Abasenateri bakomoka muri FPR Inkotanyi basabwe kwirinda gukurura bishyira mu gihe batora amategeko

Yanditswe na Twarabanye Venuste
Kuya 19 Mutarama 2020 saa 05:23
Yasuwe :
0 0

Umunyamabanga Mukuru w’Umuryango FPR Inkotanyi, François Ngarambe, yasabye Abasenateri 16 bakomoka muri uwo Muryango gushyira imbere inyungu z’umuturage mu nshingano bafite mu Nteko Ishinga Amategeko, avuga ko nubwo bigenda bicika hari abakururaga bishyira mu mategeko batora n’ibibazo bakurikirana mu kazi kabo.

Hashize iminsi mike hatowe abasenateri bashya. By’umwihariko Sena irimo abakomoka mu Muryango FPR Inkotanyi 16. Bafite ifite inshingano zo gukurikirana iyubahirizwa ry’amahame remezo, guhagararira Abanyarwanda no gushyiraho amategeko nkuko biri mu nshingano rusange za sena.

Kuri iki Cyumweru tariki 19 Mutarama 2020 Abasenateri bo mu Muryango FPR Inkotanyi bahuriye ku cyicaro cy’uwo Muryango, mu biganiro bya mbere byo kureba uburyo baba umusemburo wo kuzuza inshingano za Sena.

Ubwo yatangizaga ibyo biganiro, Umunyamabanga mukuru w’Umuryango FPR Inkotanyi, François Ngarambe yibukije Abasenateri ko Umuryango FPR Inkotanyi ushyira imbere ineza y’abanyarwanda kandi ko wiyemeje gukora uko ushoboye ngo umunyarwanda agire imibereho myiza.

Mu butumwa yatanze yavuze ko imirimo ya Sena ikurikiranwa cyane n’abarebera hanze Politiki y’igihugu abasaba kudakora amakosa yakorwaga mu myaka yashize.

Mu buryo buteruye yavuze ko nubwo byacitse hari abatumizaga, mu Nteko Nshingamategeko, abafite umurimo mu nshingano babibariza ku mpamvu umushahara utazamuka kandi bakabaye baganira kuri Politiki ziri mu nyungu rusange z’Abanyarwanda.

Nk’abantu binjiye mu Nteko, yabasabye kutireba igihe batora amategeko, kuko hari ubwo wasangaga mu gihe cyashize batora amategeko ari mu nyungu zabo.

Ati "Iyo ufite amahirwe yo gufata ibyemezo bikureba ugomba kwirinda ko hazamo gukurura wishyira ngo wumve ko byose ari wowe. Nta wiyanga ariko ugomba no kureba ugashyira mu gaciro ukavuga uti mbere yo kugira ngo mbone ibi ngibi hari abadafite n’icya kabiri cy’ibyo mfite reka mbe nihanganye.”

Yakomeje avuga ko byabagaho ko nka Minisitiri w’Abakozi ba leta n’Umurimo atumizwa, ugasanga abazwa ibiri mu nyungu z’abayobozi byerekeye kuzamura ibyo bemererwa.

Ati “Ubundi bajyaga bahamagaraga Minisitiri w’Abakozi ba leta ngo asobanure igituma hari ibintu bitazamuka ku bayobozi bamwe, ukaba wirebyeho cyane. Mbere yo guharanira inyungu zanyu mugomba guharanira inyungu z’Abanyarwanda kandi muba mwarabirahiriye."

Yavuze ko nubwo abasenateri bo mu Rwanda no muri Amerika baba bafite inshingano zimwe ariko badashobora kubaho kimwe kubera ubushobozi bw’igihugu.

Ati “Ntabwo senateri ukiri mutoya wajya gushaka kubaho nk’uko Karangwa abaho [Karangwa Chrysorogue]. Byararangiye ibyo atabonye ntabyo azabona, urwo ni urugero ntanze, hari ibyo ucyubaka.”

Abasenateri bahawe ubutumwa bwo kutirebaho ahubwo bakareba icyo abanyarwanda babashakaho.

François Ngarambe yabibukije ko nk’abahagarariye FPR Inkotanyi bakwiye kuzirikana ibanga ry’uko icyo bamariye abanyarwanda kitazagaragarira mu bwinshi bw’amategeko batoye cyangwa ubushakashatsi bwinshi bakoze.

Ati " Ahanini kugira akamaro ntabwo bireba ngo ni amategeko mwatoye cyangwa se ibiganiro byabaye, ubushakashatsi bwakozwe na Sena. Ni ukureba ibi byagiriye akahe kamaro umunyarwanda.”

Visi Perezida wa Sena Nyirasafari Espérance yavuze ko muri manda yabo bazazirikana impanuro z’Umunyamabanga Mukuru w’Umuryango.

Ati "Tugomba kujya tureba buri gihe inyungu z’abaturage. Mbere yo gukora imirimo twireba twebwe ubwacu kandi tuzabyubahiriza nkuko abidusabye nkuko duhora tubyibutswa."

Senateri Dushimimana Lambert uri muri manda ye ya mbere, yavuze ko ibiganiro nk’ibyo bibafasha kuzirikana indangagaciro zikwiye kuranga Umusenateri ukomoka mu Muryango FPR Inkotanyi.

Ibiganiro nk’ibyo birasanzwe iyo Inteko itangira imirimo haba ku ruhande rw’Abasenateri n’urw’Abadepite.

Umunyamabanga Mukuru w'Umuryango FPR Inkotanyi, François Ngarambe, yasabye Abasenateri 16 bakomoka muri uwo Muryango gushyira imbere inyungu z'umuturage
Senateri Dushimimana Lambert yavuze ko ibiganiro bagira batangiye manda bibafasha kugira impamba nziza y'Imyitwarire ikwiriye Umunyamuryango wa FPR Inkotanyi mu kazi
Umunyamabanga Mukuru w'Umuryango FPR Inkotanyi, François Ngarambe, yabibukije ko icyo bamariye abanyarwanda batazakirebera mu mubare w'amategeko, ibiganiro cyangwa Raporo zanditse neza ahubwo bazareba icyo bagejeje ku baturage
Visi Perezida wa Sena Nyirasafari Espérance yavuze ko bazazirikana impanuro z'Umuryango FPR Inkotanyi muri manda yabo mu Nteko Ishinga Amategeko
Visi Perezida wa Sena Nyirasafari Espérance yavuze ko gukurura wishyira nk'umusenateri ari uguca ukubiri n'indahiro uba wararahiye wemera inshingano

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .