Abanyarwanda baba muri Canada basabwe kurushaho gushyigikira iterambere u Rwanda rugezeho

Yanditswe na Nkurunziza Ferdinand
Kuya 14 Mutarama 2020 saa 10:26
Yasuwe :
0 0

Perezida w’Inteko Ishinga Amategeko, Umutwe w’Abadepite, Mukabalisa Donatille, yasabye Abanyarwanda batuye muri Canada kubakira ku musingi u Rwanda rumaze gushinga, bakarushaho gushyigikira iterambere igihugu cyagezeho.

Depite Mukabalisa yabigarutseho mu kiganiro yagiranye n’Abanyarwanda bo mu bice bitandukanye muri Canada; yari yitabiriye inama y’abayobozi b’Inteko zishinga Amategeko zo mu bihugu byo mu Muryango wa Commonwealth, yateguwe n’Inteko Ishinga Amategeko ya Canada.

Mu butumwa bwe yabwiye Abanyarwanda ko urugendo rwo kwibohora, kwiyubaka no kwiteza imbere, u Rwanda rurugeze kure.

Yagize ati ‘‘Ibimaze gukorwa muri iyi myaka birashimishije cyane n’ubwo cyari igihe kitari cyoroshye, kandi turacyakomeje icyerekezo cy’iterambere rirambye. Ibyo twagezeho tubabwira muri make, tubikesha ubushake bwa Politiki, ubwitange bwa buri Munyarwanda n’ubufatanye bwabo bose, ubuyobozi bwiza bureba kure, burangajwe imbere na Perezida Paul Kagame.’’

Yakomeje avuga ko Umukuru w’Igihugu atanga impanuro n’urubuga ku Banyarwanda b’ingeri zitandukanye kugira ngo batange ibitekerezo byubaka, bagire uruhare rugaragara mu bibakorerwa, ariwo musingi ukomeye iterambere ry’u Rwanda rikomeje kugenderaho.

Yanongeyeho ko Abanyarwanda bakwiye guhora bazirikana aho u Rwanda rwavuye kugira ngo batazahuga bakahasubira.

Ati “Kandi rero n’iyo tuvuga aho tugeze hatangaje n’uko tuba tureba aho twatangiriye munsi ya zero mu 1994, aho igihugu cyari cyarasenyutse burundu, tukareba n’ibitambo byasabye kugira ngo tube tugeze aho tugeze. Bituma tugira n’icyo dushingiraho tuvuga ngo niba byarashobotse, icyerekezo n’intego dufite nk’Abanyarwanda, aho twazamuye urukiramende hejuru, tuzabishobora.’’

Depite Mukabalisa yanabibukije amateka mabi u Rwanda rwanyuzemo, kuva mu gihe cy’ubukoloni hategurwa umugambi wo gucamo ibice Abanyarwanda, bakigishwa urwango rw’abo basangiye igihugu, abakoloni bagatangiza uwo mugambi, ugakomezwa n’ubutegetsi bwakurikiyeho nyuma y’ubwigenge kugeza mu 1994, aho politiki yari iriho yashyize ingufu mu kwigisha ivangura rishingiye ku moko n’akarere, no guheza bamwe bakimwa uburenganzira bwose.

Yavuze ko nyuma ya Jenoside politiki yari ikenewe icyo gihe kwari ugushyira ingufu ku gihuza Abanyarwanda n’uburyo bakorera hamwe bagakoresha ubwenge n’amaboko yabo kugira ngo bateze igihugu cyabo imbere.

Yabasangije iterambere ry’u Rwanda n’amahirwe ahari mu ishoramari abibutsa gutanga umusanzu wabo.

Ati “Mwumvise amahirwe ari mu Rwanda; namwe ariko aho muri hano muri amahirwe akomeye, muri ubukungu bukomeye dufite. Kuba muri mu gihugu mushobora kwiga amashuri meza, mukiga ibyo igihugu cyacu gikeneye mu iterambere twifuza, mukaza kubikoresha iwanyu, murumva ko dushyize hamwe tukajya inama tukareba uburyo dukwiye gufatanya, ntacyatunanira.’’

Mu butumwa bwihariye yageneye urubyiruko ruba muri Canada; Mukabalisa yababwiye ko u Rwanda rwanyuze mu bibazo bidasanzwe, rwishakamo ibisubizo bidasanzwe, runabona umusaruro udasanzwe wazanye n’ibisubizo bidasanzwe rwishatsemo.

Ati “Muhore muzirikana ko mugomba kubyubakiraho kuko mufite amahirwe yo kubakira ahakomeye igihugu cyacu kigeze; Izina kimaze kubaka, nta burenganzira mufite bwo guha icyuho icyatuma risenyuka.’’

Mu 2019, Abanyarwanda baba mu mahanga binjije mu gihugu miliyoni $261,6, mu gihe ibikorwa by’ishoramari birimo n’iby’Abanyarwanda bituruka hanze byinjije agera kuri miliyoni $318,1.

U Rwanda rufite intego ko ubukungu bwarwo buzaba bwiyongeraho ku 10% mu 2050, mu gihe mu 2019, ubukungu bwarwo bwazamutseho 8%.

Intego y’icyerekezo 2050 ni ugutuma u Rwanda ruba igihugu gifite ubukungu buciriritse aho byibura mu 2035, umuturage azaba yinjiza miliyoni enye ku mwaka; naho mu 2050, u Rwanda rukazaba igihugu gifite ubukungu buteye imbere ku buryo umuturage azaba yinjiza byibura miliyoni Frw 11 ku mwaka.

Perezida w’Inteko Ishinga Amategeko, Umutwe w’Abadepite, Mukabalisa Donatille, yasabye Abanyarwanda batuye muri Canada kurushaho gushyigikira iterambere u Rwanda rwagezeho
Depite Mukabalisa yasangije Abanyarwanda baba muri Canada inzira y'umusaraba u Rwanda rwanyuzemo nuko rwavuye muri ibyo bihe kubera politiki nziza
Abanyarwanda bitabiriye iki gikorwa bumva impanuro zagitangiwemo
Habaye n'umwanya wo gusabana
Abacyitabiriye banafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .