Canada: Abarokotse Jenoside bamaganye umunyamakuru uherutse guha rugari Judi Rever

Yanditswe na Bukuru JC
Kuya 24 Mutarama 2021 saa 11:06
Yasuwe :
0 0

Abarokotse Jenoside yakorewe Abatutsi baba muri Canada bibumbiye mu muryango, Memory Keepers Association de l’Alberta, bamaganye umunyamakuru wo muri iki gihugu, Stéphan Bureau uherutse gutumira mu kiganiro Judi Rever usanzwe uhakana Jenoside, bemeza ko iki gikorwa kigamije kubashinyagurira no ku bakina ku mubyimba.

Kuwa 7 Mutarama nibwo kuri Radio Canada hatambutse ikiganiro cyatumiwemo umunyamakurukazi wo muri Canada uzwiho inyandiko zihakana Jenoside yakorewe Abatutsi, Judi Rever.

Binyuze kuri iyi Radio, Judi Rever yahawe rugari asobanura igitabo yanditse ashinja FPR Inkotanyi kugira uruhare muri Jenoside yakorewe Abatutsi no mu ihanurwa ry’indege ya Perezida Juvenal Habyarimana.

Muri iki gitabo yise ‘L’éloge du sang, Les crimes du Front patriotique Rwandais’. Judi Rever ashinja FPR Inkotanyi yabohoye igihugu ikanahagarika Jenoside, ko yinjiye mu Nterahamwe ndetse yanagize uruhare mu bikorwa byo kwica Abatutsi.

Rever ngo ashingira kuri raporo y’ibanga y’Urukiko Mpuzamahanga Mpanabyaha rwashyiriweho u Rwanda (TPIR) ariko itagaragara muri icyo gitabo, akanavuga mu Rwanda habayeho Jenoside ebyiri zirimo iyahitanye Abahutu basaga 500 000.

Mu ibaruwa abagize Memory Keepers Association de l’Alberta bandikiye ubuyobozi bw’iyi radiyo ikamenyeshwa Komiseri ushinzwe itangazamakuru muri Canada, Caroline Maynard, bavuze ko babajwe bikomeye n’ibyakozwa na Stéphan Bureau kuko ari nko ku batoneka mu gikomere.

Iti “Kumva ikiganiro cya Judi Rever kuri mikoro za Stéphan Bureau, bongeye kubyutsa ikibi binyuze mu kongera kubyutsa ahahise hacu huzuye ububabare[…] Iki kiganiro cyongeye gufungura ibikomere byacu bitarakira kandi ntitwumva inyungu ziri mu kuba Radio Canada yaremeye iki kiganiro kinagayisha gahunda zayo.”

“Abagize umuryango wacu bagizwe ahanini n’abarokotse Jenoside yakorewe Abatutsi babaye cyane mu myaka 26 ishize, iki kiganiro cyatumye bongera gusubira mu nzira y’umusaraba babayemo muri ibyo bihe by’umwijima. Nta mpamvu yari ihari yo gutuma umunyamakuru Stéphan Bureau agira icyo yongera kuri ibi.”

“Urwango Rever afitiye Abatutsi si urw’ejo, imvugo ze zuzuye ubugome n’inkuru ze zubakiye ku binyoma byarakumiriwe mu binyamakuru byinshi by’I Burayi ariko Bureau yarabyirengagije.”

Muri iyi baruwa abagize Memory Keepers Association de l’Alberta bakomeje basaba ubuyobozi bwa Radiyo Canada gutanga ibisobanuro kuri iki kiganiro cyakozwe n’umunyamakuru wabo.

Bavuze ko ibyakozwe n’iyi radiyo byabibukije ibyakorwaga n’abanyamakuru ba RTLM bashishikarizaga Abahutu kwica Abatutsi, bigatuma mu gihe cy’amezi atatu hapfa abarenga miliyoni.

Muri iyi baruwa bashoje basaba Radio Canada gusaba imbabazi kugira ngo Intero y’Umuryango w’Abibumbye igiri iti ‘Nti bizongere ukundi’ ihabwe agaciro kandi irusheho gutanga umusaruro.

Kuva iki kiganiro cyatambuka Abanyarwanda bari hirya no hino ku Isi by’umwihariko abo muri Canada, ntibahwemye kucyamagana no gusaba Radiyo Canada ibisobanuro.

Mu cyumweru gishize Umuryango w’Abanyarwanda batuye muri Canada nawo wari bandikiye ubuyobozi bwa Radio Canada bagaragaza akababaro batewe n’umunyamakuru wabo, Stéphan Bureau.

Iyi radiyo kandi yasabwe ibisobanuro n’abagize Umuryango w’Ababyeyi n’inshuti z’abarokotse Jenoside yakorewe Abatutsi baba muri Canada, PAGE-RWANDA.

Muri iyi baruwa abagize Memory Keepers Association de l’Alberta bagaragaje agahinda batewe no kuba Judi Rever yarahwe urubuga kuri Radio Canada
Radio Canada yasabwe kwisobanura ku kiganiro yahaye Judi Rever usanzwe uhakana Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .