Abanyenganda basabye Leta kubatekerezaho mu kuzahura ishoramari ryabo

Yanditswe na IGIHE
Kuya 7 Ukuboza 2020 saa 03:36
Yasuwe :
0 0

Leta y’u Rwanda yihaye intego ko urwego rw’inganda ruzazamuka rukava kuri 17% mu 2014 rukagera kuri 37% mu 2024, ariko abarukoramo bagaragaza ko hakiri imbogamizi bahura nazo zituma itagerwaho bikwiye.

Ibibazo urwego rw’inganda ruhura nabyo bishingiye ku kubura abakozi bafite ubumenyi buhagije, ubuke bw’ibikoresho by’ibanze byifashishwa mu nganda ndetse no kubona igishoro gihagije.

Izi mbogamizi ni nke mu zivugwa muri uru rwego rufatwa nka moteri y’iterambere ry’ubukungu bw’igihugu.

Urwego rw’inganda rwahungabanyijwe cyane n’ingaruka za COVID-19 ndetse zimwe zafunze by’igihe gito mu gihe izindi ziganjemo ishoramari rito n’iriciriritse zashyizeho imiryango burundu.

Iki cyorezo cyagize ingaruka kuri uru rwego, imibare yerekana ko ruri ku kigero cya 19% mu mezi atandatu ya mbere y’umwaka mu gihe intego ari ukuva kuri 17% mu 2014 ikagera kuri 37% mu 2024.

Abanyenganda bagaragaza ko izagerwaho mu gihe hari ibibazo bishakiwe umuti.

Umuyobozi w’Uruganda rukora imyenda rwa New Kigali Designers and Outfitters Ltd, Kanyonya Andrew, yavuze ko ikibazo cy’ubumenyi kiri mu bikibabangamiye.

Ati “Aho turi kuri ubu ni ku rwego dukeneye guhererekanya inararibonye mu bijyanye na tekiniki kuko hari icyuho cy’ubumenyi kandi ku nganda nyinshi.’’

Yagaragaje ko nko ku bakora imyenda bakeneye ishuri ribyigisha, abantu bakunguka ubumenyi mu byo bakora.

Kanyonya yavuze ko Guverinoma ishobora no gukorana n’abanyenganda ku buryo hashyirwaho gahunda zibafasha guha akazi abakozi bafite inararibonye.

Kuri ubu kubona abayobozi bafite inararibonye cyangwa abahagarariye ibikorwa by’uruganda bishobora gutwara 4,000$ ku kwezi ku masezerano nibura y’imyaka ibiri, kandi abashobora kuyishyura ni bake.

Igice kinini cy’urwego rw’inganda mu Rwanda cyihariwe n’abatunganya umusaruro w’ibiva ku buhinzi, birimo inyama, ibikomoka ku mata ndetse n’ibindi bitunganywa birimo amasabune, imiti, imyambaro ndetse n’imiti yo kwa muganga. Ibi byiyongeraho ibikoresho by’ubwubatsi nka sima, amakaro, amarangi n’ibyuma.

Umuyobozi w’Ishoramari mu Rwego rw’Igihugu rw’Iterambere (RDB), Philip Lucky, avuga ko hakiri icyuho ku bitumizwa mu mahanga n’ibikorerwa mu gihugu.

Yavuze ko igihugu kigitumiza mu mahanga ibirimo umuceri, ibigori n’ibindi birimo inyama ndetse n’inkoko.

Yifashishije urugero yagaragaje ko Africa Improved Foods, itunganya umusaruro ukomoka ku buhinzi ikoresha ibigori byinshi ivana muri Malawi na Tanzania n’umuceri uva Pakistan na Tanzania mu gihe isukari ivanwa muri Brazil na Misiri.

Ati “Hari icyuho ku kwihaza mu gihugu ku bijyanye n’imyenda n’imiti yica udukoko mu myaka (pesticides) no gukoresha ubushobozi buke mu gutunganya amasabune, n’imiti ikoreshwa mu kwica microbes (detergents) n’izindi nganda.’’

Imibare ya RDB igaragaza ko abanyenganda b’imbere mu gihugu bageza ku isoko 11% by’isukari ikenewe, 4% by’ibikomoka ku biti, 10% ku myenda, 18% ku bikomoka kuri pulasitiki, ibigori bifite 35% mu gihe umuceri uri kuri 45%.

Inganda nyinshi z’imbere mu gihugu nibura zitunganya umusaruro wazo ku kigero kiri hagati ya 30-50% y’ubushobozi bwazo.

Umuyobozi wa RDB, Clare Akamanzi, yavuze ko Guverinoma iri kureba uko havugururwa gahunda igamije guteza imbere inganda z’imbere mu gihugu mu kuziha ubushobozi bwisumbuyeho.

Iyi komite iyobowe na Minisitiri w’Intebe, Dr Edouard Ngirente, yashyizweho ngo yongere isuzume neza imiterere y’ibibangamiye urwego rw’inganda.

Akamanzi ati “Ubuyobozi burangajwe imbere na Minisitiri w’Intebe bwaduhaye inshingano zo gusesengura ibicuruzwa tugomba kugira, gukora ibikenewe mu guha ubushobozi inganda kugira ngo zifashe kubibona.’’

Iyi gahunda yitezweho kuzasiga impinduka mu mabwiriza ashyirwaho agamije gufasha inganda zo mu Rwanda ikaba n’uburyo bwo gukurura ba rwiyemezamirimo bigenga bashobora gushyigikira ibigo bikizamuka no koroherezwa ku igabanuka rya 150% ku bitangwa ku byoherezwa hanze.

Ibibazo by'urwego rw’inganda bishingiye ku bakozi badafite ubumenyi budahagije, ubuke bw’ibikoresho by’ibanze byifashishwa mu nganda n'igishoro gike/Ifoto ya Sam Ngendahimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .