00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri batatu bo mu Rwanda babashije kubona amanota mu irushanwa rya mbere rikomeye ku Isi mu mibare

Yanditswe na Muhonzire Sylvine
Kuya 27 Nyakanga 2021 saa 08:14
Yasuwe :
0 0

Abanyeshuri batatu biga mu mashuri yisumbuye babashije kubona amanota mu irushanwa ngarukamwaka rya mbere rikomeye ku Isi mu mibare rya International Mathematics Olympiads (IMO 2021) ryabereye i Saint-Petersburg mu Burusiya ku nshuro yaryo ya 62.

Iri rushanwa ryabaye hifashishijwe ikoranabuhanga kubera icyorezo cya Covid-19 ryitabiriwe n’abanyeshuri 619 barimo abakobwa 63 baturutse mu bihugu 107 byo ku Isi harimo n’u Rwanda kuva ku itariki 14-24 Nyakanga 2021.

Aba banyeshuri bo bakoze iri rushanwa mu minsi ibiri guhera Tariki 19 na 20 Nyakanga, aho bamaraga amasaha 4.5 bakora ibibazo bitatu, buri kibazo gifite amanota arindwi.

U Rwanda ni ubwa mbere rwari rwitabiriye iri rushanwa mpuzamahanga ndetse rwitwara neza cyane kuko mu banyeshuri batandatu baryitabiriye batatu muri bo babashije kubonamo amanota, birugira urwa mbere mu Karere ka Afurika y’Iburasirazuba.

Munezero Honorine wiga muri Lycée Notre Dame de Cîteaux, urangije umwaka wa Gatanu, Abayo Joseph Desire wiga muri ES Byimana ndetse na Irakarama Alain wiga muri Petit Seminaire Ndera ni bo babashije kubona amanota muri iri rushanwa bivugwa ko ari ryo ryari rikomeye cyane mu mateka yaryo kuva ryatangira muri Nyakanga 1959.

Munezero yabashije kubona inota rimwe ku kibazo cyari gikomeye mu irushanwa kuruta ibindi.

Kuba batatu babashije kubona byibura inota rimwe mu bibazo byose byatanzwe, byongeye ku nshuro yabo ya mbere baryitabiriye, ni ibintu bikomeye cyane, kuko kimwe cya Gatanu cy’abitabiriye iri rushanwa muri uyu mwaka wa 2021 babonye zeru.

Munezero na Abayo bari mu banyeshuri batandatu baherutse gutsinda iri rushanwa ku rwego rwa Afurika ryiswe Pan-African Mathematical Olympiad 2021 (PAMO) ku nshuro yaryo ya 34, ndetse u Rwanda rwatahanye imidali itatu ya Bronze rwegukana umwanya wa mbere muri Afurika y’Iburasirazuba n’umwanya wa karindwi muri Afurika.

Aba banyeshuri bafashijwe n’Ikigo Nyafurika gishinzwe guteza imbere ubumenyi bushingiye ku mibare, AIMS Rwanda, binyuze muri porogaramu ya ‘Rwandan Mathematical Olympiad’.

Abanyeshuri bitabiriye iri rushanwa batoranyijwe mu gihugu hose binyuze mu marushanwa atandukanye atandukanye yateguwe na AIMS Rwanda ndetse na Kaminuza y’u Rwanda.

Abanyeshuri babasha kubona amanota menshi muri iri rushanwa bahabwa amahirwe [Scholarship] yo kwiga muri Kaminuza zikomeye ku Isi zirimo Harvard University, University of Cambridge, Massachusetts Institute of Technology n’izindi.

Kugira ngo umunyeshuri witabiriye iri rushanwa rya IMO abashe gutsindira umudali wa Zahabu ni uko aba yagize amanota 24, na ho uwegukana umudali wa Silver aba yagize amanota 19 mu gihe ubona uwa Bronze aba yabonye amanota 12.

U Bushinwa, Leza Zunze Ubumwe za Amerika n’u Burusiya ni byo bihugu bimaze gutsindira imidali ya Zahabu myinshi irenga 100 kuva iri rushanwa ryatangira mu myaka 62 ishize.

Aba nibo batsinze amarushanwa ya PAMO 2021 bagatahana imidali itatu ya Bronze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .