Abatekesha gaz bakomeje kwinubira ibiciro byayo bizamuka ubutitsa

Yanditswe na Cyprien Niyomwungeri
Kuya 19 Gashyantare 2020 saa 04:38
Yasuwe :
0 0

Bamwe mu batekesha gaz mu Rwanda bavuga ko ibiciro byayo bikomeje kwiyongera ubutitsa, aho nko mu kwezi gushize ikilo kimwe cyiyongereyeho amafaranga arenga 150 Frw.

Abacuruza gaz n’abayigura bahuriza ku kuba ibiciro byayo birimo kuzamuka ubutitsa, ku buryo hari n’abavuga ko bikomeje gutya bashobora gusubira ku gucana amakara n’inkwi binengwa kwangiza ibidukikije.

Mukamana Odette wo mu Murenge wa Gisozi, avuga ko mu mpera z’Ukuboza 2019, ikilo kimwe cya Gaz yakiranguraga amafaranga 830 Frw ariko ubu akirangura arenga gato 1000Frw. Ibi ngo bigira ingaruka no ku bakiriya azigurisha.

Ati “Niba icupa ry’ibilo bitandatu nararigurishaga 6000 Frw, ubu ni 7500 Frw, kuko no kurangura byarazamutse. Abakiriya ntibabyumva ku buryo hari n’abahitamo kwigurira amakara kandi bari barayaretse”.

Uwitwa Dan Ngabonziza yanditse kuri Twitter ati “Gaz akamaro kayo tumaze kukamenyera. Ariko se ibiciro ko bikomeza kuzamuha cyane?? Henshi byavuye ku 1000 Frw (ku kilo) ubu biri ku 1300 Frw (Ku kilo). Biraterwa n’iki? Abacuruzi baba babizamura uko bishakiye? Mutubwire”.

Uwitwa Batamuriza Joyce, na we yavuze ko bitumvikana ukuntu abacuruza gaz bazamura ibiciro kandi barasonewe imisoro. Asanga kuba abazicuruza ari isoko bihariye bituma bashyiraho ibiciro bishakiye.

Uwitwa Private Emotions, yasabye Urwego Ngenzuramikorere (RURA), kugena ibiciro bya gaz ikanabigenzura nk’uko bikorwa kuri Lisansi na Mazutu.

Ati “Dear RURA, turemeranya rwose Gaz ni nziza, ariko ibiciro byayo bizamuka umunsi ku wundi uko abacuruzi babishatse, ese kuki ibiciro bya Gaz byo mutabishyiraho ngo munabicunge nk’uko bikorwa kuri Essance na Mazutu”.

Ingingo ya 58 y’amabwiriza agenga ubucuruzi bwa Gaz isukika ikomoka kuri Peteroli mu Rwanda, ivuga ko uwahawe uruhushya rwo kuranguza gaz afite inshingano zo ‘Gukora ku buryo abadandaza be bubahiriza ibiciro bya gaz bitangazwa igihe cyose bibaye ngombwa n’Urwego Ngenzuramikorere’.

Umuyobozi w’Ishami rishinzwe kugenzura Gazi n’ibikomoka kuri Peterori muri RURA, Eng. Rusine Gérard, avuga ko kugeza ubu nta giciro cya Gaz yo gutekesha uru rwego rurashyiraho, bikaba bigendera ku ihangana ku isoko.

Ati “Icyo twakoze twabirekeye isoko aho igiciro cyimanura cyangwa kikizamura bitewe n’ihangana ku isoko rya gaz.”

Eng. Rusine asobanura ko kuba ibiciro bya Gaz bizamuka atari amakosa y’abayizana mu gihugu ahubwo ari izindi mpamvu nabo badafiteho ububasha.

Ati “Buriya ku isoko mpuzamahanga hari igihe na bo bavuga ko bagiye kuzamura igiciro kubera impamvu runaka. Barakizamura bikagira ingaruka ku isoko ryose kugeza mu Rwanda dore ko ari natwe tuyibona bwa nyuma”.

U Rwanda ntabwo rucukura Gaz, ruyikura hanze muri Tanzania na Kenya na bo bakayibona bayikuye ku isoko mpuzamahanga, mu Buhinde, mu Barabu n’ahandi bafite inganda zo gucukura no gutunganya gaz.

Eng.Rusine avuga ko ikindi gishobora kuzamura ibiciro bya Gaz ari uko abayikenera babaye benshi ugereranyije n’iyihari.

Ati “Uko abayikenera babaye benshi niko igiciro kizamuka, uko ari bake niko kimanuka”.

Hashobora kandi no kuzamo nk’impamvu y’intambara cyangwa impuha z’uko igiye kuba. Urugero ni nk’ejobundi habaye ibibazo hagati ya Amerika na Iran. Ibi bishobora kuba byaragize ingaruka ku biciro bya gaz dore ko Iran na yo iyicukura.

Eng.Rusine avuga ko hari icyizere ko ibiciro bya gaz birimo kugabanyuka ku isoko mpuzamahanga ariko kubera ko ituruka kure, iryo gabanyuka rizagera mu Rwanda mu mezi nk’abiri cyangwa kumwe.

RURA yemeza ko mu bihugu bigize Umuryango wa Afurika y’Iburasirazuba (EAC), u Rwanda ari rwo rufite igiciro cya Gaz kiri hasi. Mu 2019, mu Rwanda hinjiye gaz ingana n’ibilo 21 476 000.

Ibiciro bya gaz bikomeje kuzamuka mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .