Iyi nama iri kubera ku cyicaro gikuru cya FPR Inkotanyi, i Rusororo mu Mujyi wa Kigali, ifite insanganyamatsiko igira iti ’Guhanga ibishya bishingiye ku mahame n’indangagaciro biranga Abanyamuryango n’Abanyarwanda muri rusange’.

Umuyobozi Mukuru Wungirije w’Umuryango FPR Inkotanyi, Bazivamo Christophe, yavuze ko iyi nama iteranye mu gihe hizihizwa isabukuru y’imyaka 35 uyu muryango umaze ushinzwe.

Ati "Birumvikana ko biduha amahirwe yo kwisuzuma, ariko tunasuzuma ibyo twagezeho muri iyo myaka yose ishize, tukajya inama twungurana ibitekerezo ku cyerekezo cyacu twihaye."

Yavuze ko u Rwanda Abanyarwanda bifuza umuntu ashobora kubyumva mu buryo butandukanye, ariko Umuryango FPR Inkotanyi n’abanyarwanda muri rusange bafite ibyo basangiye.

Ati "Ni iterambere mu bushobozi, imibereho myiza y’abaturage, ubushobozi bwo kurushanwa mu ruhando rw’amahanga, kwishyira hamwe mu gihugu, ubuhinzi bubyara ubukungu."

Yasabye urubyiruko gutekereza ku byo abantu bagomba kwirinda, ibyo kwitaho ndetse n’ibyo abantu bose bashobora kugiramo uruhare, ibikozwe none bikazubakirwaho ejo, atari ukubaka uyu munsi ngo ejo basubire inyuma babisenye.

Ni ibintu Bazivamo avuga ko byose bikorwa n’inzego zubatse neza zisobanutse kandi abazirimo bafite indangagaciro Abanyamuryango n’Abanyarwanda bose bakwiye kuba bafite.

Ati "Nk’urubyiruko mufitemo uruhare runini kuko mufite imbaraga kandi tubatezeho ejo n’ejo bundi hameze neza. Ni yo mpamvu igihugu cyacu gishyira imbaraga zihagije mu kubaka urubyiruko rutegurwa, kugira ngo ejo n’ejo bundi mukomeze mwubakire ku byagezweho, muhanga udushya tuganisha ku iterambere."

Yakomeje agira ati "Mufite imbaraga, mufite ubwenge n’umutima wo gukunda igihugu no kucyitangira igihe bibaye ngombwa. Twifuza ko urubyiruko mwese mugira icyo cyerekezo."

Bazivamo yavuze ko igihe urubyiruko rwaba rufite imyumvire n’umutima wo kwitangira igihugu igihe bibaye ngombwa, byatuma igihugu kigera ku iterambere kandi kikagira ishema.

Yavuze ko abari muri iyi nama bahagarariye abandi benshi bangana na 70% by’Abanyarwanda, bityo ibyo bakora bagomba kwibuka ko batoranijwe ngo bahagararire abandi.

Muri iyi nama haratangwa ibiganiro bitandukanye bigaruka ku byagezweho ndetse n’uruhare rw’urubyiruko rushamikiye ku Umuryango FPR Inkotanyi, mu guteza imbere igihugu no gukora neza kugira ngo abandi babarebereho.

Urubyiruko rwagaragaje morale iri hejuru mbere y'inama

Ibyishimo byari byose ku bitabiriye iyi nama

Yafataga ifoto y'urwibutso rw'uyu munsi udasa n'iyindi

Iyi nama yitabiriwe n'urubyiruko rusaga 2000

Minisitiri w'Urubyiruko Rosemary Mbabazi ni umwe mu bitabiriye iyi nama

Iyi nama yitabiriwe n'urubyiruko rwaturutse hirya no hino mu gihugu

Visi Chairman wa FPR Inkotanyi Bazivamo Christophe n'Umunyamabanga mukuru w'Uyu muryango, François Ngarambe, bagera ahabereye inama

Visi Perezida w'Umuryango FPR Inkotanyi , Bazivamo Christophe n'Umunyamabanga Mukuru Ngarambe François

Visi Perezida w'Umuryango FPR Inkotanyi , Bazivamo Christophe yashimiye urubyiruko rwitabiriye

Bazivamo yavuze ko uyu aba ari umwanya wo kwisuzuma no gufata ingamba nshya

Minisitiri w'Ubumwe bw'Abanyarwanda n'Inshingano Mboneragihugu Dr. Jean Damascène Bizimana aganiriza urubyiruko

Minisitiri w'Ikoranabuhanga na Inovasiyo, Ingabire Paula ni umwe mu batanze ikiganiro muri iyi nama Nkuru

Hashyizwemo morale , urubyiruko rwishimira ibyagezweho

Amafoto: Igirubuntu Darcy