Abapolisi b’u Rwanda 160 bagiye mu butumwa bw’amahoro muri Sudani y’Epfo

Yanditswe na Uwimana Abraham
Kuya 4 Ugushyingo 2020 saa 01:24
Yasuwe :
0 0

Mu gitondo cyo kuri uyu wa Gatatu, Itsinda ry’Abapolisi b’u Rwanda 160 rigizwe n’umubare munini w’abagore, ryahagurutse ku kibuga cy’indege mpuzamahanga cya Kigali i Kanombe ryerekeza muri Sudani y’Epfo mu butumwa bwo kubungabunga amahoro.

Iri tsinda ry’Abapolisi riyobowe na SSP Jeannette Masozera, rizamara umwaka umwe muri iki gihugu. Mbere yo guhaguruka abagize iri tsinda bose babanje gupimwa icyorezo cya Covid-19, ndetse bamara iminsi 14 baba ahantu hamwe bonyine.

Umuyobozi wa Polisi y’u Rwanda, IGP Dan Munyuza, yasabye aba bapolisi bagiye mu butumwa bwo kubungabunga amahoro kuzarangwa n’indangagaciro z’u Rwanda, kubahana ndetse no kuzakora neza akazi bazaba bashinzwe kandi kinyamwuga.

Aba bapolisi bagiye gusimbura abamazeyo umwaka umwe urenga nabo bari bugere i Kigali bavuye muri Sudani y’Epfo uyu munsi bayobowe na SSP Jackline Urujeni.

Muri ubu butumwa bwo kubungabunga amahoro, Abapolisi b’u Rwanda baba bafite inshingano zirimo kurinda abayobozi bakuru, guhosha imvururu mu baturage, kurinda abakuwe mu byabo kubera umutekano muke, kurinda ibikorwaremezo by’ingenzi byo muri iki gihugu, gukora amarondo no guherekeza abayobozi n’indi mirimo itandukanye.

U Rwanda rufite amatsinda atatu muri Sudani y’Epfo, agizwe n’abapolisi 560, muri bo harimo amatsinda abiri agizwe n’abapolisi 160

Abapolisi b'u Rwanda 160 biganjemo abagore berekeje mu butumwa bwo kubungabunga amahoro muri Sudani y'Epfo
Basezerwaho n'abayobozi babo bakuru
SSP Jeannette Masozera asezera mbere y'uko bahaguruka berekeza muri Sudani y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .