Abasaba akazi mu Rwanda bikubye inshuro 14 mu myaka itatu kubera ikoranabuhanga

Yanditswe na Evariste Nsengimana
Kuya 10 Mutarama 2020 saa 10:24
Yasuwe :
0 0

Minisiteri y’Abakozi ba Leta n’Umurimo (MIFOTRA) yatangaje ko mu myaka itatu ishize itangiye uburyo bw’ikoranabuhanga bwifashishwa mu gusaba akazi mu myanya y’ibigo bya Leta hatifashijwe amabaruwa, umubare w’abagasabye wikubye inshuro zisaga 14 kuko bavuye ku bihumbi bisaga 50 bakarenga ibihumbi 700.

Mu 2016 nibwo Guverinoma y’u Rwanda yatangije uburyo bw’ikoranabuhanga mu gusaba akazi buzwi nka E-Recruitment bugamije kunoza imitangire y’ibizamini by’akazi ka Leta.

Ubu buryo burimo aho ushyira imyirondoro yawe n’ibindi byangombwa bisabwa ku myanya y’imirimo runaka, hakaba n’ahashyirwa amatangazo y’akazi ka Leta wabonaho ahahuye n’ubunararibonye bwawe ugasaba akazi utiriwe ugendana ibaruwa ngo uyijyane aho bakeneye umukozi, ahubwo ukazajyayo gusa ugiye gukora ikizamini.

Ni gahunda yaje isubiza ibibazo by’abantu batandukanye bagorwaga no kumenya aho akazi kari cyangwa banahamenya bakarushywa no kujyanayo ibaruwa igasaba, kumenya niba dosiye ye yatoranyijwe mu z’abemerewe gukora ikizamini, kujya kugikora igihe yemerewe, kujya kureba amanota yagize bitewe n’uko ari kure n’izindi mbogamizi.

Umuyobozi ushinzwe imicungire y’abakozi mu nzego za Leta muri Mifotra, Ntagungira Alexis, yabwiye Isango Star ko iri koranbuhanga ryakuyeho izo mbogamizi, bituma umubare w’abasaga gukora ibizamini ku mwaka uzamuka cyane.

Ati “Turebye nko mu mibare, mu mwaka wabanjirije uwo twatangirijemo iri koranabuhnaga, mu myanya 1616 hari hasabye abakandida 54 467 gusa ariko ubu dukoresheje ikoranabuhanga ku myanya 1792, abasabye bonyine babaye ibihumbi 711 630.”

Uretse gufasha abasaba akazi byanafashije leta n’ibigo byayo gucungura amafaranga yakoreshaga mu gutanga amatangazo y’akazi ibinyujije mu binyamakuru. Ntagungira yavuze ko itangazo rimwe kugira ngo rinyuzwe mu kinyamakuru byasabaga ibihumbi nibura 500 Frw.

Ati “Ubwo urumva ufashe nk’imyanya icumi byagera muri miliyoni eshanu ariko ubu icyo kiguzi cyo gutangaza imyanya y’akazi cyavuyeho. Umwanya n’ikiguzi byasabaga ushaka gukora ikizamini byavuyeho, urumva niba uri i Kigali ukajya gusaba akazi i Huye kugira ngo utange dosiye isaba akazi.”

Iri koranabuhanga ritaraza usaba akazi yasabwaga kwandika no gufotoza ibyangombwa birimo indangamuntu, impamyabumenyi n’ibindi azajyana ariko uyu munsi afata mudasobwa cyangwa telefone igezweho akinjizamo ibisabwa byose atavuye aho ari, ikoranabuhanga rizamumenyesha niba yemerewe gukora ikizamini, aho azagikorera n’igihe kizabera.

Bamwe mu bifashije iri korabuhanga bavuga ko ryaborohereje ku rugendo bakoraga bagiye gutanga dosiye isaba akazi nk’igihe babaga bamenye ahari umwanya.

Hari uwagize ati “Byafataga umuntu urugendo, tuvuga nk’uvuye mu Karere ka Nyamagabe mu Ntara y’Amajyepfo, akaza kugasaba hano i Kigali, byamusabaga urugendo runini cyane ariko ubu buryo bwarabyoroheje kuko ubikorera aho uri, upfa kuba ufite internet.”

Gusa ku rundi ruhande iri koranabuhanga ntirirashyirwaho uburyo rishobora gutoranya abakandida bujuje ibisabwa ku mwanya basabira akazi kugira ngo bakore ibizamini, kuko bikorwa n’abakozi ndetse ntikumire burundu ibihuza usaba n’utanga akazi.

Gusa muri Werurwe umwaka ushize, MIFOTRA yatangaje ko igiye gushyiraho uburyo bw’ikoranabuhanga buzajya bwemeza urutonde rw’abafite ibyangombwa byuzuye bibemerera kujya mu kizamini cyanditse cy’akazi.

Ntagungira ati “Turashaka ko ikoranabuhanga ubwaryo ariryo ryitoranyiriza umukandida wujuje ibisabwa, wemerewe gukora ikizamini, cyane cyane n’ibyo gukora ibizamini, turashaka nabyo ikoranabunga ribirangiza ku buryo habaho ikizamini gikozwe mu buryo bw’ikoranbuhanga.”

Komisiyo ishinzwe abakozi ba Leta yagaragaje ko mu mwaka w’ingengo y’imari wa 2016 /17 hashyizwe ku isoko imyanya y’akazi 1616, abantu 54 467 basaba kuyipiganira naho abasaga ibihumbi 40 aba aribo bemererwa kuyipiganira.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza