Abarimu barenga 6000 bashyizwe mu myanya, haracyakenewe abarenga ibihumbi 20

Yanditswe na IGIHE
Kuya 17 Ugushyingo 2020 saa 12:28
Yasuwe :
0 0

Minisiteri y’Uburezi yatangaje ko icyiciro cya mbere cyo gushyira abarimu mu myanya cyarangiye abagera kuri 6 741 bahawe akazi mu gihe hagikenewe abagera kuri 21 737.

Iki cyiciro cya mbere cyo gushyira abarimu mu myanya kije mu gihe iyi gahunda yagiye irangwamo amakosa atandukanye yatumye isubirwamo bushya ndetse n’abayobozi batatu bo mu Kigo cy’Igihugu cy’Uburezi, REB barimo Dr Ndayambaje Irenée ukiyobora bagahagarikwa.

Harimo ikibazo cy’uko hari abarimu batsinze ntibashyirwe mu kazi mu gihe hari ababonye amanota make bahawe imyanya. Ibi nibyo byatumye hafatwa umwanzuro bisubirwamo.

Mu kiganiro Minisitiri w’Uburezi, Dr Uwamariya Valentine, yagiranye n’itangazamakuru kuri uyu wa 16 Ugushyingo yavuze ko amakosa yari yakozwe muri iyi gahunda yakosowe, ndetse mu gushyira abarimu mu myanya hagenderwa ku turere batuyemo.

Ati “Gushaka abarimu no kubashyira mu myanya, byaratinze ariko ubu byarakunze kandi byagenze neza. Abarimu bashyizwe mu myanya hagendewe ku mashuri basabye kwigishaho ndetse n’uturere batuyemo. Mbere gushyira abarimu mu myanya byarimo ibibazo, ariko byarakosowe, ubu abarimu bamaze kugera mu mashuri yabo.”

Mu mashuri abanza abarimu 3 732 bashyizwe mu myanya mu gihugu hose mu barimu 18 039 bari bakenewe. Ibi bivuze ko hagikenewe abandi bagera ku 14 307.

Mu mashuri yisumbuye abarimu 2 673 bashyizwe mu myanya mu 6 371 bari bakenewe ibi bivuze ko ho hagikenewe abagera ku 3 698.

Mu mashuri y’imyuga n’ubumenyingiro (TVET), abarimu bamaze gushyirwa mu myanya yo kwigisha mu bigo basabye kwigishamo ni 336.

Nk’uko bitangazwa na Minisiteri y’Uburezi abarimu bashya bashyizwe mu myanya mu mashuri y’incuke, abanza, ayisumbuye ndetse n’ay’imyuga n’ubumenyingiro ni 6 741.

Mineduc yatangaje ko abarimu batashyizwe mu myanya byatewe n’uko imyanya batsindiye idahura n’iyo uturere twagaragaje ko dukeneye, bityo bazashyirwa mu mirimo mu cyiciro gikurikiyeho imyanya yabonetse.

Icyiciro cya mbere cyo gushyira abarimu mu myanya gisize abarenga 6000 babonye akazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .