Abanyeshuri 129 ba Kepler bahawe impamyabumenyi basabwa gukomeza kuba intangarugero (Amafoto)

Yanditswe na HABIMANA James
Kuya 15 Kamena 2019 saa 11:23
Yasuwe :
0 0

Abanyeshuri 129 bigaga muri Kepler Ishami rya Kigali mu mashami atatu arimo iry’Itumanaho, Imicungire mu by’Ubuzima n’Icungamutungo, barimo abo mu Rwanda, Repubulika Iharanira Demokarasi ya Congo, Uganda n’u Burundi bahawe impamyabumenyi.

Uyu muhango wabereye muri Kigali Conference and Exhibition Village ku wa Gatanu, tariki ya 14 Kamena 2019.

Kepler ni porogaramu ifasha abanyeshuri kubona impamyabumenyi muri Kaminuza ya Southern New Hampshire yo muri Leta Zunze Ubumwe za Amerika.

Umuyobozi wa Kepler, Dan Gwinnel, yavuze ko icyerekezo cy’iyi kaminuza ari ugutanga ubumenyi bufite ireme kandi ko abanyeshuri bayirangijemo bangana na 90% bahita babona akazi kubera ubumenyi bahavana.

Yagize ati “Kepler itandukanye n’uko yahoze umwaka ushize ariko icyerekezo ni cya kindi ni ukwerekana uburyo bushya bwo gutanga ubumenyi mu mashuri makuru ko bishoboka no muri Afurika yo Munsi y’Ubutayu bwa Sahara.”

“Dutangira twakiraga abanyeshuri bangana n’ibyiciro bibiri buri mwaka kugira ngo tugeze ku mubare w’abanyeshuri 300 twabaga dushaka ku mwaka."

Yavuze ko Kepler ifite abakozi b’inararibonye mu nzego zifata ibyemezo bakomoka mu Rwanda n’ahandi ku Mugabane wa Afurika.

Yakomeje agira ati "Ubu Kepler ifite abakozi batiganda mu kazi."

Yabwiye aba banyeshuri basoje amasomo ko impamba y’urugendo bayibonye ariko rukomeje, kuko kubona akazi ari ingenzi ariko bagomba kuzirikana ubufatanye, ubumwe no kudahemuka.

Arnaud Michel Nibaruta wari uhagarariye abarangije muri Kepler akaba akomoka mu Burundi, yavuze ko yatangiye kuyigamo mu 2016 nyuma yo kuva mu gihugu cye mu 2015.

Yashimiye ubuyobozi bwa Kepler bwamufashije kubona ubumenyi bufite ireme, ubu akaba amaze kuba icyitegererezo kuri benshi.

Ati “Ubu namenye ko kugira ngo ube umukozi bidasaba kuba ubona amanota menshi mu ishuri ahubwo ubumenyi ukura muri ayo masomo nibwo bw’ingenzi. Ndashimira Kaminuza ya Southern New Hampshire uburyo mwatwubatse muhereye hasi ubu tukaba twaravuyemo abakozi beza.”

Yavuze ko Kepler itababereye ishuri gusa ahubwo yabereye umuryango ku bantu bavuye mu bihugu bitandukanye.

Ati “Mu gutangira kwiga twatangiye ikoranabuhanga ari imbogamizi ariko ubu twaribayemo intyoza, ndaha abanyeshuri bagenzi banjye impanuro no kuzirikana ko ibibazo n’imbogamizi bitazabura ariko mugomba gutwara ishema rya Kepler n’iry’ababyeyi banyu bityo muzarusheho guteza imbere ibihugu byanyu.”

Umuyobozi w’Ishami rishinzwe guteza imbere Uburezi mu Nama Nkuru y’Amashuri Makuru na Kaminuza (HEC), Dr. Ndikubwimana Théoneste, yashimye ubuyobozi bwa Kepler kuba bwarazanye iyi myigirishirize mu Rwanda, avuga ko rushimishwa no kuba izana abana baturutse mu mpunzi bakaza kwigira hano.

Ati “Abize mbere murabizi ko twigaga tugafata ibyo twize ariko ubu ibyo abana biga bagomba kubigaragaza mu bikorwa. Banyeshuri rero mu gihe mufite inzozi ntimukazice mujye muhora muzishyizeho umutima kandi mushake uko muzishyira mu bikorwa kuko kugira inzozi ni kimwe ariko no kuzigeraho ni ikindi.”

Kepler ifasha abanyeshuri barangije amashuri yisumbuye, kubona amahirwe yo kwiga Kaminuza ikabaha n’ubundi bufasha mu buryo bw’ibikenerwa ku ishuri.

Umunsi wo gusoza amasomo aba ari uw'ibyishimo by'ikirenga
Abanyeshuri 129 ba Kepler bahawe impamyabumenyi basabwa gukomeza kuba intangarugero
Abanyeshuri bahawe impamyabumenyi barimo abo mu Rwanda, Repubulika Iharanira Demokarasi ya Congo, Uganda n’u Burundi
Uyu muhango wabereye muri Kigali Conference and Exhibition Village ahahoze hazwi nka Camp Kigali
Abitabiriye uyu muhango banasusurukijwe n'itorero ryaserutse mu mbyino za Kinyarwanda zigaragaza umuco gakondo
Byari ibirori biryoheye ijisho

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza