Abanyarwanda bize mu Bushinwa bagiye guhuzwa n’ibigo by’Abashinwa bikorera mu gihugu

Yanditswe na Ishimwe Israel
Kuya 22 Ukwakira 2019 saa 09:10
Yasuwe :
0 0

Abanyarwanda bize mu Bushinwa bateguriwe igikorwa kizabahuza n’ibigo by’ishoramari bikomeye bikorera ku butaka bw’urwa Gasabo hagamijwe kubaka imikoranire hagati y’impande zombi no kumenya ahari amahirwe y’akazi.

Iki gikorwa cyiswe ‘‘Job Fair’’ cyateguwe n’Umuryango w’Abanyarwanda bize mu Bushinwa [Rwanda China Alumni Association-RCAO] ufatanyije na Ambasade y’u Bushinwa mu Rwanda n’Ibiro byayo bishinzwe ibijyanye n’Ubukungu.

Giteganyijwe kubera muri Kigali Marriot Hotel ku wa 25 Ukwakira 2019, kuva saa 2:00 kugeza saa 5:00 z’umugoroba.

Umuyobozi wa RCAO, Higaniro Théoneste, yabwiye IGIHE ko iki gikorwa kizahuza Abanyarwanda bize mu Bushinwa n’ibigo bikomeye byo muri iki gihugu bikorera mu Rwanda harebwa ahari amahirwe yo kubona akazi.

Yagize ati “Abantu kucyitabira ni ukuba banditse ku rutonde rw’abize mu Bushinwa. Abafite akazi na bo ntibahejwe kuko bashobora kuhungukira akandi.’’

Iki gikorwa kigiye kuba ku nshuro ya mbere, byitezwe ko kizajya kiba buri mwaka. Yakomeje avuga ko “Twari dusanzwe tugira uburyo bwo kurangira abantu akazi mu bigo by’Abashinwa. Turashaka kujya tubikorera hamwe ngo abantu babone amahirwe angana mu bikorwa byagutse bigaragarira Abanyarwanda bose.’’

Higaniro yavuze ko iki gikorwa kigenewe abize amasomo yose kuko ikigo gishya gikenera abantu batandukanye baba Abanyamategeko, abize ibijyanye n’Ubwubatsi, Amashanyarazi n’ibindi.

RCAO ni umuryango uhuriyemo Abanyarwanda bize mu Bushinwa n’abahuguwe n’ibigo byo muri icyo gihugu mu gihe kirenga amezi atatu. Washyizweho hagamijwe kubahuza, gusangira ibitekerezo n’amahirwe ari hagati yabo.

Mu ntego zayo yaniyemeje gufasha ibigo by’Abashinwa bikorera mu Rwanda kubona abakozi bashoboye muri serivisi zitandukanye.

Igitekerezo cyo gutangiza RCAO gifite imizi mu 2010. Inama ya mbere yayo yakozwe ku wa 1 Ugushyingo 2012 yitabiriwe n’abantu batanu; yabanjirije izindi nyinshi zabimburiye igikorwa cyo kwandikisha uyu muryango mu 2015.

RCAO ifite intego yo kubaka ibiro byayo mu Mujyi wa Kigali n’ikigo kizatangirwamo amahugurwa y’ikoranabuhanga n’ajyanye no kwigisha umuco kizaba kiri mu Murenge wa Masaka mu Karere ka Kicukiro.

RCAO kuri ubu ibarizwamo abanyamuryango basaga 600 ariko abize mu Bushinwa bo barenga ibihumbi bitatu.

Mu myaka isaga itanu ishize, ibigo birenga 50 by’Abashinwa byatangiye gukorera mu Rwanda, aho byashoye miliyoni $250.

RCAO itera inkunga ibikorwa bitandukanye birimo gufasha abakene n’abatishoboye, gushyigikira impunzi no gutanga mituweli.

Abemerewe kwitabira ‘‘Job Fair’’ ni Abanyarwanda bize mu Bushinwa bari muri RCAO ndetse buri wese azitwaza inyandiko y’umwirondoro we ashobora kwifashisha mu gihe yabengukwa n’umushoramari.

Kwiyandikisha ni ukunyura ku rubuga rwa RCAO rwa www.chinaalumni.rw. Ushaka ibindi bisobanuro wahamagara kuri nimero 0786231682.

Umuyobozi w’Umuryango w’Abanyarwanda bize mu Bushinwa [Rwanda China Alumni Association-RCAO], Higaniro Théoneste, yavuze ko igikorwa cya ‘‘Job Fair’’ kizahuriza hamwe abize mu Bushinwa n'abashoramari bavuye muri iki gihugu harebwa ahari amahirwe yo kubona akazi
Abanyarwanda bize mu Bushinwa bahuriye mu muryango ukora ibikorwa bitandukanye birimo no gufasha abatishoboye
Muri Kamena uyu mwaka, abanyamuryango ba RCAO ku nshuro ya gatatu bahuriye mu Nteko Rusange yabereye mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza