Abarimu 89 bitezweho gufasha u Rwanda kugira ababaruramari b’umwuga kuri ubu bakiri bake

Yanditswe na Evariste Nsengimana
Kuya 8 Gashyantare 2019 saa 08:44
Yasuwe :
0 0

Abarimu 89 bigisha amasomo y’ibaruramari mu bigo 60, bahawe amahugurwa azabafasha kongerera abanyeshuri ubumenyi n’ubunyamwuga bukenewe ku isoko ry’umurimo, no kuzamura umusaruro w’urwego rw’ibaruramari ry’igihugu.

Aya mahugurwa y’iminsi ibiri yasojwe kuri uyu wa Gatanu, bayahawe n’impuguke mu ishoramari zo mu Bwongereza ku bufatanye n’ikigo gishinzwe guteza imbere umwuga w’Ibaruramari mu Rwanda, (iCPAR).

Ni amahugurwa bahawe mu kwigisha gahunda ya CPA (Certified Public Accountant) na CAT (Certified Accounting Technicians), zombi zibemerera kwigisha ishoramari ry’umwuga kandi riri ku rwego mpuzamahanga.

Inzobere y’urugaga mpuzamahanga rw’ababaruramari b’umwuga, watanze aya mahugurwa, Trevor Garriok, yavuze ko uretse kuba bahawe impamyabumenyi zo ku rwego mpuzamahanga, bazungura abanyeshuri ubumenyi bukenewe ku isoko ry’umurimo, bukanafasha igihugu kuzamura urwego rw’ibaruramari.

Umuyobozi ushinzwe amasomo muri iCPAR, Muhire Jean Marie Vianney, yavuze ko amahugurwa azafasha igihugu kubona ababaruramari b’umwuga kuri ubu badahagije.

Ati “Hari gahunda ya Minisiteri y’imari n’igenamigambi y’imyaka 15 iteganya ko buri mukozi wa Leta akwiye kuba afite impamyabushobozi ya CAT. Kugira ngo abigereho, iCPAR yagize igitekerezo cyo gukorana n’ibigo by’amashuri.”

Ibi ngo ni muri gahunda yo gukuraho imyumvire ya bamwe mu banyeshuri batinyaga kwiga izo gahunda bavuga ko zikomera.

Ati “Nk’amashuri y’imyuga n’ubumenyingiro, ntabwo bari basanzwe bigisha CAT ariko ubu twafashe gahunda zabo, tuvangamo izacu kugira ngo abana bajye basohoka bafite ubumenyi bukenewe ku isoko ry’umurimo.”

Umwarimu muri Kaminuza y’u Rwanda ishami ry’icungamutungo(CBE), Mwiza Yvette, wahawe aya mahugurwa, yavuze ko yungutse ubumenyi buzamufasha guha abanyeshuri ubumenyi buri ku rwego mpuzamahanga.

Ati “Abantu benshi biyita abashoramari ariko mu by’ukuri badafite ubumenyingiro bukenewe kugira ngo babe abanyamwuga. Ubu bumenyi rero burafasha abarimu bo mu mashuri yisumbuye na Kaminuza kumenya uko batoza abanyeshuri bakarangiza bafite impamyabushobozi n’icyangombwa kibigaragaza.”

Umwarimu wo mu ishuri rya Cornerstone & Luthien Advisory, Salesius Mutuku, yavuze ko nyuma yo guhugurwa, agiye gutanga amasomo akurikiye integanyanyigisho irimo gahunda nshya, abanyeshuri bakazarangiza ari abanyamwuga mu ibaruramari.

ICPAR ivuga ko yatangiye gukorera mu Rwanda mu 2008 hari abanyarwanda 39 bujuje ibisabwa mu ibaruramari ry’umwuga, ubu bakaba ari 521, intego ikaba ari ukugira 5000 mu myaka itanu.

Abahuguwe bahawe impamyabushobozi
Ubwo abarimu bahugurwaga
Bamwe mu barimu bahawe amahugurwa y'ibaruramari ry'umwuga
Inzobere y’urugaga mpuzamahanga rw’ababaruramari b’umwuga, watanze aya mahugurwa, Trevor Garriok, yavuze ko uretse kuba bahawe impamyabushobozi zo ku rwego mpuzamahanga, bazungura abanyeshuri ubumenyi
Umuyobozi ushinzwe amasomo muri Icpar, Muhire Jean Marie Vianney, yavuze ko amahugurwa azafasha igihugu kubona ababaruramari b’umwuga kuri ubu badahagije
Umwarimu muri Kaminuza y’u Rwanda ishami ry’icungamutungo(CBE), Mwiza Yvette, wahawe aya mahugurwa, yavuze ko yungutse ubumenyi buzamufasha guha abanyeshuri ubumenyi buri ku rwego mpuzamahanga
Umwarimu wo mu ishuri rya Cornerstone & Luthien Advisory, Salesius Mutuku, yavuze ko nyuma yo guhugurwa, agiye gutanga amasomo akurikiye integanyanyigisho irimo gahunda nshya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza