihumbi 15

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .