Abatuye i Rusizi basabwe kutarambiriza ku nkwi gusa nk’uburyo bwo gutekesha

Yanditswe na IGIHE
Kuya 19 Gashyantare 2020 saa 07:51
Yasuwe :
0 0

Sosiyete y’u Rwanda ishinzwe Ingufu (REG) yashishikarije abaturage bo mu Karere ka Rusizi, kutarambiriza ku nkwi gusa nk’uburyo bwo guteka ahubwo bagakoresha gaz n’imbabura zirondereza ibicanwa mu rwego rwo kurengera ibidukikije.

Ubu butumwa bwatangiwe mu Kagari ka Burunga mu Murenge wa Gihundwe, ku wa 18 Gashyantare 2020 ubwo REG n’ubuyobozi bw’Akarere ka Rusizi muri gahunda y’ingufu zitekeshwa bakanguriraga abaturage kwifashisha uburyo burondereza ibicanwa.

Basobanuriwe ko gutekesha uburyo bwa gakondo (ku mabuye atatu) buhenda, bwangiza ibidukikije n’umwuka uhumekwa, buteza ingaruka ku ihindagurika ry’ibihe, umwotsi uvamo ugira ingaruka ku buzima bw’abantu n’izindi.

Abaturage babwiwe ko hari ubundi buryo bwo guteka bakwifashisha butari ubwa gakondo burimo rondereza zigezweho zikoresha ibicanwa bike no gukoresha ibicanwa bisimbura inkwi birimo gaz, amakara nka briquette na pelettes bityo umuturage akabasha kurengera amafaranga menshi yatangaga mu kugura ibicanwa.

Hari amakoperative yahawe amahugurwa ku buryo bwo gutunganya imbabura za canarumwe zirondereza ibicanwa. Mu Karere ka Rusizi hari atatu yatangiye gukorera mu Mirenge ya Nkungu, Nyakabuye na Gitambi.

Umukozi w’Ishami rya REG mu Ishami rishinzwe Ingufu zo guteka, Musoni Théogène, yababwiye ati “Igiti gikenerwa mu bintu byinshi uhereye ku buzima, gifasha n’amatungo kugira ngo abeho. Muzi umumaro wacyo ku matungo. Bityo rero ntabwo gikwiriye kuba aricyo turambirizaho kugira ngo tubashe gucana.”

Bamwe mu batuye mu Murenge wa Gihundwe bavuze ko ubu buryo ari bwiza, nk’uko Tuyizere Joël utuye mu Kagari ka Kagara, usanzwe akoresha gaz mu guteka, yabisobanuye.

Yagize ati “Nishimira uburyo imfasha mu guteka, kandi nta n’ibindi bicanwa njya nkoresha uretse gaz kubera ukuntu igira isuku kandi ikamfasha gukoresha igihe gito mu guteka.”

Mukarugema Béatrice utuye mu Kagari ka Burunga na we yishimiye amakuru y’uko abakora imbabura zirondereza ibicanwa babegereye.

Ati “Nakoreshaga imyase myinshi mu ziko ry’amabuye atatu, ariko ubu ngiye gutangira gukoresha canarumwe kandi nzanabishishikariza bagenzi banjye duturanye.”

Inyigo ya REG igaragaza kugera mu mpera za 2017, Abanyarwanda 10 bari hamwe, umunani baba batekesha inkwi, barimo umwe cyangwa babiri bazitekesha bifashishije rondereza.

U Rwanda rwihaye icyerekezo cy’uko mu 2024 ikigero cyo gukoresha inkwi kizagabanuka kikagera kuri 42%.

Abaturage basobanuriwe ibyiza byo guteka barengera ibidukikije
Imbabura ya Canarumwe iri mu zishobora gufasha abateka kurondereza ibicanwa
Mukarugema Béatrice yishimiye ko abakora imbabura zirondereza ibicanwa babegereye
Tuyizere Joël utuye mu Kagara yavuze ko gutekesha gaz bimubangukira kandi bitekanye
Abatuye mu Karere ka Rusizi basabwe kutarambiriza ku nkwi gusa nk’uburyo bwo gutekesha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza