Abasora bashishikarijwe gushaka ubumenyi ku bipimo bishya by’umusoro ku mutungo utimukanwa

Yanditswe na IGIHE
Kuya 10 Ukuboza 2020 saa 03:41
Yasuwe :
0 0

Ikigo cy’Imisoro n’Amahoro (RRA) cyakanguriye abasora gushaka amakuru yerekeranye n’ibipimo bishya mu gihe bandikisha bakanishyura umusoro ku mutungo utimukanwa wa 2020.

Ubu butumwa babuhawe mu gihe biteganyijwe ko kwandikisha umutungo utimukanwa no kwishyura umusoro ku butaka wa 2020 bigomba gukorwa mbere y’itariki ntarengwa yo ku wa 31 Ukuboza 2020.

Ibipimo bishya biri kugenderwaho byagenwe nyuma y’ibyemezo by’Inama Njyanama z’Uturere n’Umujyi wa Kigali, hashingiwe ku Iteka rya Minisitiri rishyiraho ibipimo bisanzwe hamwe n’izindi ngingo ngenderwaho kugira ngo hamenyekane igipimo cy’imisoro gikoreshwa ku bibanza by’ubutaka.

Ibyo bipimo byagenwe hashingiwe ku ngingo ngenderwaho, muri zo harimo icyiciro cy’umujyi ubutaka busoreshwa buherereyemo; urwego rw’iterambere ubutaka busoreshwa buherereyemo; icyo ubutaka busoreshwa bwagenewe ndetse n’ikigero ubutaka bwateguweho ngo bukoreshwe icyo bwagenewe.

Komiseri Wungirije ushinzwe Imisoro yeguriwe Inzego z’Ibanze muri RRA, Karasira Ernest, avuga ku bipimo bishya, yashimangiye ko abaturage bakwiye kubigiraho amakuru ahagije.

Yagize ati “Abasora bakeneye gusobanukirwa uko bifashisha ibipimo bishya by’umusoro ndetse n’ingingo ngenderwaho zakurikijwe bishyirwaho, kugira ngo haveho urujijo rw’uko bagomba kwishyura. Ni yo mpamvu tubashishikariza gukora imenyekanisha no kwishyura hakiri kare kugira ngo birinde gukererwa bakaba bagwa mu bihano.”

Hakurikijwe Iteka rya Minisitiri, ibipimo bishya biri hagati ya 0-300 Frw kuri metero kare, hashingiwe ku ngingo ngenderwaho zavuzwe haruguru.

Ku rundi ruhande, ibipimo ku nyubako byashyizwe mu byiciro hashingiwe ku gaciro k’isoko ry’inyubako; bivuze ko igipimo mu 2020 ku nyubako zo guturamo ari 0.5%, naho ku nyubako z’ubucuruzi ni 0.3% na 0.1% ku zindi.

Habayeho impinduka ku gipimo cya 2020 ugereranije n’umwaka ushize wa 2019, aho igipimo ku nyubako zo guturamo cyari kuri 0.25%, inyubako z’ubucuruzi kuri 0.2%, mu gihe ku zindi nta cyahindutse.

Biteganyijwe ko hazabaho impinduka ku gipimo cy’imyaka ibiri iri imbere, aho mu 2021, ibipimo by’inyubako zo guturamo bizaba biri kuri 0.75%, inyubako z’ubucuruzi kuri 0.4% naho ku zindi ntakizahinduka; mugihe muri 2022, ibiciro by’inyubako yo guturamo bizaba biri kuri 1%, inyubako z’ubucuruzi kuri 0.5%, naho ku zindi bikaguma kuri 0.1%.

Abasora bafite imitungo itanditswe ku musoro ku mutungo utimukanwa bashishikarijwe kwiyandikisha bitarenze ku wa 31 Ukuboza, ku biro by’imirenge iyo mitungo itumukanwa iherereyemo, ariko bashobora no gusaba kwiyandikisha babinyujije ku rubuga rwa RRA arirwo: www. rra.gov.rw.

Kuri uru rubuga kandi, abasora bahasanga amakuru arambuye ku bipimo bishya n’ibyiciro imitungo yabo ibarizwamo.

Abasora beretswe ko bakeneye gusobanukirwa byimbitse uko bifashisha ibipimo bishya by'umusoro ku mutungo utimukanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .