Abanyabugeni batangiye gushyira ahahurira abantu benshi ibishushanyo bitanga ubutumwa bwo kurwanya COVID-19 (Amafoto)

Yanditswe na Ndahayo Emmanuel
Kuya 2 Nzeri 2020 saa 04:02
Yasuwe :
0 0

Ihuriro ‘Kurema Kureba Kwiga’ ku bufutanye n’abanyabugeni nyarwanda, ryatangiye igikorwa cyo gushyira ibishushanyo bitanga ubutumwa bwo kurwanya Coronavirus mu bice bitandukanye by’igihugu, kugira ngo abo bahanzi batange umusanzu wabo mu kurushaho guhangana n’icyorezo cya Coronavirus.

Ni ibishushanyo byashyizwe ahantu harindwi, bikubiyemo ubutumwa bwo kwirinda Coronavirus, kwerekana ubutumwa bw’icyizere bujyanye n’uburyo umuryango nyarwanda uhanganye na Coronavirus ndetse no kwerekana uburyo ibintu bihagaze ku Isi mu guhangana na Coronavirus, n’uko bizaba bimeze nyuma yayo.

Aho ibishushanyo biherereye

Hari igishushanyo kiri i Gikondo hateganye na café Rwampala, cyakozwe na Jim Rolland. Hari ikiri mu isoko rya Nkoto cyakozwe na William Wing Ngendandumwe. Hari kandi ikiri ku isoko rya Kimisagara cyakozwe na Gilbert Iradukunda, afashijwe na Louise Kayange.

Ikindi kiri Cyahafi, cyakozwe na Isaac Irumva afashijwe na Emmanuel Mutabazi ndetse na Japhet Nishimwe. Ku rukuta rwa SARL Motors, hateganye na gare ya Remera, hari igishushanyo cyakozwe Bonfils Ngabonziza na Innocent Kagabo bafashijwe na Laure Bella Ange Izere.

Ku isoko rya Rugando na ho hari igishushanyo cyakozwe na Jean Baptiste Rukundo afatanyije na Willy Karekezi, bafashijwe na Haguma Rossy Montana.

Hari kandi ibishushanyo byashyizwe mu Kiyovu ku muryango wa Ste Famille, ikiri munsi y’amahuriro y’umuhanda ari Peage, inyuma ya RSSB ndetse n’ikiri hafi ya SOPETRADE byakozwe na Mudahigwa Christophe na Isaac Irumva.

Umuryango Kurema umaze igihe ukoresha ibihangano bishyirwa ku karubanda mu gutanga ubutumwa bugamije gushishikariza abaturage kwirinda icyorezo cya Coronavirus, mu mugambi mugari wa leta y’u Rwanda wo gushishikariza abaturage kwirinda ikwirakwira ry’iki cyorezo.

Ubu butumwa ni umusanzu w’abahanzi bakoresha ubuhanga bwabo mu kurema ibihangano bigera kuri benshi kandi mu buryo bworoshye, ku buryo n’abatabona uburyo bwo kubona ubwo butumwa hifashishijwe ubundi buryo, bashobora kwigira kuri ibi bishushanyo bishyirwa ku mihanda hafi yabo kandi ku buntu.

Byongeye kandi ubu butumwa buzakwirakwiza ku mbuga nkoranyambaga, mu rwego rwo kubugeza ku bantu benshi kurushaho.

Uyu mushinga muri rusange washyizwe mu bikorwa n’Umuryango Kurema Kureba Kwiga, umuryango uharanira gukoresha ibihangano bishyirwa ku mihanda mu rwego rwo gufasha umuryango nyarwanda kwiga, ibyanatuma urushaho guhinduka no kuba mwiza kurushaho.

Ni ibishushanyo biri gushyirwa ahantu hakunze guhurira abantu benshi
Ni ibishushanyo bitanga ubutumwa bwo kwirinda Coronavirus
Hari n'ibishushanyo byakozwe mbere, na byo biri gushyirwa ahahurira abantu benshi

Amafoto: Chris Schwagga


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .