00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda bagera ku 150 bacurujwe mu mahanga mu myaka itatu

Yanditswe na Akayezu Jean de Dieu
Kuya 8 Mutarama 2023 saa 02:25
Yasuwe :

Imibare y’Urwego rw’Ubugenzacyaha, RIB, yerekana ko nibura Abanyarwanda 150 bakorewe icuruzwa ry’abantu, hagati ya 2020-2022.

RIB itangaza ko mu 2020 yakiriye ibirego 33 by’abantu bakorewe icuruzwa byari birimo abantu 36 bacurujwe. Abagabo bari barindwi, abagore ari 29.

Ni imibare yaje kwiyongera mu mwaka wakurikiyeho wa 2021, kuko warangiye abagera kuri 66 aribo bakorewe icuruzwa barimo abagabo 22 n’abagore 44. Icyo gihe bwo ibirego byari 17.

Mu mwaka ushize RIB yakiriye ibirego ku icuruzwa ry’abantu bigera kuri 33. Ku rundi ruhande ariko mu 2022, abacurujwe bari 48 barimo abagabo batandatu n’abagore 42.

Uru rwego rutangaza ko impamvu abacurujwe baba ari benshi ugereranije n’ibirego ruba rwakiriye, ari uko hari igihe ikirego kimwe kiba gishobora kuvugwamo abantu barenze umwe.

Ikindi kigaragazwa na RIB ni uko mu bantu 150 bacurujwe hari harimo 68 bafite imyaka iri munsi ya 18, mu gihe abandi 68 bari hagati ya 18-30 naho abandi 14 bari hejuru y’imyaka 30 y’amavuko.

Mu 2020, abacurujwe bari munsi y’imyaka 18 bari abantu 15, naho abafite imyaka iri hagati ya 18-30 bari 17 mu gihe abarengeje imyaka 30 bari bane.

Ni mu gihe mu mwaka wakurikiyeho wa 2021, Abanyarwanda 27 aribo bacurujwe bari munsi y’imyaka 18, naho abandi 32 bari hagati y’imyaka 18-30 mu gihe barindwi ariko baribo bafite imyaka iri hejuru ya 30.

Imibare ya RIB y’umwaka ushize yo igaragaza ko abantu 26 bari munsi y’imyaka 18 aribo bacurujwe, mu gihe abandi 19 bari hagati y’imyaka 18-30 bacurujwe naho batatu bari hejuru y’imyaka 30 akaba aribo bakorewe ibi bikorwa by’icuruzwa ry’abantu.

Isoko riri muri Aziya n’u Burasirazuba bwo hagati

Bigaragazwa ko Abanyarwanda benshi bajya gucuruzwa mu bihugu birimo ibyo muri Aziya, Uburasirazuba bwo hagati n’Uburengerazuba bwa Afurika.

RIB igaragaza ko abantu 41 bagaruwe mu Rwanda bavanywe mu bihugu birimo ibyo muri Aziya n’Uburasirazuba bwo hagati [ni ukuvuga muri Leta Zunze Ubumwe z’Abarabu, Qatar n’ahandi].

Mu bagaruwe mu Rwanda mu myaka itatu ishize harimo 11 bo mu 2020 mu gihe mu 2021 hagaruwe 11 naho mu mwaka ushize wa 2022 hagarurwa Abanyarwanda 19.

Hari Abanyarwanda 24 bagiye bafatirwa ku bibuga by’indege ndetse no ku mipaka bajyanywe gucuruzwa mu bihugu bya Aziya, Uburasirazuba bwo hagati ndetse no mu Burengerazuba bwa Afurika.

Umuvugizi wa RIB, Murangira B Thierry yabwiye New Times ko hari abantu bagiye bagarurwa mu gihugu nyuma bakongera guhimba andi manyanga bikarangira bongeye gusubira muri bya bihugu.

Avuga kandi ko abantu bajya gucuruzwa iyo bagaruwe mu Rwanda, bashyirwa ahantu bakagirwa inama, gusa ngo harimo n’abafata RIB nk’ishaka kubitambika ibavutsa amahirwe yabo bityo bagashaka ubundi buryo bwo gutoroka bagasubira muri bya bihugu.

RIB yaburiye abishora muri ibi bikorwa

RIB igaragaza ko uburyo bukoreshwa n’abacuruza abantu burimo kubizeza akazi keza, gukora imenyerezamwuga n’ibindi bitangaza baba bakeka ko abo bashaka gucuruza batabasha kubona.

Dr Murangira avuga ko hari ingamba zafashwe mu guhashya abantu bishora mu bikorwa by’ubucuruzi bw’abantu ari nayo mpamvu mu mwaka ushize abacuruzwa bagabanyutse bakaba 48 bavuye kuri 66 bariho mu 2021.

Ni urugamba RIB ifatanyamo n’izindi nzego, ahakomeje gukorwa ibikorwa birimo ubukangurambaga, gushishikariza abantu kurwanya icuruzwa ry’abantu no kubasaba gutanga amakuru ku ho bashobora gukeka ibyo bikorwa by’ubugizi bwa nabi.

Kuri ubu kandi RIB ikomeje kubaka ubushobozi mu bijyanye n’ikoranabuhanga rikomeje kwifashishwa n’abacuruza abantu babizeza buruse (scholarships) no kujya mu nama (conferences) zikomeye ngo zirimo amafaranga.

Umunyamabanga Uhoraho muri Minisiteri y’Ubutabera, Mbonera Théophile, aherutse kubwira IGIHE ko nubwo ikibazo cy’icuruzwa ry’abantu kitarafata indi ntera mu Rwanda, hagomba gushyirwaho ingamba zo kugikumira.

Ati ‘‘Iki kibazo cy’icuruzwa ry’abantu twavuga ko ari ikibazo kiriho kimaze igihe, ariko uburyo gikorwamo bugenda bugira isura ihishe ku buryo udashobora gupfa kuvuga ngo gikorwa gutya. Ubuhamya bw’abacurujwe bagenda bagaragaza ibyababayeho butuma dutangira kubona neza ko iki kibazo gihari kandi ari icyo guhagurukirwa.’’

Itegeko risobanura icuruzwa ry’abantu nk’igikorwa cyose gikozwe n’umuntu hagamijwe gushaka inyungu, uha cyangwa ushakira undi akazi, utwara, wimura, uhisha cyangwa wakira undi muntu, hakoreshejwe ibikangisho, imbaraga cyangwa ubundi buryo bwose bw’agahato.

Rivuga kandi ko bishobora kuba ishimuta, uburiganya, ubushukanyi, kumubonerana kubera ububasha umufiteho cyangwa kubera ko ari umunyantege nke, gutanga cyangwa kwakira ubwishyu cyangwa inyungu kugira ngo umuntu ufite ububasha ku wundi muntu yemere.

Imibare y'abanyarwanda bakorerwa icuruzwa yagiye igabanyuka mu myaka ishize ariko iracyateye inkeke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .