Abanyarwanda bagaragarije Tanzania ko gutangizayo ibigo by’ubucuruzi ari ingorabahizi

Yanditswe na Habimana James
Kuya 12 Kamena 2019 saa 08:18
Yasuwe :
0 0

Abacuruzi bo mu Rwanda bagaragarije bagenzi babo bo muri Tanzania, ko batoroherwa no gushora imari muri iki gihugu mu gihe abaza mu rwa Gasabo, bo bisanga.

Ni mu nama yahuje abacuruzi bo mu Rwanda na Tanzania yabereye i Kigali. Yari igamije kunoza ubucuruzi hagati y’ibihugu byombi, buri gihugu kikagaragariza abacuruzi b’ikindi impamvu yo kugishoramo imari kandi bakunguka.

Umuyobozi ushinzwe guteza imbere ishoramari mu Kigo cy’Igihugu cy’iterambere (RDB), Lucky Philip, yabwiye aba bashoramari bo muri Tanzania ko u Rwanda ari igihugu gitanga amahirwe ku bashaka kugishoramo imari, mu kwandikisha ibigo byabo kuko bitwara igihe gito, umutekano uri mu gihugu, ibikorwa remezo nk’amashanyarazi, imihanda no kuba u Rwanda ruri mu bihugu birangwamo ruswa nke ku Isi.

Yavuze ko ikindi u Rwanda rurusha ibindi bihugu ari uko iyo umushoramari azanye ishoramari rye, imigabane yose muri icyo kigo ayigumana mu gihe mu bindi bihugu ho babanza kugusaba ko icyo kigo ugomba kugifatanya n’umwenegihugu.

Abanyarwanda bashaka gushora imari muri Tanzania baracyabangamirwa

Nubwo u Rwanda rumaze gukora byinshi ngo rufashe ishoramari ry’amahanga kuruzamo, abanyarwanda bajya muri Tanzania bo bavuze ko kimwe mu bibazo bafite ari uko gufunguza ikigo bigoye, bisaba ko ugomba kubanza gushyiramo uwo mufatanya wo muri iki gihugu. Ibi ngo biba bisobanuye ko udashobora kugira imigabane ijana ku ijana muri icyo kigo.

Umuyobozi w’Ibigo bikora ubwikorezi bw’imizigo iremereye no kunganira abacuruzi muri gasutamo batumiza n’abohereza ibintu mu mahanga, baba abo mu Rwanda no muri Afurika y’Iburasirazuba, Seka Fred, yagize ati “Ubusanzwe ubucuruzi bw’u Rwanda na Tanzania nta kibazo kirimo kuko bwiyongereye kuva kuri 70% bugera kuri 90%, ibintu mu by’ukuri dushima kandi dushimira uko abakuru b’ibihugu bafatanya.”

Ubwo yagarukaga ku bibazo bihari, Seka yagize ati “Ikibazo ni uko (Tanzania) igishaka kurengera inganda zabo, bakora nk’aho bashaka kurengera inganda zabo n’abaturage ibyo bigatuma badafassha abandi bashaka gushora imari muri iki gihugu”.

Yakomeje atanga urugero ati “Ubwanjye nagerageje gushinga ikigo muri Tanzania mu 2016 ariko n’ubu ndacyategereje ngo nemererwa gukora, ushobora kwandikisha ikigo ariko mu gihe cyo gutangira gukora bikaba ikibazo kuko bikenera ibindi byangombwa.”

Seka avuga ko kubona icyangombwa cyo gukorera muri Tanzania, bikiri ikibazo kuko kwandikisha ikigo bikorwa ariko kuguha uburenganzira bwo gukora bikagorana.

Yavuze ko nyuma yo kubona ko gukorera muri iki gihugu bigoye, byasabye ko atangira gukora mu buryo bw’ubufatanye n’Abanya-Tanzania.

Minisitiri w’Ubucuruzi n’Inganda mu Rwanda, Hakuziyaremye Soraya, yagaragaje ko ubucuruzi bw’u Rwanda na Tanzania, ari bwiza ibi binagaragazwa n’uko ibicuruzwa biza mu Rwanda, ibingana na 85% bica ku cyambu cya Dar es Salaam ariko ko ari ngombwa ko bakomeza kugirana ibiganiro kugira ngo barebere hamwe uko ubu bucuruzi bwakomeza gutera imbere.

Ati “Imibare igaragaza ko Tanzania ari igihugu cya gatatu muri Afurika y’Iburasirazuba mu guhahirana n’u Rwanda, nyuma ya Uganda na Kenya, ubucuruzi hagati y’ibihugu byombi bugeze kuri 14% by’ubucuruzi byakorewe muri aka karere mu myaka itanu ishize.”

Yavuze ko ibyo u Rwanda ruvana muri Tanzania bingana na 95%, mu gihe ibyo rwoherezayo bingana na 5%.

Tanzania yiteguye guhangana n’iki kibazo

Ambasaderi wa Tanzania mu Rwanda, Ernest Jumbe Mangu yavuze ko ubucuruzi bw’ibihugu byombi bwifashe neza kandi n’ahari ibibazo bigiye gushakirwa umuti.

Ati “Namaze gushyira hamwe ibibazo byanyu kandi mbyohereza mu gihugu cyanjye, mfite icyizere gikomeye ko bizakemurwa.”

Ubwo yabazwaga na IGIHE niba koko bisaba ko abacuruzi bo mu Rwanda basabwa kubanza gufatanya n’abo muri Tanzania kugira ngo babone gutangizayo ikigo, Amb. Mangu yavuze ko ibi atari byo, ko n’ikibazo cyo gutinda kwemerwa gukorera mu gihugu cye kigiye gushakirwa umuti.

Abacuruzi bavuye muri Tanzania beretswe amahirwe ari mu Rwanda
Iyi nama yitabiriwe n'abikorera muri Tanzania no mu Rwanda
Ambasaderi wa Tanzania mu Rwanda, Ernest Jumbe Mangu yavuze ko ubucuruzi bw’ibihugu byombi bwifashe neza, ko n’ahari ibibazo bigiye gushakirwa umuti
Minisitiri w’Ubucuruzi n’Inganda mu Rwanda Hakuziyaremye Soraya, we yagaragaje ko ubucuruzi bw’u Rwanda na Tanzania ari bwiza
Stephen Ruzibiza Umuyobozi w'Urugaga rw'Abikorera (PSF) yavuze ko iyi nama ifasha ibihugu byombi kumenya aho byashora imari
Ambasaderi wa Tanzania mu Rwanda, Ernest Jumbe Mangu we yavuze ko ubucuruzi bw’ibihugu byombi bwifashe neza, ko n’ahari ibibazo bigiye gushakirwa umuti
Abacuruzi hagati y'u Rwanda na Tanzania bagaragaje ko biteguye gukomeza ubufatanye mu by'ubucuruzi

Amafoto: Niyonzim Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza