00:00:00 IGIHE NETWORK KN KINYARWANDA EN ENGLISH FR FRANCAIS

RIB yafashe batatu bitwikiraga imbuga nkoranyambaga bagacucura abaturage

Yanditswe na Nsengiyumva Emmy
Kuya 4 Mutarama 2023 saa 11:37
Yasuwe :

Ubutekamutwe bumaze igihe bukorerwa ku mbuga nkoranyambaga bwahagurukiwe, kuri ubu abagabo batatu bamaze gutabwa muri yombi bakurikiranyweho icyaha cy’ubwambuzi bushukana.

Ku wa 12 Ukuboza 2022, Urwego rw’Igihugu rw’Ubugenzacyaha RIB, rwataye muri yombi Amizero Gloire w’imyaka 27 akurikiranyweho ubwambuzi bushukana, bifitanye isano no gushishikariza no kwizeza abantu inyungu z’umurengera mu gihe bashora amafaranga muri sosiyete yitwa ‘Cavallon Ltd’.

Ku wa 31 Ukuboza 2022 no ku wa 2 Mutarama 2023 nabwo RIB yataye muri yombi Bagire Eugene na Nkuranga Aimable bakekwaho ubwambuzi bushukana, bifitanye isano no gushishikariza no kwizeza abantu inyungu z’umurengera nibashora amafaranga mu byo bita ‘Cryptocurrency ya BITSEC’.

Umuvugizi wa RIB, Dr. Murangira B.Thierry yabwiye IGIHE ko abakora ibi byaha inshuro nyinshi bifashisha imbuga nkoranyambaga bamamaza ngo ‘Ubukire nyabwo’.

Aha niho yahereye asaba abaturarwanda kugira amakenga bakitondera abantu bose babizeza inyungu z’umurengera nyamara bo icyo baba bagamije ari ukubambura.

Ubu butekamutwe bukorwa mu buryo bunyuranye

Ubu butekamutwe bumaze igihe, aho usanga umuntu yifashisha imbuga nkoranyambaga mu kwamamaza ubucuruzi aba avuga ko bwunguka vuba kandi cyane, agasaba abantu gushora amafaranga muri sosiyete ye.

Hari ababikora bakoresheje konti zabo bwite, hari abiba iz’abandi bantu bazwi ugasanga barazifashisha mu kwamamaza ubutekamutwe bwabo, bityo ababa basanzwe bakurikira abo bantu basanzwe bizera bakagwa mu mutego wo guhubukira iri shoramari rivamo kubambura utwabo.

Ku rundi ruhande abatekamutwe nk’aba hari igihe batombora umuntu umwe bakamufasha kwinjira mu manyanga yabo ariko nawe bakamutegeka kwinjizamo abantu benshi mu gihe gito.

Nubwo bikorwa mu buryo butandukanye, muri iyi nkuru tugiye kwibanda ku bukorwa hifashishijwe ikoranabuhanga, aho umuntu asabwa gushora amafaranga agahabwa urubuga yajya akoraho ibimeze nko gukina imikino y’amahirwe uko akinnye akinjiza amafaranga.

Winjiza menshi bitewe n’ayo washoye, ariko uko uyinjije uyabona kuri konti ukamwenyura ntabwo ari ko bigenda iyo ushatse kuyabikuza kuko uwatangije ubwo bucuruzi aba acunganwa no kungukira mu bagannye ubu butekamutwe.

Muri iyi nkuru bigiye kunsaba kwifashisha urugero rw’uwo nzi byabayeho.

Umutekamutwe wabeshye ko atuye mu Bwongereza yahaye inshuti yanjye igishoro cy’ibihumbi 100Frw, amusaba kwinjira mu cyo yise akazi yari atangije mu Rwanda ndetse amusaba ko bitewe n’inyungu byinjiza nawe yakwinjiza abandi.

Nta kabuza uwo musore ukiri muto wari ubonye ibihumbi ijana by’ubuntu byashoboraga kunguka ibihumbi bitanu buri munsi ndetse bishobora no kwiyongera mu gihe yihutiye gukangurira abandi kuyoboka ibi byiswe akazi.

Yahawe ibisobanuro abwirwa ko ikigo ari gukorana nacyo gifite imizi muri Leta Zunze Ubumwe za Amerika ndetse ko cyizewe cyane.

Nyuma y’igihe gito wa musore yari amaze kwinjiza abandi bantu batandukanye biganjemo inshuti ze, kwinjiramo ku muntu bikaba byarasabaga guhera ku madolari 50, 100$, 500$, 1000$,3000$ na 5000$.

Uko washoraga menshi niko werekwaga ko uzajya wunguka menshi. Aba mbere babyinjiyemo beretswe inyungu karahava, ndetse bamwe batekereza ko koko bagiye gukira mu gihe gito

Nyuma y’igihe gito buri wese wari winjiye muri ubu bucuruzi yasabwe kwinjizamo abandi bantu bitaba ibyo akirukanwa.

Umuntu winjiye ashoye munsi ya 100$ we nta muntu yasabwaga kwinjiza, uwa 500$ we yasabwaga kwinjiza nibura abantu 20 bishyura neza 100$ umubare w’abo kwinjiza ukiyongera bitewe n’umubare w’ayo washoyemo.

Ibi byaragoranye kuko benshi bari bafite amakenga, birakaza wa mutekamutwe wari wiyise umushoramari.

Mu rwego rwo kugora abari bamaze kwinjira muri ubu bucuruzi yababwiye ko uburyo bwo kubikuza bugoranye ku buryo abantu babiri aribo gusa bemerewe kubikuza amafaranga yabo.

Mu bantu hafi 40 wabonaga banyotewe no gufata ayabo, umujinya wahise uzamuka bamubwira ko batishimiye ibyo arimo, bamwe bashobora kumuca mu rihumye babikuza ayabo abandi arayagwatira ahita afunga urubuga akenyereye ku mafaranga yabo.

Batatu mu batekamutwe bitwikira imbuga nkoranyambaga batawe muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .