Abasirikare bane ba RDF mu rukiko baregwa gukorana na FLN: Uko urubanza rwagenze

Yanditswe na Rabbi Malo Umucunguzi
Kuya 17 Nzeri 2020 saa 11:58
Yasuwe :
0 0

Urukiko Rukuru rwa Gisirikare rwakomeje kuburanisha abantu 32 bakurikiranyweho ibyaha birimo kurema umutwe w’ingabo utemewe no kuwujyamo, no kugirana umubano na Leta y’amahanga bigiriwe gushoza intambara, byose intego ari ukugirira nabi ubutegetsi buriho, nk’uko Ubushinjacyaha bubarega.

Mu bireguye kuri uyu wa Kane harimo uwitwa Nsigariye Ildephonse, Ndirahira Jean de Dieu, Desiderio Fred na Pte Ruhinda utarafatwa, bari mu itsinda ry’abantu 25 bafatiwe mu mashyamba ya Congo.

Hari n’irindi tsinda rirangajwe imbere na Pte Muhire Dieudonné, ririmo Corporal Kayiranga Viateur, Corporal Dusabimana Jean Bosco, Private Igitego Champagnat n’abasivili Muhire Pacifique na Nzafashwanimana Richard.

By’umwihariko aba basirikare baregwa icyaha cyo gutoroka igisirikare, ubufatanyacyaha mu kugambirira kugirira nabi ubutegetsi buriho cyangwa kubuhirika hakoreshejwe intambara cyangwa izindi mbaraga, kurema umutwe w’abagizi ba nabi no koshya abandi kuwujyamo, no kugira uruhare mu bikorwa by’ishyirahamwe rikora iterabwoba.

UKO IBURANISHA RYAGENZE

16:25 Inteko y’abacamanza isubitse iburanisha rya none hisobanuye abantu babiri gusa mu itsinda rirangajwe imbere na Pte Muhire Dieudonne ku cyaha cyo kurema umutwe w’ingabo utemewe no kuwujyamo, rikazasubukurwa ku matariki ya 20-21 na 28-29 Ukwakira 2020, hiregura bane basigaye. Nyuma yaho, umuntu uzajya yiregura azajya yisobanura ku byaha bisigaye icyarimwe.

16:22 Me Rutebuka abwiye urukiko ko umwanzuro wo kwemera ibyaha bawukoze muri Werurwe, ariko bigeze ku wa 20 Nyakanga Pte Muhire arabihindura avuga ko adashaka kuburana yemera icyaha. Ngo bifuza ko nyuma yo kuburana, urukiko rwazabemerera bagakora undi mwanzuro ukubiyemo ibyifuzo byabo, bagendeye ku buryo baburanye.

16:00 Umushinjacyaha Capt Rugamba abwiye urukiko ko Pte Muhire akwiye kuba atanga ibimenyetso ku mpamvu ahakana ibyo yemeye mu mabazwa yabanje, ariko ntabyo arimo gukora, ndetse ngo mbere yatanze amakuru menshi atakabaye ahakana kuri iyi nshuro.

Byongeye, ngo mu mwanzuro w’umunyamategeko yavuze ko bemera icyaha cyo kujya mu mutwe w’ngabo utemewe, ku buryo yahanishwa igifungo cy’imyaka irindwi, bityo ngo ntakwiye kuba yisubiraho kuri iyi nshuro.

15:56 Umucamanza avuze ko mu mwanzuro umunyamategeko wa Pte Muhire yashyize mu ikoranabuhanga ugaragaza ko yemera ibyaha, bityo kugira ngo abihakane yikureho uburyozwacyaha ku bintu yemeye mbere, agomba gusobanura impamvu abihinduye zirimo agahato ntagobotorwa, kandi akanabitangira ibimenyetso, ariko ngo ntabyo arimo gutanga byumvikana.

15:20 Umwavoka wa Pte Muhire, Me Rutebuka Jean Patrick, avuze ko uwo yunganira ahakana ibyanditswe ko yabwiye umugenzacyaha n’umushinjacyaha ko yemera ibyaha, ku buryo urukiko rwakwemera ko ibyo yavuze mu nzego za mbere bihindutse, ashingiye no ku zindi manza byagiye bibamo, ku buryo urukiko rwazabisuzuma.

14:50 Iburanisha risubukuwe urukiko rukomeza kumva ubwiregure bwa Pte Muhire Dieudonne ku cyaha cyo kurema umutwe w’ingabo utemewe no gushishikariza abandi kuwujyamo.

Avuze ko nta bitero yafatiwemo cyangwa ngo afatanwe intwaro ku buryo byakwitwa ko hari umutwe w’ingabo yari arimo, ko ahubwo icyaha yemera ari ugutoroka igisirikare.

13:55 Umucamanza atanze ikiruhuko, iburanisha rirasubukurwa nyuma y’iminota 30.

13:40 Umucamanza abajije Pte Muhire niba uwamubajije mu Bugenzacyaha cyangwa mu Bushinjacyaha yarigeze amutuka cyangwa hari ibikangisho yamushyizeho, undi ati “Oya.” Ibyo bitumye amusaba ko niba hari irindi yicarubozo yakorewe, yaritangira ibimenyetso.

Pte Muhire ahise atangira kubwira urukiko ko yashyikirijwe ubugenzacyaha nyuma y’amezi atanu afashwe kandi bitaragombaga kurenza iminsi itanu, ariko umucamanza amubwira ko inyandikomvugo no kuba yaratinze kujyanwa mu bugenzacyaha ntaho bihuriye.

Umucamanza Lt Col Hategekimana akomoje ku rubanza rwa Akayezu waburaniye Arusha, wabwiye urukiko ko batinze kumugeza imbere y’urukiko, abacamanza bakanzura ko atari impamvu yatuma arekurwa, ahubwo agomba kuburana, byazagaragara ko hari amategeko atarubahirijwe, akazagabanyirizwa ku bihano.

Umucamanza ati “Nawe komeza tuzashingire ku rubanza rwa Arusha kuko narwo ni urukiko ruri hejuru.”

13:20 Pte Muhire abwiye urukiko ko amajwi yumvishijwe urukiko ko ari aye arimo gushishikariza abantu kujya muri FLN, atayemera, anahakana inyandikomvugo yakoze mu Bugenzacyaha n’Ubushinjacyaha yemera icyaha, avuga ko ibirimo atabyemera.

Gusa umucamanza avuze ko ibintu umuntu yemeye mu nzego ebyiri adashobora kubihindurira imbere y’urukiko, kereka igihe agaragaje ko hari agahato katumye abyemera mu nzego zabanje.

Umucamanza avuze ko mu gihe Pte Muhire adasobanura agahato yashyizeho, kuba ibyo yemeye mu nyandikomvugo bihura n’ibyo Muhire Pacifique bafunganywe yemereye imbere y’urukiko kandi ari we bazanye mu Rwanda, bigaragaza ko hari ukuri kubirimo.

Pte Muhire avuga ko yashyizweho agahato, kuko yafashwe ku wa 11 Nzeri 2018, afatirwa mu karere ka Burera nyuma y’igihe yaratorotse igisirikare, ariko ngo yari yizanye mu Rwanda, ubuzima muri Uganda bumunaniye.

Ngo yageze imbere y’umushinjacyaha wa gisirikare nyuma y’amezi atanu, muri icyo gihe ngo yemezwaga ibyaha, ari nabyo biri mu nyandikomvugo. Gusa umucamanza yamusabye kumutangira ibimenyetso.

13:05 Pte Muhire avuga ko ibyo aregwa atabyemera, ndetse ngo Ubushinjacyaha ntabwo bugaragaza niba hari inama yitabiriye cyangwa ngo abe yarafatanywe intwaro, ku buryo bwavuga ko yafatiwe mu bikorwa by’umutwe wa FLN.

Abwiye urukiko ko Ubushinjacyaha buvuga ko yinjijwe muri FLN na Nsabimana Callixte Sankara, nyamara ngo ubwe mu mu rubanza i Nyanza yaravuze ko nta gikorwa yakoranye na Pte Muhire. Gusa urukiko rumusomeye ibyatangajwe na Nsabimana, ko yavuze ko abasirikare bari benshi ku buryo atapfa kumenya buri wese, cyane ko we atanabaga mu ishyamba.

12:59 Iburanisha rikomereje kuri Pte Muhire Dieudonne uregwa gukangurira abantu kwinjira mu mutwe w’ingabo utemewe, ndetse hari amajwi Ubushinjacyaha bwumvishije urukiko nk’ibimenyetso bimushinja. Bunavuga ko we yabanje kujya mu Bijabo muri RDC mu birindiro by’umutwe wa FLN, aza kuvayo ajya gukorera muri Uganda, ari naho yashakiraga abarwanyi bashya nk’uko abiregwa.

12:35 Umucamanza abajije Muhire Pacifique inyungu yari afite mu kwifatanya na FLN kandi umugore we na Se bari bamubujije, asubiza ko yabonaga neza ko FLN itakuraho ubutegetsi bw’u Rwanda, ati "kujyayo kwari ugushaka amafaranga."

Gusa umucamanza ntanyuzwe, kuko ubwo baganiraga ibyo, ari nabwo FLN yagabaga ibitero muri Nyungwe.

Muhire Pacifique avuga ko bari bamwijeje ko Sankara ari mu Burundi, ku buryo kwinjira muri uwo mutwe byasabaga kunyura muri Tanzania, agakomereza mu Burundi.

12:29 Uwunganira Muhire Pacifique abwiye urukiko ko kuba uwo yunganira yemera icyaha, agasobanura neza uwamukanguriye kujya mu mutwe w’abagizi ba nabi, ibyo yasezeranyijwe n’uko yavuye aho bari batuye n’uko yambutse umupaka agafatwa, bihuye n’ibyo ubushinjacyaha bumurega ku buryo yemera icyaha ndetse agasaba imbabazi, ku buryo bakeneye gukomereza ku bindi byaha.

12:00 Muhire Pacifique abimburiye abandi kwiregura, avuga ko Pte Muhire Dieudonne bahuye mu 2018 amusanze mu rugo muri Uganda, amubwira ko amufitiye akazi ko "kujya mu gisirikare cya Sankara".

Ngo yamubwiye ko akeneye kwirerera abana babiri afitanye n’umugore we, undi amubwira ko hari amafaranga bazamuha azasigira umuryango we, undi arabyemera.

Gusa ngo yabibwiye Se aramuhakanira, anabikojeje umugore we na we arabyanga.

Pte Muhire wari muri Uganda ngo yaje kubwira Muhire Pacifique na we wari muri icyo gihugu ko hari mubyara we Corporal Dusabimana Jean Bosco wari umusirikare muri RDF ukeneye kwambuka akajya muri Uganda, kuko yari afite moto bajya kumutora bahekanye ari babiri, bamaze kwambuka umupaka binjira mu Rwanda bahita bafatwa, ngo nibwo yamenye ko bazina we Muhire ari umusirikare.

Ati "Iyo menya ko ari umusirikare w’u Rwanda kandi akaba yarasize ahekuye u Rwanda, ntabwo nari kwemera kwambukana na we."

11:58: Urukiko rukomereje ku itsinda rirangajwe imbere na Pte Muhire Dieudonné, ririmo Corporal Kayiranga Viateur, Corporal Dusabimana Jean Bosco, Private Igitego Champagnat n’abasivili Muhire Pacifique na Nzafashwanimana Richard, riregwa imikoranire n’umutwe wa FLN.

Umushinjacyaha abwiye urukiko ko Pte Muhire Dieudonne, Muhire Pacifique na Nzafashwanimana Richard bo baregwa kugira uruhare mu cyaha cyo kurema umutwe w’ingabo utemewe, abandi batatu bari mu itsinda rimwe bakaregwa kwemera kujya mu mutwe w’ingabo utemewe.

Umucamanza abamenyesheje ko baregwa kugira uruhare mu kurema umutwe wa FLN wari uyobowe na Paul Rusesabagina, Rukokoma (Twagiramungu Faustin), Nsabimana Callixte ‘Sankara’ n’abandi.

Abaregwa uko ari batandatu bari imbere y'urukiko

11:54 Major Rtd Habib Mudathiru na we uri imbere y’urukiko, avuze ko Pte Ruhinda yari umuyobozi muri P5, ariko aza kurwara aba asabye guhagarika inshingano, ndetse ngo yiteguraga kujya kwivuriza mu Burundi, abanza gutegereza ko Mudathiru wariyo abanza kugaruka mu ishyamba.

Muri icyo gihe ngo haje kubaho ubwumvikane buke, abarwanyi bamwe bashaka gusanga FLN, ku buryo ubwo Mudathiru yajyaga kwivuza, Ruhinda, Kanyemera na bagenzi babo bahise biyomora ku bo bari kumwe.

Ubwo igikundi cya P5 cyerekezaga hafi ya Uganda kikarasirwa i Masisi bamwe bagafatwa bakagezwa mu Rwanda, Ruhinda we ntibazamukanye, ku buryo bishoboka ko yasigaye mu mashyamba ya Congo.

11:42 Mu itsinda ririmo abasirikare muri RDF, Umucamanza Lt Col Bernard Hategekimana ahereye kuri Pte Ruhinda Jean Bosco, we ntabwo yitabye urukiko kuko yahamagajwe ahatazwi kuko ataratabwa muri yombi, urukiko rukaba rusabye Umushinjacyaha kugaragaza uruhare rwe mu byaha aregwa.

Umushinjacyaha avuze ko Pte Ruhinda yari umusirikare muri RDF, mu 2004 atorokera muri Uganda, akomereza muri RNC, atangira ibikorwa byo kwinjiza abantu muri P5, agakora ingendo nyinshi hagati ya Bijabo ahari ibirindiro by’uyu mutwe na Uganda, ahaturukaga abarwanyi benshi.

Umushinjacyaha avuga ko Ruhinda yagize uruhare mu kurema P5, kuko na Mudathiru wari umuyobozi muri uyu mutwe, yawugiyemo amusangayo.

Mu bandi yinjije muri uwo mutwe ngo harimo Rtd Sgt Lubega Ibrahim warwanye muri RPA aturutse muri Uganda, ariko aza gusezererwa mu banyamahanga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .