00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri 400 bakomeje kwitana bamwana na HEC ku kibazo cyo ‘kwamburwa inguzanyo’ yo kwiga

Yanditswe na Kanamugire Emmanuel
Kuya 8 June 2022 saa 11:19
Yasuwe :

Abanyeshuri bivugwa ko bagera kuri 400 bakomeje gutakamba basaba ko basubizwa inguzanyo yo kwiga nyuma yo kuyamburwa baramaze gutangira amasomo. Inama Nkuru y’Amashuri Makuru na Kaminuza (HEC) yo ivuga ko iyo nguzanyo batigeze bayihabwa.

Ni abanyeshuri bari barangije ayisumbuye bashaka kwiga mu mashuri makuru y’ubumenyingiro, IPRCs, basaba inguzanyo nk’uko bigenda ku bandi banyeshuri bashaka kujya muri kaminuza za leta.

Umwe muri aba banyeshuri wari watangiye amasomo muri IPRC Karongi yabwiye IGIHE ko bamenyeshejwe ko inguzanyo bayihawe ku wa 23 Gashyantare 2022, bahita batangira imyiteguro yo gutangira amasomo ku wa 28 Gashyantare uyu mwaka.

Mu gihe bari bari kumenyerezwa mu bigo boherejwemo ngo babwiwe ko hasohotse urutonde rushya rw’abemerewe inguzanyo basuzumye bisanga ku rutonde rw’abanyeshuri biyishyurira.

Abafite ibibazo bahawe igihe cyo kujurira ariko babikoze bose ngo bahabwa igisubizo kimwe, ko batemerewe nk’uko uyu munyeshuri akomeza abisobanura.

Ubwo bakurikiranagana ikibazo cyabo HEC yababwiye ko binjiye mu ikoranabuhanga ryayo biha inguzanyo bakoze icyitwa ‘hacking’.

Ati “Twagerageje kwisobanura ariko ntibatwumva, twitabaza itangazamakuru ngo ridukorere ubuvugizi. Umunsi umwe Umuyobozi wa HEC, Dr Rose Mukankomeje ari ku Isango Star, yavuze ko abanyeshuri binjiye muri système ari benshi babona bahawe inguzanyo, ko ingengo y’imari yabaye nke akaba agiye gusaba ubufasha bakaba bakongera ingengo y’imari natwe tukiga.”

“Bitewe n’uko yari amaze kuvuga ko bagiye kudusabira ubufasha, twumva hari icyizere tuguma ku ishuri. Hashize igihe nta gikozwe twasubiyeyo kumureba atubwira ko ikibazo cyacu bari kucyigaho, ngo dusubire ku ishuri ni ho bazadusubiriza.”

Iki kibazo bavuga ko bakigejeje mu nzeg zitandukanye basaba ko zibakorera ubuvugizi.

Uyu munyeshuri akomeza avuga ko ahagana mu mpera z’ukwezi gushize bongeye guhamaraga umuyobozi wa HEC ababwira ko ikibazo kigiye gukemuka ari na bwo ku mugoroba w’umunsi bavuganyeho bahawe ubutumwa bubasaba gusinya amasezerano y’inguzanyo na Banki Itsura Amajyambere y’u Rwanda (BRD) nubwo nay o yaje guteshwa agaciro.

Ati “Uwo munsi hari ku wa 24 Gicurasi nka saa cyenda; saa kumi n’ebyiri twari tumaze kubona ubutumwa budusaba gusinya amasezerano na BRD, ababubonye twahise dusinya. Twasinyiye miliyoni 7,9 Frw. Tumaze kuyasinyira twumva nta kibazo kigihari, hashize iminsi ibiri tubona ubundi butumwa buvuga ko habayeho kwibeshya, ko twabibaza HEC.”

Uyu musore avuga ko atiyumvisha uko byagenze kugira ngo BRD ibibeshyeho kuko urutonde rw’abemerewe inguzanyo ikarushyikirizwa ruvuye muri HEC.

Kugeza n’ubu nta gisubizo barabona ndetse iki kibazo bavuga ko cyabagizeho ingaruka zikomeye zituma bamwe bahagarika amasomo basubira iwabo ndetse n’abagumye ku mashuri ntibemerewe kuzakora ibizamini batishyuye.

Undi munyeshuri utarifuje ko amazina ye atangazwa yagize ati “Tukimara kubona ko twemerewe inguzanyo twahise tugira ibintu duhombya kugira ngo tubone amafaranga atujyana ku ishuri. Nkanjye byasabye ko ababyeyi bagurisha inka bari bafite kugira ngo haboneke amafaranga yo kwiyandikisha no gushaka icumbi ariko ngeze ku ishuri nisanze ku rutonde rw’abatemerewe inguzanyo. Byangizeho ingaruka zikomeye.”

“Ikindi ni uko tugiye gutangira ibizamini kandi ntitwemerewe kubikora tutishyuye. Ubu turi ku ishuri dutegereje uretse ko hari abo imibereho yagoye bajya gutegerereza iwabo.”

HEC yabakuriye inzira ku murima

Umuyobozi Mukuru w’Inama Nkuru y’Amashuri Makuru na Kaminuza (HEC), Dr Rose Mukankomeje, yahakanye ibyo abanyeshuri bavuga ko bahawe inguzanyo bakayamburwa.

Yavuze ko icyabaye ari uko hari abanyeshuri binjiye muri MIS (Management of Information Systems) ya HEC ifasha mu gutoranya abasabye inguzanyo yo kwiga mu mashuri makuru.

Igihe HEC yari ikirimo gushyiramo ibizagenderwaho hatangwa inguzanyo, abinjiyemo bose ngo babonye ko bafite inguzanyo nyamara HEC itararangiza gushyiramo ibizagenderwaho (inota fatizo, umwaka umunyeshuri yarangirije kwiga amashuri yisumbuye, icyo agiye kwiga).

Icyo gihe ngo uwinjiyemo wese yabonaga ko afite inguzanyo kandi igikorwa kitararangira.

Yakomeje agira ati “Ababibonye bose nubwo bavuga ko bambuwe inguzanyo bageze ku ishuri, si byo kuko twatangaje ibyavuye mu busabe bwabo tariki ya 25 Gashyantare 2022, amasomo atangira kuri 28 Gashyantare 2022. Iyo HEC itangaje ibyavuye mu busabe, ikora itangazo risobanutse ryerekana ibyagendeweho ndetse igatanga n’umwanya wo kujurira ku waba afite ikibazo wese. Ibi kandi byose byarakozwe.”

Nubwo abanyeshuri bavuga ko abafite iki kibazo bagera kuri 400, Dr Mukankomeje yavuze ko batazwi umubare kuko buri wese yinjiye muri Systeme ukwe hatarakorwa ijonjora, bimaze kumenyekana ko batangiye kuyinjirira ihita ifungwa.

Système ikorerwamo ibijyanye n’inguzanyo muri HEC yitwa ‘HECMIS’; abantu binjiramo bakoresheje ‘link’ isanzwe. Dr Mukankomeje yavuze ko bafashe ingamba ko buri mwaka ‘link’ yo kureba ibyavuye mu busabe bw’inguzanyo izajya ihinduka. Ibi byose ngo bikorwa hakoreshejwe ikoranabuhanga ku buryo MIS ari yo itanga ibivuye mu isesengura ntaho umukozi ahuriye n’uwasabye.

Abanyeshuri basinye amasezerano y’inguzanyo gute kandi batayemerewe?

Abanyeshuri bavuga ko bidashoboka ko BRD yabona urutonde rw’abemerewe inguzanyo, ari na bo isinyana na bo amasezerano itaruhawe na HEC.

Dr Mukankomeje we yavuze ko muri gahunda yo guhererekanya amakuru ku banyeshuri bahawe inguzanyo, impande zombie ziba zifite urutonde rw’abahawe inguzanyo n’abatarayihawe.

Yakomeje avuga ko mu kohereza ubutumwa bwo gusinya amasezerano y’inguzanyo BRD hari abo yibeshyeho iboherereza ubutumwa ndetse bamwe barayasinya kandi bazi neza ko nta nguzanyo ya HEC bafite.

Ati “Ubu ntabwo HEC yohereza muri BRD lisiti y’abanyeshuri bemerewe inguzanyo ahubwo hasigaye hariho uburyo bwo guhuza imiyoboro hagati ya MIS ya HEC n’iya BRD ku buryo buri kigo kigira amakuru ku munyeshuri wahawe inguzanyo n’utayihawe bakoresheje ikoranabuhanga.”

Iyo amata abaye make aharirwa abana

HEC ivuga ko abenshi mu banyeshuri barebwa n’iki kibazo ari abarangije mbere y’umwaka w’amashuri wa 2021 cyangwa barangije mu 2021 ariko bafite amanota ari munsi y’ayo HEC yafatiyeho itanga inguzanyo.

Ingengo y’imari igenewe inguzanyo yo kwiga, ishingira ku banyeshuri bari mu mwaka wa gatandatu w’amashuri yisumbuye muri uwo mwaka, cyane ko abarangije mbere baba barabonye amahirwe yabo mu myaka barangijemo.

Dr Mukankomeje yavuze ko ingengo y’imari yabonetse ari yo itegeka umubare w’abanyeshuri babona inguzanyo.

Ati “Uyu mwaka harangije benshi kandi bafite amanota meza, bose ntibabonye inguzanyo. Abanyarwanda baravugaga ngo ‘iyo amazi abaye make aharirwa impfizi’ ariko HEC iravuga ngo ‘iyo amata abaye make aharirwa abana. ‘ Twafashe abarangije uyu mwaka kuko cyari igihe cyabo kandi bari bujuje ibisabwa.”

Uyu muyobozi yacaga amarenga ko aba banyeshuri nta yandi mahitamo bafite uretse kwiyishyurira mu gihe bo bagifite icyizere cyo ‘kurenganurwa’.

Umwe ati “Dufite icyizere ko inguzanyo tuzayisubizwa bitewe n’uko twabimenyesheje inzego zitandukanye zikatwizeza ubufasha.”

Niba koko aba banyeshuri ari 400 nk’uko bivugwa, kugira ngo bose babone inguzanyo yo kwiga byasaba ingengo y’imari ikabakaba miliyari 32 z’amafaranga y’u Rwanda kuko bavuga ko basinyiye miliyoni 7,9 Frw.

Umuyobozi Mukuru w'Inama Nkuru y'Amashuri Makuru na za Kaminuza, Dr Rose Mukankomeje, yasobanuye iby'abanyeshuri bavuga ko bahaye inguzanyo bakaza kuyamburwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .