00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri hafi ibihumbi 230 batangiye ibizamini bya Leta

Yanditswe na Akayezu Jean de Dieu
Kuya 18 July 2022 saa 10:24
Yasuwe :

Abanyeshuri 229. 859 basoje amashuri abanza batangiye ibizamini bya leta, bigomba kubahesha uburenganzira bwo kwimukira mu mashuri yisumbuye mu gihugu.

Ni ibizamini byatangiye gukorwa kuri uyu wa 18 Nyakanga 2022, bikazarangira ku wa 20 Nyakanga 2022.

Minisitiri w’Uburezi, Dr Uwamariya Valentine yatangirije ku mugaragaro ibi bizamini ku Rwunge rw’Amashuri rwa Nyagasambu mu Murenge wa Fumbwe, Akarere ka Rwamagana.

Kuri iri shuri hateraniye abanyeshuri 633 baturutse ku bigo bine birimo Rwamashyongoshyo Parents School, GS Runyinya, Nyagasambu Vision na GS Nyagasambu. Barimo abahungu 301 n’abakobwa 332.

Minisitiri Uwamariya yabwiye aba banyeshuri ko aya ari amahirwe akomeye ari imbere yabo kuko bagiye kwimuka bava mu cyiciro kimwe bajya mu kindi.

Yabwiye abanyeshuri ati "Mumaze imyaka itandatu mwitegura iki kizamini kigiye kubakura mu cyiciro kimwe kikabashyira mu kindi. Muri make ni ukwitegura kujya mu cyiciro cy’abantu bakuru."

"Mugomba rero kubifata nk’ikintu cyiza mbere na mbere ariko na none ntimugifate nk’ikintu kidasanzwe kubera ko ibizamini musanzwe mubikora. Iki ngiki aho gitandukaniye ni uko ari cyo kibaha uburenganzira bwo kwimuka mu cyiciro kimwe mujya mu kindi."

Minisitiri Dr Uwamariya yavuze ko muri rusange uyu mwaka abanyeshuri biteguye neza bitandukanye n’uko byari bimeze mu myaka ibiri ishize, aho icyorezo cya Covid-19 cyagiye kizana impinduka mu myigire yabo.

Ati "Uyu mwaka wagenze neza tugereranyije n’umwaka wabanje nubwo Covid-19 igihari ariko ntabwo byigeze bihagarika amasomo, umwaka wagenze neza urangirira igihe, turizera ko n’umusaruro w’abanyeshuri uziyongera."

Yasabye ababyeyi n’abayobora amashuri kugenzura kugira ngo ntihagire umwana ucikanwa n’ikizamini ngo avutswe amahirwe yo kugira ahazaza heza.

Umuyobozi ushinzwe ubugenzuzi ahari gukorerwa ibizamini, Uwizeye Emmanuel, yavuze ko imico y’abanyeshuri bakopera cyangwa abarimu bashobora kubibafashamo bagomba gukora ibishoboka byose bakayirwanya.

Ati "Twateguye abanyeshuri neza ku buryo bagomba gukora ikizamini mu mutuzo nta kibazo kandi ugendeye ku bizamini baba bamaze igihe bakora baba biteguye kuba bakora ikizamini cya Leta nta kibazo kibaye. Ikindi n’abagenzura, abashinzwe umutekano n’abandi twese turiteguye."

Abarimu bakopeza abanyeshuri bihanangirijwe

Minisitiri Dr Uwamariya yavuze ko mu myaka yatambutse uretse kuba abanyeshuri bashobora gufatwa bakopeye ariko hari n’abarimu bagaragaweho imico mibi irimo gukopeza abanyeshuri.

Ni ibintu avuga ko bidakwiye kuko abanyeshuri baba bamaze imyaka bitegura ibizamini bityo baba bakwiye gusuzumwa kugira ngo harebwe ubumenyi bahawe batagombye gukopera. Avuga ko yaba umwarimu cyangwa umunyeshuri uzafatwa azabihanirwa mu buryo bukomeye.

Ati "Iyo tugeze ku munsi w’ibizamini, kwigisha biba byararangiye igisigaye ari ugusuzuma, icya mbere rero abanyeshuri baba barasobanuriwe amabwiriza y’uko bagomba kwitwara, iyo byabaye ibizamini rero twirinda ko hagaragara n’imico itari myiza, ni ko navuga."

Yakomeje agira ati "Ntitwifuza ko hari ahagaragara abanyeshuri bakopera kuko na byo bijya bibaho, ndetse no mu myaka yashize hariho n’abarimu bajyaga bakopeza abanyeshuri, iyo mico rero yose barabiganirijwe ku buryo bitazongera kubaho. Twishimira ko ibizamini bikorwa uko byateganyijwe kandi n’izo mbogamizi ntizibeho."

Uwizeye Emmanuel usanzwe ari n’Umuyobozi w’Ishuri ry’Urwunge rw’Amashuri rwa Karenge, yavuze nubwo hari aho iyo mico mibi ishobora kugaragara ariko hari ingamba zafashwe ku buryo hatagira ukopera cyangwa ngo afashe umunyeshuri gukopera.

Ati "Maze imyaka ine, nkora ubugenzuzi kuri iyi ‘site’, mbere na mbere abarimu tuba twarabaganirije ndetse n’abanyeshuri ejo twaganiriye na bo ku buryo iyo mico yo gukopera itagomba kubaranga."

Yakomeje agira ati "Kubera ko n’abana baba bavanze baturutse ku bigo bitandukanye, hagize nk’umugenzuzi ushaka gufasha umwana umwe, bagenzi be barabigaragaza kandi natwe tuba duhari dukomeza kuzenguruka dukurikirana kugira ngo turebe ko nta kibazo gishobora kuvuka mu bizamini."

Muri rusange abanyeshuri 429.151 basoza ibyiciro bitandukanye mu Mashuri Abanza n’Ayisumbuye, bagiye gukora ibizamini bya Leta.

Ni mu gihe ibizamini bisoza icyiciro rusange by’amashuri yisumbuye bizatangira ku wa 26 Nyakanga - 2 Kanama, ibizamini bisoza amashuri yisumbuye bikazaba hagati ya tariki 26 Nyakanga - 5 Kanama.

Mu mashuri y’inderabarezi (TTC), ibizamini bizakorwa kuva kuri 26 Nyakanga - 3 Kanama, mu gihe ibizamini byanditse ku biga imyuga n’ubumenyingiro bizakorwa kuva kuwa 26 Nyakanga - 5 Kanama 2022.

Minisiteri y’Uburezi itangaza ko ugereranyije n’umwaka ushize, abagiye gukora uyu mwaka ari bake kuko nk’abo mu mashuri abanza umwaka ushize bari ibihumbi 254.

Abanyeshuri babanje gusoma amabwiriza yanditse mbere yo gutangira ikizamini
Kuri GS Nyagasambu niho hatangirijwe ibizamini bya leta ku rwego rw'igihugu
Minisitiri Dr Uwamariya yifurije amahirwe masa abagiye gukora ibizamini bya leta
Minisitiri Dr Uwamariya atanga ibizamini ku banyeshuri
Minisitiri Dr Uwamariya atangiza ku mugaragaro ibizamini bya leta mu mashuri abanza
Abo mu mashuri abanza ni bo batangiye ibizamini bya leta
Minisitiri w'Uburezi Dr Uwamariya na Uwizeye ushinzwe ibizamini muri GS Nyagasambu
Uwizeye Emmanuel yerekaga Minisitiri Dr Uwamariya ko ikizamini kigifunze neza ku buryo ntawakopera
Minisitiri Dr Uwamariya yavuze ko afite icyizere ko ibizamini bya leta bizagenda neza

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .