Abarimu bo mu mashuri ya Leta batujuje ibyangombwa batangiye guhagarikwa

Yanditswe na Iradukunda Serge
Kuya 25 Kanama 2020 saa 10:35
Yasuwe :
0 0

Hashingiwe ku byavuye mu igenzura ryakozwe na Komisiyo y’abakozi ba Leta mu 2018-2019 hagamijwe kugenzura uburyo abarimu bashakwa, uko bashyirwa mu myanya n’uburyo bacungwa, bamwe mu barimu iri genzura ryasanze dosiye zabo zitujuje ibisabwa batangiye guhagarikwa mu mirimo yabo ngo babanze buzuze ibisabwa, bitagenda gutyo bagahagarikwa burundu.

Iri genzura ryakozwe hasuzumwa amadosiye yose y’abarimu bari mu myanya muri buri Karere, hanasuzumwa niba bihura n’urutonde rugaragaza umubare w’abarimu bemerewe kwigisha muri buri Karere (liste de placement).

Ku ikubitiro iri genzura ryakorewe mu turere 11 ariko bikaba biteganyijwe ko mu mwaka wa 2020-2021 rizakomereza mu tundi.

Muri utu turere uko ari 11 iri genzura ryasanze harimo abarimu 146 bize hanze bafite ibibazo bijyanye n’icyemezo cy’ibyo bize ’Equivalence’.

Umunyamabanga nshingwabikorwa wa Komisiyo y’abakozi ba leta Angelina Muganza avuga ko abarimu bafite ibyo batujuje bagomba guhagarikwa.

Yagize ati “Iyo dukoze igenzura ry’inzego noneho tukareba amadosiye y’abakozi ibikwiye kuba birimo nk’ibyo bya Equivalence, dipolome n’indangamuntu, iyo bitarimo dusaba ko bijyamo byaba bitabonetse ubwo nyine umuntu agahagarikwa, icyo twababwira ni ukwegera HEC ikabaha ’Equivalence”

Abagezweho n’iki cyemezo bari mu rujijo

Mu gushyira mu bikorwa ibyavuye muri iri genzura, ku ikubitiro Akarere ka Ngororero kahise kandikira abarimu bagera ku munani kabasaba kuba batanze Equivalence zabo byarenga iminsi itanu bakirukanwa.

Iyi baruwa Akarere ka Ngororero koherereje umwe muri aba barezi barebwa n’iki cyemezo IGIHE ifitiye kopi yanditswe ku wa 11 Kanama 2020, yamusabaga kuba yatanze Equivalence mu minsi itanu itaboneka agasezererwa.

Kuri uyu murezi wize muri kaminuza imwe yo mu gihugu cya Uganda, avuga ko ubu ari mu rujijo kuko Inama y’amashuri makuru na Kaminuza, HEC yamuhaye icyangombwa cyerekana ko impamyabumenyi ye yemewe mu Rwanda akaba ari nacyo yakoresheje asaba akazi ndetse akagahabwa, akaba atumva impamvu uyu munsi yandikiwe asabwa guhagarara.

Yagize ati “Twandikiwe n’Akarere ka Ngororero kadusaba kuzuza ibyangombwa mu gihe cy’iminsi itanu bitaba ibyo tukirukanywa kandi ibyangombwa dusabwa bijyanye n’impamyabumenyi twakuye mu mahanga, twabitanze nk’uko twabihawe n’urwego rubishinzwe rwa HEC ,akaba ari nabyo byangombwa akarere kahereyeho kadushyira mu myanya. Ariko kugeza ubu Komisiyo y’Abakozi ba Leta ikaba itemera icyo cyangombwa twahawe n’urwego rubishinzwe.”

Icyangombwa uyu murezi yahawe na HEC ni ikizwi nka ‘Recognition of Academic qualifications’ mu gihe we icyo asabwa ari Equivalence.

Nyuma yo kubona iyi baruwa uyu murezi hamwe n’abandi barindwi bahuje ikibazo ngo bagiye kuri HEC kugira ngo ibahindurire ibyangombwa ariko ibabwira ko ibyo yabahaye bihagije.

Yagize ati “Twagiyeyo nk’itsinda turi barindwi baratubwira bati ibyangombwa twabahaye n’ibyo akarere kahereyeho kabaha akazi bati ‘nta kibazo twebwe tubafiteho nta nubwo turi kumva ibindi bari kubasaba’ ariko badusezeranya ko bazandikira Akarere bakabwira ibijyanye n’ibyangombwa byacu”.

Iyi minsi aba barezi bahawe n’Akarere ka Ngororero yarangiye ku wa 21 Kanama kuri ubu ‘HEC ikaba itarababwira niba yarandikiye Akarere, ndetse Akarere nako kakaba katarababwira ko kabirukanye kuko iminsi itanu yarenze’, ibintu bituma kugeza ‘uyu munsi batavuga ko ari abakozi cyangwa ngo bifate nk’abantu birukanywe.’

Aba barezi bavuga ko kandi hari abandi bo mu tundi turere bahuje ibibazo batahagaritswe ariko Komisiyo y’abakozi ba Leta yo ikavuga ko ‘Kuba hari abandi batahagaritswe, bidakuraho imyanzuro Komisiyo yagejeje kuri utwo Turere, kuko Komisiyo yabahaye iminsi 30 muri rusange kuba bashyize mu bikorwa imyanzuro yose y’igenzura ireba buri Karere kagenzuwe’.

Komisiyo y’abakozi ba Leta ivuga ko itegereje ko iyo minsi 30 ishira kugira ngo ikore igenzura rigamije kureba niba hari abarebwaga n’iki cyemezo.

Iki nicyo cyangombwa HEC yahaye aba barimu ariko Komisiyo y'abakozi ba Leta ikaba itacyemera
Akarere ka Ngororero kandikiye aba barimu kabamenyesha ko bazahagarikwa nibatabasha kwerekana Equivalence zabo
Hashingiwe ku igenzura ryakozwe na Komisiyo y'abakozi ba Leta abarimu batujuje ibisabwa batangiye guhagarikwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .