00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda bibukijwe ko kwibuka bikwiye kuba umurage wo kudaheranwa n’agahinda

Yanditswe na Ntabareshya Jean de Dieu
Kuya 7 April 2022 saa 12:45
Yasuwe :

Abanyarwanda bibukijwe ko kwibuka Jenoside yakorewe Abatutsi mu 1994 bikwiye kuba umurage wo kudaheranwa n’agahinda ahubwo ari umwanya mwiza wo gutekereza uruhare rwa buri umwe mu rugamba rwo kubaka u Rwanda.

Ibi byagarutsweho mu kiganiro cyatambutse kuri Televiziyo y’u Rwanda cyagarukaga ku nsanganganyamatsiko igira iti ‘Kwibuka Umurage w’ubudaherwana ku Rwanda’.

Depite Muhongayire Christine yavuze ko ibihe byo kwibuka abazize Jenoside yakorewe Abatutsi mu 1994 mu Rwanda byibutsa abayirokotse amateka banyuzemo ariko bikaba ishingiro ryo kumva ko badakwiye guheranwa na yo.

Yagize ati “Iyo umuntu avuze kudaheranwa ni bwo avuga ikintu cyari kimugoye cyagombaga kumuherana ariko ntikimuherane. Munyemerere ntangirire ku mateka yaranze u Rwanda na mbere y’abakoloni ubwo Abanyarwanda bari abavandimwe.”

Yakomeje avuga ko guhera mu 1959 abakoloni bari batangiye kuzana urwango mu Banyarwanda hashingwa amashyaka arimo ubugome batangira kubangisha Abatutsi no kubiba urwango rwakomeje kugenda rwigishwa.

Ati “Rwakomeje kuzamuka biza kugera mu 1994 intwaro bazizanye, imyiteguro yakoze, muranabyibuka ko byageze aho Bagosora avuga ko bari gutegura imperuka y’Abatutsi. Ibyo byose byari ibintu bishimangira ko Jenoside yakorewe Abatutsi yateguwe.”

Bigeze ku rupfu abantu bapfuye, abana baricwa na ba nyirarume, baricwa na banyina wabo, ababyeyi barapfa, abasaza, abakecuru mbese u Rwanda rwose ruhinduka umuyonga.

Muhongayire yavuze ko nubwo Jenoside yabaye akiri muto yabonaga ibyari biri kuba, muri ibyo gihe byari ibintu bikomeye igihugu gicura umuborogo ibintu birakomera abantu barashira nyamara bicwa n’abari ababyeyi babo, abavandimwe, abaturanyi na bo basangiraga ni ukuvuga imitima mu by’ukuri iratentebutse ku buryo bugaragarira buri wese.

Ati “Urebye kugera aho ngejeje byari uguheranwa, kurenga kuri ibyo byose ugahitamo kubaho ntabwo byoroshye. Aho ni ho haturutse umurage wo kudaheranwa n’ako gahinda, ibibazo byatejwe na Jenoside, banga guheranwa nabyo. Ariko kudaheranwa nabyo byaturutse ku gihugu cyacu cyiza.”

Yavuze ko uretse kuba abarokotse Jenoside yakorewe Abatutsi baranze guheranwa n’amateka mabi n’igihugu cyakoze ibishoboka byose mu myaka 28 ishize rwanga guheranwa ahubwo rwishakamo ibisubizo byo kubaka iterambere.

Ati “U Rwanda natwe twanze guheranwa, Jenoside yari itugejeje ahantu uru Rwanda rwari rurangiye, abatubonaga babonaga ari igihugu kirangiye ku buryo bibaye ngombwa ko gisibwa ku ikarita y’Isi byakorwa. Igihugu cyarasenyutse kugera ku rwego rwa nyuma aho icyizere cyo kubaho cyageze ku myaka 32 gusa mu gihe ubukungu bwari bugeze kuri -9%.”

“Ariko bwa budasa bw’u Rwanda igihugu kigenda cyubakwa gake gake, ubushake bwa Politiki burakomera kandi Abanyarwanda nibajya bicara bajye bumva ko ubushake bwa politiki bwakoze ikintu gikomeye cyane. Turishimira ibintu bikomeye u Rwanda rumaze kugeraho n’ubumwe bw’abanyarwanda.”

Yavuze ko Jenoside yakorewe Abatutsi ikirangira bitari byoroshye kumva ko ubumwe mu Banyarwanda bushoboka nyuma y’urupfu rugoye ariko ubu u Rwanda ruri ku rwego rwiza aho buri Munyarwanda aho ari hose yakwiye kwishimira intambwe imaze guterwa mu bumwe n’ubwiyunge bw’Abanyarwanda.

Umunyamuryango wa GAERG, Mukarugwiza Judith, yasobanuye ko nyuma y’ibyo baciyemo bigoye kuri ubu hari icyizere cyo kubaho ari nayo mpamvu badakwiye guheranwa mu iterambere.

Ati “Icyizere cyo kubaho cyahise kiremwa, Inkotanyi zigifata iki gihugu, abantu bose baje biruka bavuga ko batabawe, nubwo hari abazaga bibwira ko ababo hari aho bihishe bizeye kubabona ariko bikarangira batababonye. Hariho gahunda nyinshi muri iyi miryango ya GAERG dufatanya na Imbuto Foundation, ituma habaho gukomeza mu bikorwa by’isanamitima no kurwanya ihungabana abantu bagiye bahura naryo.”

Yavuze ko kuri ubu hari ibikorwa bikomeje kujya mbere by’isanamitima aho kuri ubu mu gihugu hari amatsinda arenga 100 yibumbiyemo abahoze bafite ibibazo by’ihungabana ari kuri ubu byarakemutse kandi bagenda bafashwa.

Umwe mu rubyiruko Allen Ndayishimiye avuga ko amateka ya Jenoside yongera kwibutsa urubyiruko ko ari imbaraga z’igihugu no gutekerezaho rukarebera hamwe uruhare rwarwo mu kuruteza imbere.

Ati “Ni igihe cyo kubona ko urubyiruko rufite imbaraga zo kubaka igihugu n’izo kuba rwagisenya…ariko iyo twibutse ko Jenoside yahagaritswe n’urubyiruko rwishyize hamwe bitwubakamo imbaraga. Iki gihe nasaba urubyiruko gutangira gutekereza umusanzu warwo mu kubaka igihugu. Gusenya biroroshye ariko kubaka bisaba kwitanga byaba ngombwa ukagipfira ari naho mpera nsaba urubyiruko kurushaho kuzirikana n’indangagaciro nyarwanda.”

Ibikorwa byo kwibuka Jenoside yakorewe Abatutsi ku nshuro ya 28 byatangijwe na Perezida w’u Rwanda, Paul Kagame na Madamu Jeannette Kagame mu muhango wabereye ku rwibutso rwa Jenoside rwa Kigali.

Depite Muhongayire Christine yavuze ko mu kudaheranwa kw'Abanyarwanda ariho icyizere cyo kubaho cyubakiye
Mukarugwiza Judith yavuze ko kuri ubu hari icyizere cyo kubaho nyuma y'imyaka 28 Jenoside yakorewe Abatutsi ihagaritswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .