Abanyarwanda batanu bashinjwa kubangamira ICTR bashyikirijwe Urukiko

Yanditswe na Philbert Girinema
Kuya 11 Nzeri 2018 saa 06:30
Yasuwe :
0 0

Ubushinjacyaha bw’u Rwanda bwashyikiriije Urwego rwasigariyeho Inkiko Mpuzamahanga Mpanabyaha, IRMCT; abanyarwanda batanu bakekwaho kubangamira imikorere yarwo.

Abo bashyikirijwe urukiko bafashwe ku wa 3 Nzeri 2018. Barimo Maximilien Turinabo, Anselme Nzabonimpa, Jean de Dieu Ndagijimana, Marie Rose Fatuma na Dick Prudence Munyeshuli.

Ibirego byabo bihuye n’urubanza rwa Ngirabatware Augustin wabaye Minisitiri w’Igenamigambi hagati ya Nyakanga 1990-Mata 1994. Afungiwe Arusha kubera uruhare yahamijwe muri Jenoside ndetse ndetse yakatiwe gufungwa imyaka 30.

Mu itangazo ryashyizwe ahagaragara n’Ubushinjacyaha bw’u Rwanda, Umuvugizi wabwo Nkusi Faustin, yavuze ko “ku wa 10 Nzeri 2018, Ubushinjacyaha bw’u Rwanda bwashyikirije IRMCT abanyarwanda batanu kandi bahise boherezwa muri gereza za Loni i Arusha muri Tanzania”.

IRMCT yari iherutse gutangaza ko abo banyarwanda bose bagomba koherezwa Arusha ku cyicaro cy’uru rwego, ari naho bagomba kuburanira.

Impapuro zo kubata muri yombi zemejwe n’umucamanza ku wa 24 Kanama 2018, bisabwe n’Ubushinjacyaha bwa Arusha.

Turinabo na bagenzi be bashinjwa kubangamira imirimo y’urukiko no kubishishikariza abandi, kurenga ku myanzuro y’urukiko no kubangamira imikorere y’ubutabera mu Rukiko Mpuzamahanga Mpanabyaha Rwashyiriweho u Rwanda (ICTR) n’urukiko rwarusigariye.

Itangazo rya IRMCT ryo ku wa 05 Nzeri rivuga ko “Ibiro by’Ubushinjacyaha bivuga ko Maximilien Turinabo, Anselme Nzabonimpa, Jean de Dieu Ndagijimana na Marie Rose Fatuma, ubwabo cyangwa banyuze ku bandi bantu, batanze ruswa bakanashyira igitutu bagamije guhindura ibimenyetso by’abatangabuhamya mu rubanza rwa Ngirabatware.”

Rikomeza rigira riti “Ubushinjacyaha kandi buvuga ko Dick Prudence Munyeshuli na Maximilien Turinabo batangaje amakuru y’ibanga arebana n’abatangabuhamya b’ibanga, bazi neza ko ari ukurenga ku mategeko ya ICTR n’urwego rwayisigariyeho.”

“Bikekwa ko intego y’aba yari ukugira ngo hahindurwe icyemezo ICTR yafatiye Augustin Ngirabatware nk’uko cyanashimangiwe mu bujurire n’urwego rwayisigariye kubera uruhare yagize muri Jenoside, hamwe n’igifungo yakatiwe cy’imyaka 30.”

Ku wa 20 Ukuboza 2012 nibwo Ngirabatware yakatiwe na ICTR mu rw’ubujurire, gufungwa imyaka 35, nyuma yo guhamwa no kugira uruhare muri Jenoside.

Yaje kujuririra urwego rwasimbuye ICTR, maze ku wa 18 Ukuboza 2014, rugabanya igifungo kigirwa imyaka 30.

Ku wa 19 Kamena 2017 ariko, mu bubasha bwarwo, uru rwego rwemereye Ngirabatware ko ubujurire bwe bwasurirwamo.

Umwunganizi we Peter Robinson yabanje kwivana mu rubanza, bituma rutumvwa muri Gashyantare nk’uko byari byitezwe.

Gusa ubwanditsi bw’urukiko bwamuhaye Diana Ellis na Sam Blom-Cooper nk’abunganizi, runanzura ko uru rubanza ruzumvwa ku wa 24 Nzeri 2018.

Umushinjacyaha Mukuru wa IRMCT, Serge Brammertz, yashimiye ubuyobozi bw’u Rwanda bwagize uruhare mu guta muri yombi aba bakekwaho icyaha.

Ibirego by'aba banyarwanda batanu bihuye n'urubanza rwa Ngirabatware Augustin wabaye Minisitiri w’Igenamigambi hagati ya Nyakanga 1990-Mata 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza