Abatuye Bannyahe bandikiye Akarere basaba indishyi no gusesa amasezerano yo kwimurwa

Yanditswe na Bukuru JC
Kuya 22 Nyakanga 2019 saa 09:31
Yasuwe :
0 0

Abafite ubutaka mu mugudu wa Kangondo I n’iya II mu kagali ka Nyarutarama mu murenge wa Remera ahazwi nka Bannyahe bandikiye akarere ka Gasabo basaba indishyi y’imyaka igera kuri ibiri bamaze barategujwe ko bagiye kwimurwa ntibikorwe.

Mu gihe ubusanzwe itegeko ryo kwimura abantu ku mpamvu z’inyungu rusange rigena igihe cy’iminsi 120 ngo abimurwa babe bishyuwe, abatuye muri Bannyahe bo bavuga ko bakererejwe kuko igihe cyo kwimurwa kimaze kugera mu mezi 13 kuko igenagaciro ry’imitungo yabo ryatangiye mu Ukwakira 2017.

Mu ibaruwa bandikiye akarere ka Gasabo n’umujyi wa Kigali ndetse na Minisiteri y’Ubutegetsi bw’Igihugu, basabye ko ibyo kwimurwa bihagaragara kuko amasezerano agenga kwimurwa kubw’inyungu rusange atubahirijwe.

Basabye ko bisubirwamo bushyashya, bakongera bagakorerwa n’igenagaciro rishya.

Shikama Jean de Dieu, umwe mu baturage bandikiye Akarere yabwiye Rwanda Today dukesha iyi nkuru ati “Turasaba ko batwishyura indishyi z’ibyacyu byangiritse nkuko bigenwa n’itegeko. Niba bagikeneye gukomeza umushinga wabo, turasaba ko haba ibiganiro bishyashya n’igenagaciro rishya.”

Shikama yavuze ko biteguye kugera mu nkiko mu gihe cy’ukwezi akarere nikatagira icyo gakora kubyo basabye.

Ibyo kwimura abatuye muri Bannyahe bimaze igihe ndetse byageze aho bamwe bajyana Leta mu manza, basaba ko bahabwa amafaranga aho guhabwa inzu nkuko umushoramari yabishakaga.

Ikirego cyabo cyaje guteshwa agaciro n’urukiko ruvuga ko batabanje kugeza ikibazo ku buyobozi bw’Umujyi wa Kigali ngo gikemurwe.

Aba baturage bavuga ko igihe bamaze badahabwa ingurane ku mitungo yabo nkuko amategeko abigena byabateye igihombo.

Turinabo Jean Paul, we arasaba indishyi ya 425 574 Frw y’igihombo yagize mu gihe amaze ategereje kwishyurwa.

Yavuze ko agaciro k’umutungo we mu gihe bimaze kiyongereye, kakava hagati ya 8000 Frw na 12 500 Frw kuri metero kare, kakaba hagati ya 49 700 Frw na 107 000 Frw kuri metero kare.

Itegeko ryo kwimura kubw’inyungu rusange riteganya ko mu gihe habayeho kutishyura mu gihe cyagenwe, uwishyura agomba kongeraho 5 % ku ngurane.

Rivuga ko kandi amasezerano ahita ata agaciro keretse iyo impande zombi zibyemeranyije.

Meya w’Akarere ka Gasabo, Rwamurangwa Stephen yabwiye Rwanda Today ko bakiriye ibaruwa y’abo baturage, icyakora ashimangira ko icyo bazashyira imbere ari ibiganiro.

Mu Busanza mu Karere ka Kicukiro niho hatangijwe ibikorwa byo kubaka inzu 1024 zizahabwa imiryango izimurwa muri Bannyahe nk’ingurane.

Abagera kuri 90 % by’abafite inzu muri Bannyahe ntibemera guhabwa inzu nk’ingurane, ahubwo bifuza amafaranga bakajya kwishakishiriza.

Aba baturage bavuga ko igihe bamaze badahabwa ingurane ku mitungo yabo nkuko amategeko abigena byabateye igihombo.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza