00:00:00 IGIHE NETWORK KN KINYARWANDA EN ENGLISH FR FRANCAIS

Abasaga 35.000 bamaze gukirira ibikomere bya Jenoside muri Gahunda ya Mvura Nkuvure

Yanditswe na Mukahirwa Diane
Kuya 6 Ukuboza 2022 saa 09:24
Yasuwe :

Kimwe mu bintu bituma abanyamahanga bayoberwa ibanga Abanyarwanda bagendana ni uburyo igihugu cyongeye kunga ubumwe nyuma ya Jenoside yakorewe Abatutsi mu 1994, yahitanye ubuzima bw’inzirakarengane zirenga miliyoni.

Nyuma yo guhagarika Jenoside igihugu cyari gifite umukoro ukomeye wo kongera kwiyubaka no komora ibikomere byo ku mutima no ku mubiri byasizwe na yo.

Iyi gahunda yagezweho binyuze mu miryango itandukanye yakoze iyo bwabaga kugira ngo Abanyarwanda bari bamaze kuva mu mahano ya Jenoside yakorewe Abatutsi mu 1994 bongere babe umwe.

Muri yo harimo n’Umuryango utegamiye kuri Leta CBS Rwanda (Community Based Sociotherapy) ufasha Abanyarwanda mu isanamibanire n’isanamitima, hibandwa ku ngaruka batewe n’amateka ya Jenoside, bigakorwa binyuze muri gahunda ya Mvura Nkuvure.

Uyu muryango watangiye mu 2005 ukorera mu turere 12 duherereye hirya no hino mu Rwanda.

Gahunda ya Mvura Nkuvure igera ku Banyarwanda barimo abarokotse Jenoside, abayikoze, abaturanyi babo n’inshuti zabo ndetse n’abana bavutse ku babyeyi bakozweho na Jenoside, bakongera kwiyumvamo urukundo, ubumuntu n’ubuvandimwe.

Bamwe mu banyuze muri iyi gahunda bemeza ko yabafashije kuva mu bwigunge bari baratewe na Jenoside.

Musabyimana Claudine wo mu Karere ka Bugesera yarokotse Jenoside, ntiyabasha kwiyakira kugeza igihe atajyaga kwibuka no kumva indirimbo zijyanye na byo ariko amaze kujya mu matsinda ubuzima bwe bwarahindutse.

Ati “Nari mfite ibikomere bigaragara kuko sinabashaga nko kujya kwibuka no kumva ziriya ndirimbo zica kuri radiyo sinazumvaga, kuko namaraga nk’ukwezi ndira mbabaye kwihangana byaranze.

“Aho gahunda ya Mvura Nkuvure iziye nitabiriye ibiganiro bya mbere numva bitaza. Nageze nko ku cya gatatu ntangira kubona abantu duhuje ibibazo banandusha. Ni bwo nabohotse ntangira kuvuga no gukira ibikomere.”

Yakomeje avuga ko yakize ibikomere kugeza n’ubwo yababariye uwamukoreye Jenoside ubu bakaba babanye mu mahoro.

Ati “Nkijya mu itsinda nabanje guhuriramo n’umuntu wadukoreye Jenoside, ambonye atangira kwikanga ariko nkumva nanjye ndamwikanga. Uko baduhaga ibiganiro byagezeho aravuga, nanjye ndavuga. Ubu arambwira ngo mwana wanjye nkikiriza.”

Nyirabazambanza Rachel na we avuga ko Mvura Nkuvure yafashije benshi gukira ibikomere bari barasigiwe na Jenoside.

Ibi babitangaje mu gihe i Kigali hateraniye Inama Mpuzamahanga y’iminsi itatu igamije kwigira hamwe ku bukangurambaga bushobora gutanga umusaruro muri gahunda y’isanamitima no kwiga ku kibazo cy’uruhererekane rw’ingaruka za Jenoside.

Umuyobozi Nshingwabikorwa wa CBS Rwanda, Nzaramba Lucie, yavuze ko kuva iyi gahunda yatangira yatanze umusanzu ukomeye mu bumwe n’ubwiyunge bw’Abanyarwanda.

Ati “Gushyira abantu mu matsinda bakamara ibyumweru 15 baganira ibikomere byabo, bagasangira umubabaro, twabonye ko bifasha kubohoka ku mutima umuntu agakira ibikomere. Akongera akagira ubudaheranwa, ntaheranwe n’amateka ahubwo agaharanira icyamuteza imbere.”

Yakomeje avuga ko kuva mu myaka 17 ishize “abasaga ibihumbi 35.000 bakize ibikomere basigiwe na Jenoside yakorewe Abatutsi.’’

Ati “Aba bose baciye muri iyi gahunda kandi bavamo bakize.’’

Ku ruhande rw’ Umuyobozi w’Ishami rishinzwe Ubudaheranwa muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), Uwacu Julienne, yavuze ko iyi gahunda yatanze umusanzu ugaragara mu bumwe n’ubwiyunge bw’Abanyarwanda.

Ati “Mu kongera kubaka igihugu nyuma ya Jenoside yakorewe Abatutsi hari byinshi Leta yitaho harimo kongera gusana ibikorwaremezo no gushyiraho gahunda y’imibereho myiza ariko by’umwihariko n’ingamba zo guhangana n’ingaruka za Jenoside cyane ibijyanye n’ubuzima bwo mu mutwe.”

“Hari gahunda za Leta inyuza muri Minisiteri zitandukanye ariko hakaba n’ubufatanye n’imiryango yigenga, Mvura Nkuvure kimwe n’izindi zigira uruhare rutaziguye rutanga umusaruro mu kongera gufasha abarokotse, ababakomokaho n’abayigezemo uruhure kugira ngo twongere twukabe umuryango Nyarwanda wunze ubumwe.”

Mvura Nkuvure ni gahunda yatangijwe mu 2005 cyane nyuma y’Inkiko Gacaca bagira ngo itange umusanzu mu bumwe n’ubwiyunge bw’Abanyarwanda. Igirwamo uruhare n’Itorero Angilikani mu Rwanda na Ambasade y’u Buholandi mu Rwanda.

Umuyobozi w’Ishami rishinzwe Ubudaheranwa muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), Uwacu Julienne, yavuze ko Mvura Nkuvure yatanze umusanzu mu rugendo rw'ubumwe n’ubwiyunge
Musenyeri Rwaje Onesphore yavuze ko Mvura Nkuvure ifite uruare rukomeye muri gahunda y'ubumwe n'ubwiyunge bw'Abanyarwanda
Iyi nama igamije kureba icyatuma uruhererekane rw'ibibazo byasizwe na Jenoside ruhagarara
Bimwe mu bikorwa by'abaturage b'i Rubavu bahuriye mu matsinda ya Mvura Nkuvure byamuritswe muri iyi nama
I Kigali hateraniye inama mpuzamahanga y’iminsi itatu igamije kwigira hamwe ku bukangurambaga bushobora gutanga umusaruro muri gahunda y’isanamitima no kwiga ku kibazo cy’uruhererekane rw’ingaruka za Jenoside
Abitabiriye iyi nama bashishikarijwe no kuzamura ubudaheranwa
Musabyimana Claudine wo mu Karere ka Bugesera yarokotse Jenoside, avuga ko Mvura Nkuvure yamufashije gukira ibikomere no gusubira mu buzima busanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .