Abarimu bo mu turere 16 bahembwe umushahara uriho inyongera ya 10%, abasigaye bahawe iminsi itatu

Yanditswe na Ishimwe Israel
Kuya 1 Ukuboza 2020 saa 04:00
Yasuwe :
0 0

Minisitiri w’Intebe, Dr Ngirente Edouard, yatangaje ko muri gahunda yo kongerera abarimu umushahara, abo mu turere 16 bamaze guhembwa mu gihe abo mu turere 14 dusigaye bazahabwa umushahara uriho inyongera bitarenze iki cyumweru.

Yabigarutseho kuri uyu wa Kabiri, tariki ya 1 Ukuboza 2020, ubwo yagezaga ku Nteko Ishinga Amategeko, imitwe yombi, ikiganiro ku bikorwa bya Guverinoma byo mu rwego rw’Uburezi.

Ibi bikorwa byibanze ku byo Leta yakoze muri gahunda ya Guverinoma y’Imyaka irindwi (NST1) yatangiye mu 2017, ikaba izageza mu 2024.

Avuga ku mbaraga Guverinoma yashyize mu kuzamura imibereho ya mwarimu, Minisitiri w’Intebe, Dr Ngirente Edouard, yavuze ko hazamuwe umushahara we ho 10% ndetse hari abamaze kuyabona n’abandi bikaba biri kwihutishwa.

Ati “Abarimu bo mu turere 16 bamaze guhabwa umushahara wabo wongereweho 10%. Hajemo imbogamizi nke ku buryo uturere 16 twamaze kuyaha abarimu, ndetse tukabaha ibirarane byabo. Abo atarageraho ntarenza ku wa Gatanu w’iki Cyumweru.’’

Minisitiri w’Intebe, Dr Ngirente yavuze ko abarimu bari guhembwa hongeweho ibirarane by’amezi yo kuva muri Nyakanga ubwo byemezwaga ko umushahara wa mwarimu ugomba kongerwaho 10 %.

Senateri Mugisha Alexis yashimye intambwe yatewe mu kongera umushahara wa mwarimu ariko asaba ko n’ubundi bakomeza kuzirikanwa.

Ati “Umushahara wa mwarimu uracyari mu mito igaragara muri iki gihugu. Twashimye icyakozwe mu kuwongera ariko ntitwabura no gutekereza ko igihe bikunze uwo mushahara wazongera ukiyongera.’’

Inama y’Abaminisitiri yateranye ku wa 28 Mutarama 2019, ni yo yafashe umwanzuro wo kongera umushahara w’abarimu bo mu mashuri abanza n’ayisumbuye ya Leta.

Ubusanzwe umwarimu ukirangiza amashuri yisumbuye (A2) yahembwaga ibihumbi 44 Frw ku kwezi, urangije icyiciro cya mbere cya kaminuza (A1) agahabwa ibihumbi 90 Frw, mu gihe urangije kaminuza (A0) ahabwa ibihumbi 120 Frw.

Bisobanuye ko nyuma y’uku kongezwa nk’umwarimu wahembwaga ibihumbi 44 Frw, azabona inyongera ya 10% y’amafaranga yari asanzwe ingana na 4400 Frw.

Mu 2019 Sendika y’Abarimu mu Rwanda yagaragaje ko amafaranga bahembwa adahagije ivuga ko nibura umwarimu akenera ibihumbi 150 Frw buri kwezi kugira ngo abashe kugura ibilo 25 by’umuceri, litiro enye z’amavuta yo guteka, ibilo 20 by’ibishyimbo, imiti ine y’amasabune yo kumesa, ibihumbi 20 byo gukodesha inzu, 1000 Frw cyo gukoresha mu rugendo n’amafaranga 1000 Frw y’ifunguro rya buri munsi.

Abarimu bo mu turere 16 ni bo bamaze guhembwa umushahara uriho inyongera ya 10% mu gihe abo muri 14 dusigaye bazahembwa umushahara wabo uriho n'ibirarane bitarenze ku wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .