00:00:00 IGIHE NETWORK KN KINYARWANDA EN ENGLISH FR FRANCAIS

Abarenga 617 baguye mu mpanuka mu 2022

Yanditswe na Thamimu Hakizimana
Kuya 8 Ukuboza 2022 saa 03:31
Yasuwe :

Polisi y’u Rwanda yatangaje ko kuva umwaka wa 2022 watangira, abantu 617 bamaze kuburira ubuzima mu mpanuka 9468 zabereye mu bice bitandukanye by’igihugu.

Ibi byatangajwe uri uyu wa Kane tariki 8 Ukuboza 2022 n’Umuyobozi wa Polisi y’u Rwanda, IGP Dan Munyuza mu muhango wo gusubukura gahunda yo kwirinda impanuka zo mu muhanda ya Gerayo Amahoro.

Dan Munyuza yavuze ko muri aba bantu bose 617 bishwe n’impanuka, 150 bishwe na moto, mu gihe 183 bo bazize amagare, anaboneraho gusaba abamotari n’abanyonzi kubahiriza amategeko yo mu muhanda.

Yagize ati “Kuva uyu mwaka watangira kugeza uyu munsi imibare mfite igaragaza ko habaye impanuka 9468, birababaje kuko muri izo mpanuka zahitanye ubuzima bw’abantu 617 aho muri abo bantu abazize za moto yaba abamotari n’abagenzi ni 150 mu gihe abahitanywe n’impanuka bari ku magare, batwaye amagare ari abanyonzi cyangwa abagenzi ari 183.”

Yongeyeho ko n’ubwo iyi mibare y’abazize impanuka muri uyu mwaka wa 2022 ari myinshi yagabanyutse cyane kubera gahunda zitandukanye za leta zirimo gushyira camera zigenzura ibinyabiziga bifite umuvuduko na gahunda ya Gerayo Amahoro igamije kwigisha abashoferi kubahiriza amategeko yo mu muhanda.

Umumotari Habarurema Emmanuel, yabwiye IGIHE ko bishimiye ko ubu bukangurambaga bwa Gerayo Amahoro bwongeye gusubukurwa kubera ko butuma n’abatazi amategeko y’umuhanda bayamenya.

Ati “Ubu bukangurambaga ni bwiza kuko nk’uku tuba twaje n’utazi itegeko runaka ryo mu muhanda bituma arimenya cyane ko n’abagenzi nabo bigishwa kubahiriza amategeko yo mu muhanda bigatuma immpanuka zigabanuka.”

Umunyonzi witwa Kayibanda Innocent, yavuze ko we na bagenzi be bagiye gutangira kubahiriza amategeko yo mum uhanda.

Ati “Natwe nyuma yo kumva ko aritwe ba mbere twagize uruhare mu mpanuka nyinshi zabaye muri uyu mwaka twiyemeje kwikubita agashyi rwose.”

Ubu bukangurambaga bwa Gareayo Amahoro bwabereye mu bice bitandukanye by’Igihugu ndetse biteganyijwe ko mu Cyumeru gitaha buzakomereza mu baturage, aho polisi izaba iri kubasobanurira uko bakwiye kugendera mu muhanda.

Umuyobozi wa Polisi y’u Rwanda, IGP Dan Munyuza yasabye abamotari n'abanyonzi kubahiriza amategeko y’umuhanda mu rwego rwo kwirinda impanuka
Abamotari bishimiye ko ubukangurambaga bwa Gerayo Amahoro bwasubukuwe nyuma ya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .