Abarimo abakozi ba Leta n’abayobozi b’imidugudu bahaniwe kutubahiriza amabwiriza yo kwirinda Coronavirus

Yanditswe na Bukuru JC
Kuya 11 Kanama 2020 saa 01:24
Yasuwe :
0 0

Minisiteri y’Ubutegetsi bw’Igihugu (Minaloc), yatangaje ko mu bahaniwe kutubahiriza amabwiriza yo kwirinda COVID-19, hagati y’itariki 31/07 - 08/08/2020, harimo abakozi ba Leta n’abayobozi b’imidugudu 14.

Mu gihugu hose, hari utubari twafunzwe 898, abafatiwe mu tubari ni 3522, ibinyabiziga byafashwe ni 1497, abatubahirije intera ya metero imwe ni 8716, abagendaga nyuma ya saa tatu ni 18429, abatari bambaye agapfukamunwa ni 19508.

Minaloc yagize iti “Tukaba dukomeje gushishikariza Abaturarwanda bose gukomeza kubahiriza ingamba zashyizweho mu rwego rwo kwirinda Coronavirus”.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Polisi y’Igihugu iherutse gutangaza ko yasanze hari bamwe mu bantu badohotse bakarenga ku mabwiriza yo kurwanya COVID-19, aho ni nk’ahahurira abantu benshi harimo amasoko, insengero, ubukwe, ibiriyo, restaurants, muri za gare n’ahandi hatandukanye hakunze guhurira abantu.

Umuvugizi wa Polisi CP Jean Bosco Kabera avuga ko ibi byose bishobora gutuma imibare y’abanduye icyorezo cya COVID-19 ndetse n’imfu zigikomokaho biri kwiyongera, ibi bikaba byasubiza abantu muri gahunda ya Guma mu Rugo.

Yasabye abaturarwanda gucika ku muco wo gukorera ku jisho bacungana n’abapolisi ahubwo bakumva ko kwirinda COVID-19 biri mu nyungu za buri muntu ndetse no kurengera ubuzima bwa benshi.

Ati “Ntabwo bikwiye ko umuntu uwo ariwe wese yubahiriza amabwiriza yo kwirinda icyorezo aruko abonye umupolisi, abantu dukwiriye kwirinda gukorera ku jisho kuko atari umuco mwiza. Kurikiza amabwiriza ku mahitamo yawe kuko ari inshingano zawe zo kwirinda no kurinda abandi turengera ubuzima bwacu twese.”

Tariki 14 Werurwe 2020 nibwo Minisiteri y’Ubuzima yemeje ko Umuhinde wageze mu gihugu ku wa 8 Werurwe 2020 avuye i Mumbai, yasanganywe icyorezo cya COVID-19 giterwa n’agakoko gashya ka Coronavirus.

Kuva COVID-19 igaragaye mu Rwanda, hamaze kuboneka abantu 2152 bayanduye mu bipimo 304 500 bimaze gufatwa. Muri bo 1392 barasezerewe nyuma yo gupimwa bagasangwa nta bwandu bwayo bukiri mu maraso yabo mu gihe 753 bakirwaye. Abantu barindwi nibo bamaze guhitanwa n’iki cyorezo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .