Abanyarwandakazi babiri batsindiye miliyoni zisaga 150 Frw mu bihembo byatanzwe na Jack Ma

Yanditswe na Rabbi Malo Umucunguzi
Kuya 17 Ugushyingo 2019 saa 02:24
Yasuwe :
0 0

Abanyarwandakazi babiri Kagirimpundu Kevine ufite ikigo UZURI K&Y Rwanda gikora inkweto na Christella Kwizera ufite ikigo Water Access Rwanda gitunganya amazi, begukanye ibihumbi $165, ni ukuvuga asaga miliyoni $150 Frw, mu bihembo byatangijwe n’umuherwe Jack Ma washinze Alibaba Group, agamije kuzamura ba rwiyemezamirimo bato bo kuri uyu mugabane.

Ni ibihembo biri muri gahunda izwi nka Africa Netpreneur Prize Initiative, ANPI, byatangiwe muri Accra International Conference Centre muri Ghana, ku mugoroba wo kuri uyu wa 16 Ugushyingo 2019.

Ibi bihembo byatangijwe na Jack Ma Foundation, bikazagenda bitangwa mu marushanwa ngarukamwaka azamara imyaka icumi, afite agaciro ka miliyoni 10 z’amadolari ya Amerika.

Ni ubwa mbere ibi bihembo bitanzwe, aho abahatanaga bose bifuzaga kwegukana umugabane kuri miliyoni $1 yagenewe ibihembo bya ba rwiyemezamirimo muri uyu mwaka. Guhatanira kwinjira mu irushanwa byasojwe ku wa 30 Kamena 2019, hiyandikisha ba rwiyemezamirimo hafi ibihumbi 10 bo mu bihugu 50 bya Afurika.

Ba rwiyemezamirimo 10 bahize abandi baraye bagaragaje imishinga yabo imbere y’abakemurampaka barangajwe imbere na Jack Ma, n’abandi barimo Strive Masiyiwa washinze ikigo cy’itumanaho cya Econet Wireless; Ibukun Awosika uyobora First Bank of Nigeria n’Umuyobozi wungirije wa Alibaba Group, Joe Tsai.

Ikigo cyaje ku mwanya wa mbere ni Life Bank Nigeria gitanga ubufasha mu gukwirakwiza ibintu nkenerwa mu buvuzi birimo amaraso n’umwuka wongererwa indembe, cyegukanye igihembo cya $250,000.

Ikigo Nawah Scientific cyo mu Misiri gikora ibijyanye n’ubushakashatsi cyegukanye umwanya wa kabiri gihabwa $150,000, naho Ikigo Water Access Rwanda cya Christella Kwizera gitahana $100,000.

Ibigo birindwi bisigaye byagabanye igihembo cya $500 000 yari asigaye, maze bihesha ikigo Uzuri K&Y ya Kagirimpundu Kevine $65 000 kimwe n’ibindi bigo bisigaye.

Ibyo bigo ni Thrive Agric yo Nigeria ifasha abahinzi bato kugera kuri serivisi z’imari; DrugStoc yo muri Nigeria ifasha mu kurwanya imiti itemewe hifashishijwe ikoranabuhanga na Black Swan Tech Ltd yo muri Nigeria yubatse ikoranabuhanga rya WeMUNIZE rifasha mu kubarura abana bavutse no kubaha inkingo.

Harimo kandi J-Palm Liberia irimo gufasha mu guhanga imirimo mu gutunganya amavuta ava mu mikindo; Afrikrea.com yo muri Cote d’Ivoire yahanze isoko ryo kuri internet rigurirwaho ibintu byakorewe muri Afurika n’ibindi bikorwa by’ubukorikori na Mumm yo mu Misiri.

UZURI K&Y Rwanda ni uruganda rukora inkweto rwashinzwe na Kagirimpundu Kevine afatanyije na mugenzi we Ysolde Shimwe.

Ubwo hatoranywaga uwatsinze, Jack Ma yavuze yifuzaga gushyigikira igikorwa cy’ubucuruzi gitanga impinduka aho giherereye.

Ati “Muri Alibaba dukunda ibitekerezo binini ariko dukunda cyane bimwe bikemura ibibazo. Tugomba guhitamo igikorwa cy’ubucuruzi gisanzwe, kizana impinduka kandi kikabyara inyungu.”

Kwizera Christelle w’imyaka 25 ari na we wari muto mu bahataniraga ibihembo, yavuze ko $100,000 yatsindiye agiye kubishora mu bikorwa bye.

Ati “Iyi ni intsinzi y’abantu 63 dukorana, aya mafaranga ngomba nayo kuyashyira mu bikorwa byanjye kugira ngo bikure kurushaho.”

Umuyobozi Mukuru w’Ikigo cy’Igihugu cy’Iterambere, RDB, Clare Akamanzi, na we wari muri Ghana, yashimiye bikomeye aba bakobwa begukanye ibihembo bigiye guteza imbere imishinga yabo.

Naho Water Access Rwanda ikorera mu turere dukunze guhura n’ikibazo cy’amazi nko mu Ntara y’iburasirazuba no mu karere ka Rusizi, aho mu ntangiro z’uyu mwaka yagaragazaga ko imaze gucukura amariba asaga 80, kugeza amazi mu ngo z’abaturage 6,400 igatanga n’amazi yifashishwa mu bindi bikorwa nko kuhira.

Amazi batanga kandi aba afite ubuziranenge, kuko atunganywa yifashishijwe ibikoresho byabigenewe.

Si ubwa mbere uyu mushinga wo gutunganya amazi wegukana igihembo, kuko mu 2017 Christelle Kwizera yabaye umwe mu bantu 12 batsindiye igihembo cy’umwaka mu irushanwa rya ba rwiyemezamirimo bo ku mugabane wa Afurika, ritegurwa na BMCE BANK yo muri Maroc.

Yatsindiye ibihumbi 50 by’amadolari bingana na miliyoni 43 Frw, mu cyiciro cya ba rwiyemezamirimo bahanze udushya.

Clare Akamanzi yifotozanyije na Kagirimpundu na Kwizera nyuma yo kwegukana ibihembo bya Jack Ma Foundation
Abakemurampaka bari Strive Masiyiwa washinze ikigo cy’itumanaho cya Econet Wireless, Jack Ma washinze Alibaba Group, Ibukun Awosika uyobora First Bank of Nigeria n’Umuyobozi wungirije wa Alibaba Group, Joe Tsai.
Uko abahatanaga ari 10 bose bagize igihembo batahana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza