00:00:00 IGIHE NETWORK KN KINYARWANDA EN ENGLISH FR FRANCAIS

Abarenga 3000 batsindiye Permis muri uku kwezi: Ishusho y’ibizamini bimaze gukorwa

Yanditswe na Cyprien Niyomwungeri
Kuya 31 Ukuboza 2022 saa 11:37
Yasuwe :

Polisi y’Igihugu yatangaje ko mu bantu barenga 7000 bakoreye impushya za burundu zo gutwara ibinyabiziga mu Ukuboza 2022, abarenga 3000 bazitsindiye, igasaba abashaka gukora ibizamini by’impushya kwitegura neza uko bikwiye.

Polisi y’Igihugu n’urubuga Irembo bakoze amavugurura mu kwiyandikisha gukorera impushya z’agateganyo n’iza burundu zo gutwara ibinyabiziga aho ubu bikorwa igihe cyose. Gukora ibizamini nabyo byegerejwe ababishaka aho hoherejwe abapolisi kuri buri ntara bakoresha ibizamini, mu Mujyi wa Kigali hakaba hari amatsinda atatu.

Imibare ya Polisi y’Igihugu yerekana ko kuva kuwa 14 Ugushyingo kugeza kuwa 24 Ukuboza 2022, abakorera impushya z’agateganyo kuri mudasobwa biyandikishije ni 130,269, abamaze gukora ni 43,270 abatsinze ni 20,969 ni ukuvuga 48% naho abatsinzwe ni 22,301 bangana na 52%.

Abakorera impushya z’agateganyo ku mpapuro hiyandikishije 12,959 hakoze 721 hatsinda 264 ni ukuvuga 50.4% hatsindwa 357 ni ukuvuga 49.6%.

Abakorera impushya za burundu n’izisumbuyeho biyandikishije ni 113,106 abamaze gukora ni 7419 hakaba haratsinze abantu 3232 ni ukuvuga 43% hatsindwa 4187 ni ukuvuga 57%.

Mu kiganiro na IGIHE, Umuvugizi wa Polisi y’Igihugu, CP John Bosco Kabera, yavuze ko abatsinze berekana ko iyo wize neza uzi ibyo ukora utsinda, agacyebura abumva ko baziyigisha bakajya mu bizamini ko bidashoboka.

Ati “Ibi bigaragaza ko warize amategeko uba ubizi ukabikora atari ukuvuga ngo ngiye kugerageza amahirwe yanjye. Ukwiye kutagerageza amahirwe ujya gukorera uruhushya rukwemerera gutwara ikinyabiziga”.

CP Kabera avuga ko abatsinzwe ahanini biterwa no gushaka kwiga ibizamini ntibige muri rusange no kwiga igihe gito, akabasaba kujya mu mashuri bakitonda bakiga bakamenya bakabona kujya mu bizamini.

Akajagari mu mashuri yigisha ibinyabiziga

Abantu benshi bakomeje kugaragaza ko imikorere y’amashuri yigisha amategeko y’umuhanda no gutwara ibinyabiziga irimo akajagari kenshi, ku buryo biri no mu bituma abantu benshi batsindwa ibizamini by’impushya zitandukanye zo gutwara ibinyabiziga.

CP Kabera yemera ko aka kajagari gahari kandi gakomeye cyane aho amashuri usanga icyo agamije atari ukwigisha abantu kugira ngo bamenye amategeko y’umuhanda no gutwara ikinyabiziga ahubwo ari inyungu z’amafaranga babibonamo.

Avuga ko bigaragarira mu masaha make abantu biga, kwamamaza kurimo kubeshya nk’aho hari abavuga ko bigisha amategeko y’umuhanda icyumweru kimwe no kwigisha abantu ibizamini bagera mu muhanda bamaze kubona permis ugasanga imyitwarire yabo ihabanye n’iyateganyijwe mu muhanda.

CP Kabera asanga hakwiye kujyaho itegeko rigenzura aya mashuri, bikagendana n’uko integanyanyigisho zayo zirimo kuvugururwa.

Ati “Natwe turumva ko hajyaho itegeko riyagenzura kuko ubu nubwo yiyandikisha muri RURA hari n’ayiyandikisha nka koperative cyangwa abikorera”.

Iyo witegereje imibare y’abakorera Permis, usanga abenshi ari abatsindwa. Aha niho bahera bavuga ko Permis y’u Rwanda ari ingume ibona umugabo igasiba undi.

CP Kabera avuga ko Permis y’u Rwanda ibona umugabo wize amategeko y’umuhanda, akiga gutwara ibinyabiziga agakora ikizamini akagitsinda nk’uko amategeko abiteganya.

Ati “Biriya bitekerezo by’abatekereza ko permis yo mu Rwanda ikomeye, nonese ubundi wajya gukorera permis yo gutwara ikinyabiziga mu muhanda uzi n’uburyo iyo utagitwaye neza uhungabanya umutekano ‘bikaba ari ukugenda ukayisanga hariya ku meza ukayiterura ukayisinyira ukayitwara? Ntabwo ari byo”.

Akomeza avuga ko Permis yo mu Rwanda igomba guhabwa agaciro nk’uko amategeko yabiteganyije ku buryo uyifite aho ayijyanye bayemera kuko iba yabonetse mu mucyo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .