Abasaga 1100 bahamwe n’ibyaha byo kunyereza umutungo wa Leta, hagaruzwa miliyari 4.7Frw

Yanditswe na Cyprien Niyomwungeri
Kuya 19 Gicurasi 2020 saa 11:49
Yasuwe :
0 0

Ubushinjacyaha Bukuru bwatangaje ko hagendewe kuri raporo z’umugenzuzi mukuru w’imari ya leta, mu myaka itanu ishize abantu barenga 1100 bahamwe n’ibyaha byo kunyereza no gukoresha nabi umutungo wa Leta, hagaruzwa agera kuri miliyari 4.7Frw.

Mu cyumweru gishize Umugenzuzi Mukuru w’Imari ya Leta yagaragaje ko mu mwaka y’ingengo y’imari warangiye muri Kamena 2019, amafaranga yakoreshejwe nta nyandiko ziyasobanura, ayasesaguwe, ayasohotse nta burenganzira n’ayanyerejwe yageze kuri miliyari 8,6 Frw avuye kuri miliyari 5,6. Frw mu 2018.

Yiyongereye ku kigero cya 51% ugereranyije n’umwaka ushize, bivuze ko yiyongereyeho hafi miliyari eshatu z’amafaranga y’u Rwanda.

Umugenzuzi Mukuru w’imari ya Leta, Obadiah Biraro yavuze ko ‘Ibi bibazo bikwiriye kwitabwaho kuko bishobora kudindiza ishyirwa mu bikorwa rya gahunda y’Igihugu y’Iterambere, NST1’.

Mu kiganiro Imboni Musesenguzi cyatambutse kuri RTV, Ingabire Marie Immaculée, uyobora Umuryango urwanya ruswa n’akarengane, Transparency International Rwanda, yavuze ko kubona hiyongeraho miliyari hafi eshatu ku mafaranga yakoreshejwe nabi ari ikibazo.

Yagize ati “Ku bwacu tubona nta gihinduka cyane ahubwo ndetse rimwe na rimwe bigenda bisubira inyuma. Nk’ubu muri iyi raporo y’uyu mwaka, amafaranga agaragara ko yakoreshejwe mu buryo budasobanutse, butumvikana, butari bwo, yarazamutse kandi mu buryo bukabije. Iki kibazo kigomba gukemuka, ni ikibazo kimaze kurambirana, tuvugaho buri mwaka”.

Umushinjacyaha Mukuru, Aimable Havugiyaremye, yavuze ko nk’ubushinjacyaha iyo umugenzuzi mukuru w’imari ya leta amaze gusohora raporo na bo ayibagezaho bagasuzuma ibibazo aba yagaragajemo kandi bigakurikiranwa.

Yavuze ko ibibazo byose bigaragajwe muri raporo y’umugenzuzi w’imari ya leta byose atari ko biba bigize ibyaha. Gusa mu myaka itanu ishize hakozwe byinshi mu gukurikirana abanyereza n’abakoresha nabi imari ya leta kandi hari impinduka zagiye zibaho nubwo bishoboka ko bidahagije.

Ati “Muri iyi myaka itanu ishize twakurikiye dosiye zigera kuri 928, abantu bahamwe mu nkiko n’ibyaha ni 1187, amafaranga yagarujwe bitegetswe n’inkiko ni miliyari 4 700 000 Frw, ihazabu yaciwe abo bantu bahamwe n’ibyaha ni 2 600 000Frw”.

Yakomeje agira ati “Uyu mwaka duhereye muri Mutarama kugeza uyu munsi Abantu bamaze gukatirwa n’inkiko bahamwe n’ibyaha ni abantu bagera ku 103, bategetswe kugarura amafaranga ageze kuri miliyoni 475Frw, bacibwa ihazabu ingana na miliyoni 861 Frw”.

Havugiyaremye yavuze ko habayeho impinduka kuko mbere hari ibyitwaga amakosa ariko mu itegeko ryo mu 2018, rigenga itangwa ry’amasoko hari ibikorwa byafatwaga nk’amakosa ubu bifatwa nk’ibyaha.

Hari kandi itegeko ryo mu 2018 ryerekeranye no kurwanya ruswa, aho hari ibyaha byagiye bijyamo. Urugero niba umuntu ahamijwe icyaha cya ruswa umucamanza aba ategetswe no kumunyaga umutungo wose uba warakomotse kuri iyo ruswa. Hari abashobora kunyereza umutungo wa leta, bakigwizaho umutungo, iyo bananiwe gusobanura imvano yawo barabibazwa.

Mu mwaka y’ingengo y’imari warangiye muri Kamena 2019, ibigo n’imishinga 165 nibyo byagenzuwe. Ibigo byose byagenzuwe uyu mwaka bingana na 80% by’ingengo y’imari y’igihugu. Umwaka wawubanjirije hari hagenzuwe 86.6% by’ingengo y’imari y’igihugu. Iri gabanuka ryatewe n’icyorezo cya COVID-19 cyatumye hari inzego icyenda zikigenzurwa.

Mu bigo byagenzuwe, ibyagaragaje raporo ntamakemwa (unqualified) ni 33% mu byerekeye gukurikiza amategeko n’amabwiriza naho mu byerekeye imikoreshereze y’umutungo byabaye 55%. Umubare w’ibitekerezo binenga imicungire y’imari (Adverse Opinion) wagabanutseho 3% ugereranyije n’umwaka ushize.

Ahabonetse raporo nta makemwa ahenshi ni mu mishinga, Minisiteri n’izindi nzego z’ubutegetsi bwite bwa Leta kuko byihariye 82%. Ibigo bikora ubucuruzi n’ibindi binini byo raporo nyinshi ntabwo zari zishimishije.

Umushinjacyaha Mukuru Havugiyaremye Aimable yavuze ko gukurikirana abanyereje umutungo wa leta bikomeje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .